កម្ពុជា

ថ្ងៃ​២០​ឧសភា​ ទិវា​រម្លឹក​ការ​ឈឺចាប់​ក្នុង​របប​ខ្មែរ​ក្រហម

ថ្ងៃ​២០​ឧសភា ​ទិវា​រម្លឹក​ការ​ឈឺចាប់​ក្នុង​របប​ខ្មែរ​ក្រហម
ថ្ងៃ​២០​ឧសភា ​ទិវា​រម្លឹក​ការ​ឈឺចាប់​ក្នុង​របប​ខ្មែរ​ក្រហម © ស៊ីវ​ ចាន់ណា

នៅ​ព្រឹក​ថ្ងៃ​សុក្រ​នេះ អាជ្ញាធរ​ក្រុងភ្នំពេញ បាន​ប្រារព្ធ​ទិវា​រំលឹក​ការឈឺចាប់​នៃ​របប​ខ្មែរក្រហម ថ្ងៃ​២០​ឧសភា នៅឯ​សារមន្ទីរ​ប្រល័យពូជសាសន៍​ជើងឯក ជាយ​ទីក្រុង​ភ្នំពេញ​។ ដូច​រៀងរាល់​ឆ្នាំ​ដែរ នៅ​ឆ្នាំ​នេះ ទិវា​២០​ឧសភា បាន​ប្រព្រឹត្តទៅ​ដោយ​មាន​ការចូលរួម​ពី​មន្ត្រីរាជការ​ព្រះសង្ឃ​ និង​ប្រជាពលរដ្ឋ ប្រមាណ ៣០០០ នាក់​។ ក្រៅពី​សេចក្តីថ្លែងការណ៍​របស់​អាជ្ញាធរ និង​ជនរងគ្រោះ ក្នុង​ពិធី​នៅ​ព្រឹក​មិញ ក៏​មាន​ការសម្តែង​របស់​ក្រុម​យុវជន បង្ហាញ​ពី​ការកាប់​សម្លាប់​​ជីវិត​មនុស្ស​យ៉ាង​សាហាវ​ព្រៃផ្សៃ ក្នុងសម័យ​អាវខ្មៅ ប៉ុលពត ផងដែរ​។​

ផ្សាយពាណិជ្ជកម្ម

ក្នុង​ពិធី​នៅ​ជើងឯក នៅ​ព្រឹក​មិញ តំណាង​ជនរងគ្រោះ​ក្នុង​របប​ខ្មែរក្រហម បាន​ឡើង​ថ្លែង​សុន្ទរកថា ដោយ​សម្តែង​ការឈឺចាប់ ចំពោះ​របប​ខ្មែរក្រហម​។ អ្នកចូលរួម​ពិធី​នោះ ក៏​បាន​សម្តែង​​​ការគាំទ្រ​តុលាការ​កាត់ទោស​មេដឹកនាំ​ខ្មែរក្រហម ដើម្បី​រក​យុត្តិធម៌​ជូន​ជនរងគ្រោះ និង​ជម្រុញ​ឲ្យ​តុលាការ ដាក់ទោស​អតីត​មេដឹកនាំ​ខ្មែរក្រហម​ទាំងនោះ ឲ្យបាន​ខ្លាំងក្លា ដើម្បី​កុំឲ្យ​មាន​របបវាលពិឃាតនេះ កើតឡើង​សា​ជា​ថ្មី​។​

ក្នុង​ទិវា​ថ្ងៃ​២០​ឧសភា នៅ​ព្រឹក​មិញ ក៏​មាន​ការសម្តែង​ទស្សនីយភាព ដែល​រម្លឹក​ឡើងវិញ​ពី​ការ​ឈឺ​ចាប់ ក្នុង​របប​ខ្មែរក្រហម​។ នោះគឺការ​ធ្វើ​ទារុណកម្ម និងការ​​កាប់សម្លាប់​មនុស្ស​យ៉ាង​ឃោរឃៅ​​មកលើ​ពលរដ្ឋ​ខ្មែរ​ជិត ២​លាន​នាក់​។

ក្រៅពីរាប់បាត្រ ប្រគេនចង្ហាន់ដល់ព្រះសង្ឃ ដើម្បីឧទ្ទិសកុសលដល់អ្នកស្លាប់ក្នុងរបបខ្មែរ​ក្រហម​ ពិធីនៅព្រឹកមិញ ក៏មានការសម្តែង​របស់​ក្រុមយុវជន​ស្លៀក​ខោ​អាវ​ខ្មៅ ដែល​ជា​ទាហាន​​ខ្មែរក្រហម បានចាប់​ប្រជាជន​ស្លូតត្រង់ វាយ​សម្លាប់​នឹង​គល់​ឫស្សី និង​ត្បូងចប។ ឈុតឆាកនោះ បាន​ធ្វើឲ្យ​មនុស្ស​ជាច្រើន​តក់ស្លុត និង​ស្រក់​ទឹកភ្នែក​។​

របប​សាធារណរដ្ឋ​ប្រជាមានិត​កម្ពុជា ដែល​ដឹកនាំ​ដោយ​គណបក្ស​ប្រជាជន​កម្ពុជា បាន​សម្រេច​​កាលពី​ឆ្នាំ​១៩៨៣ ដោយ​យក​ថ្ងៃ​២០​ឧសភា ជា “​ទិវា​ចងកំហឹង​” ចំពោះ​បន​ប្រល័យ​ពូជ សាសន៍ ប៉ុល ពត​។

ថ្ងៃ​២០​ឧសភា ត្រូវបានរដ្ឋាភិបាល ដឹកនាំដោយគណបក្សប្រជាជនកម្ពុជា ប្រារព្ធ​ពិធី​ជារៀង​រាល់​ឆ្នាំ នៅជើងឯក ដែលជាកន្លែងសម្លាប់មនុស្ស ក្នុងសម័យខ្មែរក្រហម។
ថ្ងៃ២០ឧសភា ឆ្នាំ១៩៧៦ ជា​ថ្ងៃ​ដែល​សម័យ​ខ្មែរក្រហម បាន​ចាប់ផ្តើម​អនុវត្ត​គោលការណ៍​ប្រល័យ​ពូជសាសន៍ ឈាន​ដល់​ការសម្លាប់​មនុស្ស​យ៉ាង​ចំហ និង​យ៉ាង​ឃោរឃៅ ព្រៃផ្សៃ ចំពោះ​​ប្រជាជន​កម្ពុជា​ទូទាំង​ប្រទេស​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI