អ្នកសារព័ត៌មាន១០៦នាក់បានស្លាប់ក្នុងពេលបំពេញការងារក្នុងឆ្នាំ២០១១
ចុះផ្សាយនៅថ្ងៃ៖ កែប្រែថ្ងៃទី៖
អ្នកកាសែតជាង១០០នាក់បានស្លាប់ក្នុងឆ្នាំ២០១១នេះ នៅក្នុងពិភពលោក។ នេះជាការអះអាងរបស់Press Emblem Campaign អង្គការស្វីសមួយដែលការពារអ្នកសារព័ត៌មាន។ យោងទៅតាមរបាយការណ៍នៃអង្គការក្រៅរដ្ឋាភិបាលនេះ នៅក្នុងឆ្នាំ២០១១ដែលជិតកន្លងផុតទៅនេះ ប្រទេសម៉ិកស៊ិកនិងពិភពអារ៉ាប់ ជាទីកន្លែងគ្រោះថ្នាក់បំផុតសម្រាប់អ្នកកាសែត។
១០៦នាក់ នេះគឺជាចំនួនអ្នកសារព័ត៌មានដែលបានស្លាប់ក្នុងឆ្នាំ២០១១នេះ នៅទូទាំងពិភពលោក។ បើប្រៀបធៀបទៅនឹងឆ្នាំទៅមិញ២០១០ដែលកាលណោះ មានអ្នកកាសែតស្លាប់អស់១០៥នាក់ តួលេខអត់ថយចុះឡើយ។ នេះបើយោងទៅតាមរបាយការណ៍របស់អង្គការក្រៅរដ្ឋាភិបាលស្វីសឈ្មោះPress Emblem Campaign ចេញផ្សាយកាលពីល្ងាចថ្ងៃអង្គារទី២០ធ្នូម្សិលមិញ។
អង្គការដដែលនេះលាតត្រដាងថា ពេញមួយឆ្នាំ២០១១ដែលជិតកន្លងផុតទៅនេះ អ្នកកាសែតយ៉ាងតិច២០នាក់បានស្លាប់នៅក្នុងពិភពអារ៉ាប់ ដោយហេតុតែបដិវត្តន៍នៅអេហ្ស៊ីប លីប៊ី ស៊ីរី ទុយនីស៊ី និងយេម៉ែន ជាទីដែលបុគ្គលិកនៃមធ្យោបាយឃោសនាមហាជនជាង១០០នាក់ផ្សេងទៀតបានទទួលរងការធ្វើទុក្ខបុកម្នេញ។
ក៏ប៉ុន្តែ សម្រាប់Press Emblem Campaign គឺនៅប្រទេសម៉ិកស៊ិកទៅវិញទេ ដែលមានអ្នកកាសែតស្លាប់ច្រើនជាងគេ គឺចំនួន១២នាក់ពីខែមករារហូតដល់ខែធ្នូឆ្នាំ២០១១នេះ។ មូលហេតុ គឺមកអំពីសង្គ្រាមរ៉ាំរ៉ៃរវាងកងទ័ពម៉ិកស៊ិកនិងក្រុមទុច្ចរិតអ្នករត់ពន្ធគ្រឿងញៀននៅប៉ែកខាងជើងនៃប្រទេស។ បន្ទាប់មកទៀតគឺប្រទេសប៉ាគីស្ថាន ជាទីដែលមានអ្នកកាសែត១១នាក់ស្លាប់ ជាពិសេសនៅក្នុងតំបន់កុលសម្ព័ន្ធជាប់នឹងទល់ដែនប្រទេសអាហ្វហ្កានីស្ថាន។
បន្ថែមពីនេះ របាយការណ៍របស់Press Emblem Campaign អះអាងថា ចំនួន២ភាគ៣នៃអ្នកកាសែតបានស្លាប់ សុទ្ធតែត្រូវបានបាញ់ប្រហារត្រង់ៗ។ រីឯ១ភាគ៣ទៀត សុទ្ធតែបានស្លាប់ដោយចៃដន្យនិងដោយគ្រោះថ្នាក់ នៅពេលដែលពួកអ្នកសារព័ត៌មានទាំងនោះកំពុងបំពេញការងារនៅទីកន្លែងកើតហេតុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ