កម្ពុជា-បារាំង

យោធាខ្មែរ​១២​នាក់​ទទួល​បាន​ការ​បណ្តុះបណ្តាល​ផ្នែក​បន្សាប​គ្រឿងផ្ទុះ​ពី​បារាំង​

ទាហាន​កម្ពុជា​​ទទួល​ការ​​បណ្តុះបណ្តាល​​បច្ចេកទេស​​​នៃ​ការគ្រប់គ្រង​​និង​ការ​បន្សាប​គ្រឿងផ្ទុះ​ពី​អ្នក​ជំនាញ​បារាំង។
ទាហាន​កម្ពុជា​​ទទួល​ការ​​បណ្តុះបណ្តាល​​បច្ចេកទេស​​​នៃ​ការគ្រប់គ្រង​​និង​ការ​បន្សាប​គ្រឿងផ្ទុះ​ពី​អ្នក​ជំនាញ​បារាំង។ RFI/Leang Delux

វគ្គ​បណ្តុះបណ្តាល​បច្ចេកទេស​នៃ​ការ​គ្រប់គ្រង​និង​ការបន្សាប​គ្រឿង​ផ្ទុះ​​ដែល​បាន​ប្រព្រឹត្តិ​ទៅ​ក្នុង​ក្របខណ្ឌ​នៃ​ជំនួយ​សហប្រតិបត្តិការ​របស់​បារាំង ទើប​បាន​បញ្ចប់​កាលពី​ពេល​ថ្មីៗនេះ។ យោធា​ខ្មែរ​ចំនួន​១២​នាក់ ​បាន​ចូលរួម​ក្នុង​វគ្គ​បណ្តុះបណ្តាល​នេះដែល​បាន​មាន​រយៈពេល​៤​សប្តាហ៍។

ផ្សាយពាណិជ្ជកម្ម

ក្នុង​រយៈពេល​៤​សបា្តហ៍​ យោធា​ខ្មែរ​ចំនួន​១២​នាក់​បាន​​ទទួល​ការបង្ហាត់បង្រៀន​ផែ្ន​ក​ទ្រឹស្តី និង​ការអនុវត្តន៍​ជាក់​សែ្ត​ង​​នៅលើ​ទីលាន ជាអាទិ៍​តាមរយៈ​ការចុះទៅ​ការដ្ឋាន​ដោះមីន នៅ​តំបន់​ប៉ៃលិន​។ ក្នុងអំឡុងពេល​នៃ​ការចុះទៅ​ការដ្ឋាន​នេះ ការអនុវត្ត​ន៍​ផ្ទាល់ស្តីពីការ​បន្សាប​គ្រឿងផ្ទុះ ត្រូវបាន​ធ្វើឡើង​ក្រោម​ការដឹកនាំ​បច្ចេកទេស​ពី​អ្នកជំនាញការ​បារាំង​។​

បារាំង​បាន​បញ្ជូន​អ្នកជំនាញ​របស់​ខ្លួន​២​រូបមក​កម្ពុជា​ ដើម្បី​ដឹកនាំ​ការ​​បណ្តុះបណ្តាល​​បច្ចេកទេស​​នៃ​ការគ្រប់គ្រង​និង​ការ​បន្សាប​គ្រឿងផ្ទុះ នៅ​វិទ្យាស្ថាន​ជាតិ​គ្រប់គ្រង​កងកំលាំង​រក្សា​ស​និ្ត​ភាព បោសសំអាត​មីន និង​កាកសំណល់​សង្គ្រាមឧ​ត្តុ​ង្គ​។ វគ្គ​បណ្តុះបណ្តាល​ដែល​ត្រូវបាន​រៀបចំ​ឡើង​ក្នុង​ក្របខណ្ឌ​នៃ​កិច្ច​សហប្រតិបត្តិការ​បារាំង​-កម្ពុជា បានពង្រឹង​បច្ចេកទេស​យោធា​កម្ពុជា​ផែ្ន​ក​ដោះមីន សំគាល់​គ្រាប់បែក​ប​ងៃ្ក និង​ការកំទេច​កាកសំណល់​ស​ង្គ្រា​ម​។

យោងតាម​សេចក្តីប្រកាស​របស់​ស្ថានទូត​បារាំង វគ្គ​បណ្តុះបណ្តាល​នេះ​ក៏​ត្រូវបាន​ធ្វើ​ឡើង​ក្នុង​ក្របខណ្ឌ​នៃ​ការ​ទ្រទ្រង់​​ការចូលរួម​របស់​កម្ពុជាក្នុង​ប្រតិ​ប​តិ្ត​ការរក្សា​សន្តិភាព​របស់​អង្គការ​សហប្រជាជាតិ​​​ផងដែរ។​

គួរ​បញ្ជាក់​ថា កម្ពុជា​កំពុង​ទទួល​បាន​នូវ​ភាព​ល្បីល្បាញ​ក្នុង​វិស័យ​ដោះមីន បន្ទាប់​ពី​ប្រទេស​មួយ​នេះ​បាន​ក្លាយទៅជា​ប្រទេស​រងគ្រោះ​ដោយ​គ្រាប់មីន​ដោយសារ​តែ​សង្គ្រាម​ស៊ីវិល​ជាង​៣​ទស្សវត្សរ៍​នោះ។ នៅ​ពេល​នេះ តាម​រយៈ​ការអំពាវនាវ​របស់​អង្គការ​សហប្រជាជាតិ កម្ពុជា​បាន​ចូលរួម​ក្នុង​សកម្មភាព​មនុស្សធម៌​នៃ​កងទ័ព​មួកខៀវ​របស់​អង្គការ​សហប្រជាជាតិ​ ដោយ​ការ​បញ្ជូន​កំលាំង​យោធា​ដោះមីន​ទៅ​ប្រទេស​ជាច្រើន​នៅ​ក្នុងទ្វីប​អាហ្វ្រិក។

កាល​ពី​ខែ​មេសា​កន្លងទៅនេះ កង​យោធា​រក្សា​សន្តិភាព​របស់​កម្ពុជា​១៥២នាក់​ ទើបតែ​ត្រូវបាន​បញ្ជូន​ទៅ​កាន់​ប្រទេស​ស៊ូដង់​ខាងត្បូង។ កម្ពុជា​បាន​បញ្ជូន​កងទ័ព​រក្សា​សន្តិភាព​របស់​ខ្លួន​ជាលើក​ដំបូង​ នៅ​ឆ្នាំ​២០០៦។ រហូត​ដល់ពេល​នេះ មាន​កងទ័ព​១៦០០​នាក់​ដែល​ត្រូវបាន​បញ្ជូន​ជា​បន្តបន្ទាប់ ​ទៅ​កាន់​ប្រទេស​ស៊ូដង់ ស៊ូដង់​ខាងត្បូង ឆាត អាហ្វ្រិក​កណ្តាល លីបង់ និង​ស៊ីរី​ផងដែរ។

ការ​បោសសម្អាត​មីន ជីក​អណ្តូង​ទឹក សាងសង់​សាលារៀន សាងសង់​មជ្ឈមណ្ឌល​សុខភាព ស្ពាន​ជាដើម ទាំងនេះ​គឺជា​សកម្មភាព​មនុស្សធម៌​​របស់​យោធាកម្ពុជា ​ក្នុង​ក្របខណ្ឌនៃ​ការរក្សា​សន្តិភាព​របស់​អង្គការ​សហប្រជាជាតិ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI