កូវីដ១៩-ទេសចរណ៍

កូវីដ១៩-ទេសចរណ៍ ៖ តើ​ប្រទេស​ណា​ខ្លះ​អាច​ធ្វើ​ដំណើរ​មកកំសាន្ត​នៅ​​បារាំង ?

បារាំង​កំណត់​ផែនទី​ធ្វើ​ដំណើរ​ជា​បី​ពណ៌​ទៅ​តាមកំរិត​ចម្លង​កូវីដ​១៩
បារាំង​កំណត់​ផែនទី​ធ្វើ​ដំណើរ​ជា​បី​ពណ៌​ទៅ​តាមកំរិត​ចម្លង​កូវីដ​១៩ © Gouvernement.fr

លោកអ្នក​ស្រមៃ​ចង់​ធ្វើ​ដំណើរឆ្លងប្រទេស ក្នុង​សម័យ​កូវីដ ? រដ្ឋាភិបាល​បារាំង​​ទើប​កំណត់​វិធានការ​ថ្មី​ទាក់​ទងនឹង​ការទទួល​ទេសចរ​បរទេស និង​​បើក​ព្រំ​ដែន​ឱ្យ​ប្រជាពលរដ្ឋ​បារាំង​បាន​ចេញ​ទៅ​កំសាន្ត​វិស្សមកាល​នៅ​ក្រៅទ្វីប។ លក្ខខណ្ឌ​នៃការ​ធ្វើ​ដំណើរ​អាស្រ័យ​ទាំង​ស្រុង​​ទៅ​លើ​ពណ៌​របស់​ប្រទេស​នីមួយៗ​នៅ​លើ​ពិភពលោក ដែល​រដ្ឋាភិបាល​​បារាំង​បាន​បែង​ចែក​ជា​បីពណ៌ ៖ បៃតង លឿងទុំ និង​ក្រហម ទៅ​កំរិតចម្លង​កូវីដ​១៩ និង​ការរីកសាយ​មេរោគ​បំប្លែងខ្លួន​នៅក្នុង​​ប្រទេស​នោះ។

ផ្សាយពាណិជ្ជកម្ម

ចាប់​ពី​ថ្ងៃទី ៩ មិថុនា ២០២១​ទៅ បារាំង​នឹងបន្ធូរបន្ថយ​វិធានការ​ប្រឆាំងនឹង​កូវីដ​របស់​ខ្លួន ដោយ​​បើក​ទូលាយ​​ឱ្យ​មានការ​ធ្វើដំណើរ​បាន​ច្រើន​ជាងមុន​ និងអាច​ធ្វើ​ដំណើរ​ឆ្លង​ទ្វីប ​ទៅ​-មក​ប្រទេស​ខ្លះ​។ បើ​តាមក្រសួង​ការបរទេស​ បារាំង​បាន​បែងចែក​ផែនទី​ធ្វើ​ដំណើរ​​ទៅតាមកំរិត​នៃ​ការ​រាតត្បាត​កូវីដ​១៩ ជា​បី​ពណ៌ (បៃតង លឿង​ទុំ និង ក្រហម) និងជា​បី​លក្ខខណ្ឌផ្សេងៗ​គ្នា​។

បៃតង ៖ ​​ជា​ក្រុមប្រទេស​ដែលមាន​​ការ​ចម្លង​មេរោគ​កូវីដ​១៩​មិនសកម្ម និង​គ្មាន​មេរោគ​កូវីដ១៩​បំប្លែង​ខ្លួនគួរ​ព្រួយ​បារម្ភ​។ ក្រុមនេះ​មាន​តិចប្រទេសណាស់ គឺ​មានតែ​ប្រទេស​ក្នុង​សហភាពអឺរ៉ុប អ៊ីស្លង់ ស្វីស ន័រវែស អ៊ីស្រាអែល លីបង់  អូស្ត្រាលី នូវែលហ្សេឡង់ សិង្ហបុរី កូរ៉េខាង​ត្បូង និងជប៉ុន​។ ប្រជាពលរដ្ឋ​បារាំង​ អាច​ធ្វើ​ដំណើរ​ទៅ​ប្រទេស​បៃតង​បាន ដោយ​ពុំចាំបាច់​មានហេតុ​ផល​បញ្ជាក់​ទេ។ អ្នក​បាន​​ចាក់​ថ្នាំ​បង្ការ​ (Pfizer- Moderna -Astrazeneca) ត្រូវ​ចាក់​ឱ្យ​គ្រប់​ចំនួន​ពីរម្ជុល​ និ​ងចាំ​យ៉ាង​តិច​ពីរ​សប្តាហ៍ ទើប​អាច​ចេញ​ដំណើរ​បាន ​ ឬមួយ​ម្ជុល​និងបួន​សប្តាហ៍​ក្រោយ​ការ​វ៉ាក់សាំង​ Johnson&Johnson។ ​ពលរដ្ឋ​នៃ​ប្រទេស​បៃតង ក៏​អាច​ចូល​មក​ទស្សនា​ប្រទេស​បារាំង​​បាន បើ​ទោះបី​ជា​ពុំ​ទាន់​ចាក់​វ៉ាក់សាំង​ក៏​ដោយ ដោយ​គ្រាន់​តែបង្ហាញ​លទ្ធផលតេស្ត​កូវីដ​អវិជ្ជមាន៧២ម៉ោង​​មុន​ឡើង​យន្តហោះ​។

លឿងទុំ ៖ មេរោគ​កូវីដ​សកម្មខ្លាំង តែ​គ្រប់គ្រង​បាន និង​ពុំ​មានការ​រីក​សាយ​នៃ​មេរោគ​បំប្លែង​ខ្លួន​គួរ​ព្រួយ​បារម្ភ។ ក្រុម​លឿងទុំ​មានច្រើន​ប្រទេសជាង​គេ រាប់​តាំងពី​សហរដ្ឋ​អាមេរិក កាណាដា ប្រទេស​នៅ​ទ្វីបអាហ្វ្រិក និងនៅ​អាស៊ី ​ស្ទើរ​ទាំង​អស់ ព្រមទាំង​អង់គ្លេស។ ​អ្នក​ចាក់​ថ្នាំ​បង្ការ​រួច​សព្វគ្រប់​ហើយ អាច​ធ្វើ​ដំណើរ​ទៅ​ប្រទេស​ទាំងអស់​នោះបាន​ដោយ​គ្មាន​មូលហេតុ​ចាំបាច់ ប៉ុន្តែ​អ្នក​មិន​ទាន់​ចាក់​វ៉ាក់សាំង​ មិន​អាច​ធ្វើ​ដំណើរ​ទៅ​បាន​ទេ បើ​គ្មាន​ភារកិច្ច​បន្ទាន់​ចាំ​បាច់​​ក្នុង​គ្រួសារ​និង​ការងារ ដែល​ទទួល​ស្គាល់​ដោយ​រដ្ឋាភិបាល។ ពលរដ្ឋ​ក្នុង​ប្រទេស​លឿង​ទុំ​អាច​មក​បារាំង​បាន​ បើ​បាន​ចាក់​ថ្នាំបង្ការ​រួច​ត្រឹមត្រូវ (ថ្នាំបង្ការទទួលស្គាល់​ដោយ​បារាំង Pfizer- Moderna -Astrazeneca និង Johnson&Johnson)  និង​ដោយ​ត្រូវ​ធ្វើ​តេស្ត​អវិជ្ជមាន​កូវីដ​១៩ ចំនួន​៧២ម៉ោង​ជាមុន។ អ្នក​មិន​ទាន់​បាន​ចាក់​វ៉ាក់សាំង ត្រូវ​មាន​ហេតុផង​ចាំបាច់​នៃការ​ធ្វើ​ដំណើរ និងត្រូវ​នៅដាច់​ដោយ​ឡែកពី​គេ​ចំនួន​៧​ថ្ងៃ ពេល​មក​ដល់​បារាំង។

ក្រហម ៖ ជាក្រុមប្រទេស​ដែល​មេរោគកូវីដបំប្លែង​ខ្លួន​កំពុង​សកម្ម​ខ្លាំង គួរ​ឱ្យ​ព្រួយ​បារម្ភ មានអាទិ៍ អាហ្វ្រិក​ខាង​ត្បូង ឥណ្ឌា ប៉ាគីស្ថាន ស្រីលង្កា បង់ក្លាដែស នេប៉ាល់ ប្រេស៊ីល កូឡុំប៊ី បូលីវី អាហ្សង់ទីន កូស្ការីកា តួកគី អ៊ុយរាហ្កាយ។ មិនទទួល​និង​កំរិត​លំហូរ​អ្នក​ដំណើរ​មក​ពីប្រទេស​ទាំង​អស់​នោះ​យ៉ាង​តឹង​តែង ដោយ​ឱ្យ​ធ្វើ​តេស្ត ពេលមុន​និង​ពេលមក​ដល់​ទឹកដី​បារាំង និង​​ធ្វើ​ចត្តាឡីស័ក​១០​ថ្ងៃ​ហើយ រដ្ឋាភិបាល​បារាំង​បាន​ណែនាំ​​​មិន​ឱ្យ​ពលរដ្ឋ​បារាំង​ធ្វើ​ដំណើរ​ទៅ​ប្រទេស​ទាំង​នេះ ប្រសិន​បើ​គ្មាន​ភារកិច្ចចាំបាច់។ 

ការ​​កំណត់​ពណ៌​ប្រទេស​នឹង​ត្រូវ​ធ្វើ​បច្ចុប្បន្នភាព​ជា​រៀង​រាល់​១៥​ថ្ងៃ​ម្តង៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI