រុស្ស៊ី

ខួប​គំរប់​ ៥៥​ឆ្នាំ​នៃ​ទំនាក់​ទំនង​ការទូត​រវាង​រុស្ស៊ី​និង​កម្ពុជា

ខួប​គំរប់​ ៥៥​ឆ្នាំ នៃ ទំនាក់ទំនង ការទូត​រវាង​រុស្សី និង​កម្ពុជា។
ខួប​គំរប់​ ៥៥​ឆ្នាំ នៃ ទំនាក់ទំនង ការទូត​រវាង​រុស្សី និង​កម្ពុជា។ © រូបថត​រក្សាសិទ្ធិ

គឺថ្ងៃ១៣ឧសភាឆ្នាំ១៩៥៦ ដែលរាជាណាចក្រកម្ពុជា និង សហភាពសូវៀត បាន តាំង​ទំនាក់​ទំនង​​​ការទូតនឹងគ្នា។ ដោយហេតុថា​ ក្នុង​អំឡុង​៥៥​ឆ្នាំ​កន្លង​ទៅ ​ប្រទេស​ទាំង​ពីរ​ សុទ្ធ​តែបាន​បោក​កញ្ជ្រោក ទៅដោយព្រឹត្តិការណ៍ មានលក្ខណៈជារបត់ គួររំលឹកខ្លះៗ អំពី ដំណើរ​វិវឌ្ឍន៍​ទៅ នៃទំនាក់ទំនងនេះ។

ផ្សាយពាណិជ្ជកម្ម

 

ព្រឹត្តិការណ៍ជារបត់នេះ ​ដូចគេដឹងស្រាប់ គឺថា ៖
-កម្ពុជា បានឆ្លងកាត់របបសាធារណរដ្ឋ ពីឆ្នាំ១៩៧០ ដល់១៩៧៥ បន្ទាប់មក បានធ្លាក់ទៅ នៅក្រោមការគ្រប់គ្រងនៃ របបខ្មែរក្រហម ពីឆ្នាំ១៩៧៥ដល់ដើមឆ្នាំ១៩៧៩ ជា​ចន្លោះ​ពេល​ដែល​ ញ៉ាំងសហភាពសូវៀតឲ្យបង្ខំចិត្ត ព្យួរទុកទៅ នូវ ទំនាក់ទំនងទ្វេភាគីរុស្ស៊ី-កម្ពុជា។

-ចំណែក សហភាពសូវៀតវិញ ក្រោមចំហាយនៃយុគ”សង្គ្រាមត្រជាក់” បានរលំរលាយទៅ នៅ ឆ្នាំ១៩៩១ លុះទាល់តែមានលេចចេញមក ជារដ្ឋរុស្ស៊ីសម័យថ្មី ក្រោមឈ្មោះថា សហព័ន្ធ​រុស្ស៊ី ដែលត្រូវ អ.ស.ប.ទទួលស្គាល់ ថាជាប្រទេស បន្តកេរពីសហភាពនេះ។

គឺនៅខែធ្នូឆ្នាំ១៩៩១នោះតែម្តង ដែលសហព៍ន្ធរុស្ស៊ីនេះ បានត្រូវប្រកាសទទួលស្គាល់ ដោយ​ប្រមុខ​រដ្ឋកម្ពុជា ព្រះបាទនរោត្តមសីហនុ។

ក្នុងផ្ទៃនៃការប្រែប្រួលដែលបានកើតមាន គេអាចបែងចែក ទំនាក់ទំនងទ្វេភាគី ជា​ដំណាក់កាល​ ដូចតទៅ ៖
-ដំណាក់ទី១ ពីឆ្នាំ១៩៥៦ ដល់ ១៩៧០ ឯកអគ្គរាជទូត ដែលតំណាងឲ្យ រាជាណាចក្រកម្ពុជា ប្រចាំ​ នៅសហភាពសូវៀត មានឈ្មោះជាបន្តបន្ទាប់ថា ៖ លោក ឡេង ង៉ែត ,លោកញ៉ឹក ជូឡុង, លោកហ៊ុយ កន្ធុល, លោក ជា សាន។

-ដំណាក់ទី២ ពីឆ្នាំ​១៩៧០ដល់១៩៧៥ សម័យរបបលន់នល់ កាលដែលសហភាពសូវៀត នៅ​រក្សាទុកស្ថានទូតខ្លួន ឲ្យដំណើរការនៅក្រុងភ្នំពេញដដែល ប៉ុន្តែនៅម៉ូស្គូវិញ បាន​ដំណើរ​កា​រ គឺ​ ស្ថានទូតខ្មែរដល់ទៅ២ ៖ មួយ គឺ ស្ថានទូតចាស់ នៃរាជាណាចក្រកម្ពុជា ដែលបាន​ប្រែ​ក្លាយ ​ទៅជា ស្ថានទូត របស់ ”រាជរដ្ឋាភិបាលបង្រួបបង្រួមជាតិកម្ពុជា” ដឹកនាំដោយសម្តេច នរោត្តមសីហនុ ដែលកាលណោះមាន ទីស្នាក់ការនៅ ឯក្រុងប៉េកាំង សម្រាប់ធ្វើការតស៊ូ ទល់នឹងរបបលន់នល់ របបដែលបានទម្លាក់ព្រះអង្គពីអំណាច​ នៅថ្ងៃ១៨មីនាឆ្នាំ១៩៧០។

 
មួយទៀត គឺ ស្ថានតំណាង ឲ្យរបបលន់នល់ដែលដឹកនាំដោយលោក ចន្ទសូរី ជាភារធារីស្តីទី នៃរបបក្រុងភ្នំពេញ សម័យនោះ។

-ដំណាក់ទី៣ គឺរាប់ពីឆ្នាំ១៩៧៩មក ក្រោយពីប្រទេសកម្ពុជា រំដោះរួច ពីរបបខ្មែរក្រហម លុះ រហូត មកទល់បច្ចុប្បន្នកាល ដោយមានរូបឯកអគ្គរដ្ឋទូត បន្ទាប់មកជាឯក អគ្គរាជទូតខ្មែរ ប្រចាំ​នៅ ក្រុងម៉ូស្គូដូចតទៅ ៖ គឺលោក កែវ ប្រាសាទ, លោកមាស សំណាង, លោកហោ ណាំហុង, លោកស្រី ទី បូរ៉ាស៊ី, លោកសេក សេដ្ឋា, លោក រស់ គង់. លោកជុំ សុន្ធរី, លោក ខៀវ ថវិកា និង បច្ចុប្បន្ន គឺលោក ថៃ វណ្ណា។ 

ក្នុង៥៥ឆ្នាំកន្លងទៅ ទំនាក់ទំនងកម្ពុជា-រុស្ស៊ី បានរីកផុសផុល លើវិស័យជាច្រើន
រួច នាប៉ុន្មានឆ្នាំចុងក្រោយ ខ្លាំងមែនទេន គឺវិស័យទេសចរណ៍ ដោយមានទេសចររុស្ស៊ី ទៅទស្សនា ប្រទេសកម្ពុជា កាន់តែច្រើនឡើងៗ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI