អ៊ីរ៉ង់-នុយក្លេអ៊ែរ

នុយក្លេអ៊ែរអ៊ីរ៉ង់៖អាមេរិកចូលរួមប្រជុំ តែមិនអង្គុយ និងជួបនិយាយផ្ទាល់ជាមួយអ៊ីរ៉ង់

នៅ​ថ្ងៃ​អង្គារ ទី៦ មេសា ក្រុម​ប្រទេស​ហត្ថលេខី​ទាំង ៧ប្រទេស​នៃ​កិច្ចព្រមព្រៀង​នុយក្លេអ៊ែរ​អ៊ីរ៉ង់​ឆ្នាំ ២០១៥ រួម​ប្រជុំ​គ្នា​ក្នុង​ទីក្រុង​វីយែន ប្រទេស​អូទ្រីស។
នៅ​ថ្ងៃ​អង្គារ ទី៦ មេសា ក្រុម​ប្រទេស​ហត្ថលេខី​ទាំង ៧ប្រទេស​នៃ​កិច្ចព្រមព្រៀង​នុយក្លេអ៊ែរ​អ៊ីរ៉ង់​ឆ្នាំ ២០១៥ រួម​ប្រជុំ​គ្នា​ក្នុង​ទីក្រុង​វីយែន ប្រទេស​អូទ្រីស។ © 路透社/Kirsti Knolle

នៅ​ថ្ងៃ​អង្គារ ទី៦ មេសា ក្រុម​ប្រទេស​ហត្ថលេខី​ទាំង ៧ប្រទេស​នៃ​កិច្ចព្រមព្រៀង​នុយក្លេអ៊ែរ​អ៊ីរ៉ង់​ឆ្នាំ ២០១៥ រួម​ប្រជុំ​គ្នា​ក្នុង​ទីក្រុង​វីយែន ប្រទេស​អូទ្រីស។ ប្រទេស​ហត្ថលេខី​ទាំង ៧ប្រទេស​មាន​ចិន រុស្ស៊ី បារាំង អាល្លឺម៉ង់ អង់គ្លេស អាមេរិក និង​ប្រទេស​អ៊ីរ៉ង់។ កម្មវត្ថុ​នៃ​កិច្ចប្រជុំ​គឺ​ដើម្បី​ព្យាយាម​ស្រោចស្រង់​កិច្ចព្រមព្រៀង​កាល​ពី ៦ឆ្នាំ​នេះ​ឡើង​វិញ។ តែ​អ្វី​ជា​ការ​កត់សម្គាល់​នៅ​ក្នុង​កិច្ចប្រជុំ​ពេល​នេះ ភាគី​អាមេរិក​មិន​អង្គុយ​តុប្រជុំ និង​មិន​ជួប​និយាយ​ផ្ទាល់​ជាមួយ​អ៊ីរ៉ង់​ទេ។

ផ្សាយពាណិជ្ជកម្ម

ជា​កិច្ចប្រជុំ​ផ្តោត​លើ​ប្រធានបទ​តែ​មួយ តែ​ត្រូវ​បាន​រៀបចំ​ជា​ពីរ​ដាច់​ដោយ​ឡែក​ពី​គ្នា។ នៅ​ម្ខាង ជា​កិច្ចប្រជុំ​នៅ​ក្នុង​បន្ទប់​តែ​មួយ និង​នៅ​ជុំវិញ​តុ​តែ​មួយ​ដែល​ភាគី​ចិន រុស្ស៊ី បារាំង អង់គ្លេស និង​អាល្លឺម៉ង់​ជួប​ជជែក​ជាមួយ​អ៊ីរ៉ង់។ បន្ទាប់​មក ភាគី​ចិន រុស្ស៊ី បារាំង អង់គ្លេស និង​អាល្លឺម៉ង់​ដដែល​ត្រូវ​ជួប​ជជែក​ជាមួយ​ភាគី​អាមេរិក​នៅ​ក្នុង​បន្ទប់ និង​នៅ​ជុំវិញ​តុ​មួយ​ផ្សេង​ទៀត។ ការ​រៀបចំ​ឲ្យ​មាន​កិច្ចប្រជុំ​ពីរ​ដាច់​ដោយឡែក​ពី​គ្នា​នេះ​ដោយសារ​តែ​ភាគី​អាមេរិក និង​អ៊ីរ៉ង់​មិន​ទាន់​ចង់​ជួប​មុខ និង​និយាយ​រក​គ្នា​ដោយផ្ទាល់​នៅ​ពេល​នេះ។ កិច្ចប្រជុំ​ទាំង​ពីរ​នេះ​រៀបចំ និង​សម្របសម្រួល​ដោយ​សហភាព​អឺរ៉ុប។

តាម​ពិត​ទៅ ភាព​ថ្នឹងថ្នាក់​រវាង​អាមេរិក និង​អ៊ីរ៉ង់​បាន​កើត​មាន​ឡើង បន្ទាប់​ពី​អតីត​ប្រធានាធិបតី​អាមេរិក​លោក​ដូណាល់ ត្រាំ​បាន​ដក​អាមេរិក​ចេញ​ពី​កិច្ចព្រមព្រៀង​នុយក្លេអ៊ែរ​អ៊ីរ៉ង់​ក្នុង​ឆ្នាំ ២០១៨ និង​បាន​ដាក់​ទណ្ឌកម្ម​សេដ្ឋកិច្ច​ឡើង​វិញ​លើ​អ៊ីរ៉ង់។ ជា​ការ​សងសឹក​នឹង​លោក​ត្រាំ​វិញ អ៊ីរ៉ង់​បាន​ផ្តើម​មិន​គោរព​ពេញលេញ​លើ​កិច្ចព្រមព្រៀង ពិសេស​បាន​ស្តុក និង​ធ្វើ​ការ​ចម្រើនធាតុ​អ៊ុយរ៉ាញ៉ូម​ក្នុង​អត្រា​លើស​ការ​កំណត់​របស់​កិច្ចព្រមព្រៀង។ តែ​ជាមួយ​នឹង​រដ្ឋបាល​អាមេរិក​ថ្មី ប្រធានាធិបតី​លោក​បៃដិន​ចង់​នាំ​អាមេរិក​ចូល​ក្នុង​កិច្ចព្រមព្រៀង​ឡើង​វិញ។

ចំណោទ​នៅ​ត្រង់​ថា​មក​ទល់​ពេល​នេះ អ៊ីរ៉ង់ និង​អាមេរិក​កំពុង​បន្ត​តថ្លៃ​គ្នា​ដោយ​នៅ​ម្ខាង អ៊ីរ៉ង់​បាន​ទាមទារ​ឲ្យ​អាមេរិក​ដកទណ្ឌកម្ម​ចេញ​មុន ទើប​ខ្លួន​វិល​ទៅ​គោរព​កិច្ចព្រមព្រៀង​ជា​ថ្មី​ឡើង​វិញ។ ចំណែក​នៅ​ម្ខាង​ទៀត អាមេរិក​ក៏​បាន​ទាមទារ​ឲ្យ​អ៊ីរ៉ង់​គោរព​កិច្ចព្រមព្រៀង​ត្រឹមត្រូវ​មុន ទើប​ខ្លួន​ដក​ទណ្ឌកម្ម​ចេញ​វិញ។ គឺ​ភាព​ប្រទាញប្រទង់​គ្នា​នេះ​ហើយ​ដែល​ក្រុម​ប្រទេស​ហត្ថលេខី​ផ្សេង​ព្យាយាម​ដោះស្រាយ​តាម​រយៈ​កិច្ចប្រជុំ​ពេល​នេះ។ តើ​យុទ្ធសាស្រ្ត​ការទូត​មួយ​នេះ​អាច​ឈាន​ទៅ​ស្រោចស្រង់​កិច្ចព្រមព្រៀង​នុយក្លេអ៊ែរ​អ៊ីរ៉ង់​កាល​ពី ៦ឆ្នាំ​មុន​បាន​ដែរ​ឬ​ទេ?។

គេ​ពិបាក​ផ្តល់​ចម្លើយ​មួយ​ច្បាស់លាស់​ចំពោះ​សំណួរ​នេះ។ តែ​អ្វី​ដែល​គេ​អាច​និយាយ​បាន ការ​ដែល​អាមេរិក និង​អ៊ីរ៉ង់​បាន​យល់ព្រម​ចូល​រួម​ប្រជុំ​ពេល​នេះ ទោះ​មិន​ទាន់ចង់អង្គុយ​តុ​ជាមួយ​គ្នា មិន​ទាន់​ចង់​ជួប​មុខ​គ្នា និង​មិន​ទាន់​ចង់ជ្រលក់​មាត់​រក​គ្នា​ដោយ​ផ្ទាល់​ក៏​ដោយ ក៏វា​ជា​ការ​បោះ​មួយ​ជំហាន​ទៅ​មុខ​រួច​ស្រេច​ទៅ​ហើយ។ នេះ​ស បញ្ជាក់​ឲ្យ​ឃើញ​ថា អាមេរិក និង​អ៊ីរ៉ង់​ពិត​ជា​មាន​ឆន្ទៈ​ចង់​ដោះស្រាយ​បញ្ហា និង​ចង់​បញ្ចប់​ភាព​ចម្រូងចម្រាស់​រវាង​គ្នា។ គ្រប់​គ្នា​កំពុង​រង់ចាំ​មើល​ថា​រវាង​អាមេរិក និង​អ៊ីរ៉ង់ តើ​អ្នក​ណា​សុខចិត្ត​បោះដៃ និង​ធ្វើ​សម្បាទាន​ឲ្យ​អ្នក​ណា​មុន ព្រោះ​ចូរ​កុំ​ភ្លេច​ថា ម្នាក់ៗ​ក៏​មិន​ចង់​បាក់​មុខ​បាក់​មាត់​ដោយសារ​អ្នក​ណា​ដែរ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI