ទស្សនៈព្រឹត្តិការណ៍ខ្មែរ

៧មករា គួរ​ក្លាយ​ជា​បទពិសោធន៍​នយោបាយ​នៅ​កម្ពុជា !

សំឡេង ០៤:២៧
៧មករា គួរ​ក្លាយ​ជា​បទពិសោធន៍​នយោបាយ​នៅ​កម្ពុជា
៧មករា គួរ​ក្លាយ​ជា​បទពិសោធន៍​នយោបាយ​នៅ​កម្ពុជា ©ចាន់ណា

៧មករា​១៩៧៩​ -៧មករា ​២០១១ ​គឺជា​ខួប​ទី៣៣​ឆ្នាំ​នៃ​ការ​ដួល​រលំ​របប​ខ្មែរក្រហម។ ​៣៣​ឆ្នាំ ​បាន​ កន្លង​ផុត​ទៅ ​ថ្ងៃ​៧មករា​នៅតែ​ជា​អត្ថន័យ​នយោបាយ​ដ៏​សំខាន់​សម្រាប់​គណបក្ស​កាន់​អំណាច​នៅ​កម្ពុជា។​ គណបក្ស​ប្រជាជន​កម្ពុជា​បាន​លើក​សរសើ​រគុណសម្បត្តិ​ថ្ងៃ​ប្រវត្តិសាស្ត្រ​មួយ​នេះ​ដែល​បាន​រំដោះ​ប្រជាពលរដ្ឋ​ខ្មែរ​ទាំងអស់​ឲ្យ​រួច​ផុត​ពី​សេចក្តី​ស្លាប់។ ​ប៉ុន្តែ ​ក្រុម​ប្រឆាំង​ថ្ងៃ​៧មករា​នៅ​តែ​ចាត់ទុក​៧​មករា​ជា​ថ្ងៃ​ឈ្លានពាន​របស់​កងទ័ព​វៀតណាម។ ​តើ​រយៈពេល​៣៣​ឆ្នាំ​កន្លង​ទៅ​ជម្លោះ​នយោបាយ​ជុំវិញ​ថ្ងៃ​៧មករា​បាន​ទទួល​ផល​អ្វី​ខ្លះ? ​តើ​គេ​គួរ​ដក​បទពិសោធន៍​អ្វីខ្លះ​ពី​ថ្ងៃ​៧មករា ?

ផ្សាយពាណិជ្ជកម្ម

៣៣​ឆ្នាំ​កន្លង​ផុត​ទៅ ​ថ្ងៃ​ជ័យជម្នះលើ​របប​ខ្មែរក្រហម​ ៧​មករា​១៩៧៩ ​នៅតែ​ជា​ជម្លោះ​គ្មាន​ទីបញ្ចប់​ក្នុង​ចំណោម​អ្នក​នយោបាយ​ខ្មែរ។ ​បុព្វហេតុ​នៃ​ជម្លោះ​នៅ​តែ​ដដែល​គ្មាន​ប្រែប្រួល​ ថ្វី​បើ​ចលនា​បាតុកម្ម​ប្រឆាំង​៧មករា​ដោយ​ចេញ​មុខ​បាន​ស្ងប់ស្ងាត់​អស់​ជាច្រើន​ឆ្នាំ​ហើយ​ក៏ដោយ។​ គណបក្ស​ប្រជាជន​កម្ពុជា​ដែល​កំពុង​កាន់អំណាច​បាន​ប្រារព្ធ​ខួប​៣៣​ឆ្នាំ​នៃ​ថ្ងៃ​៧​មករា​នៅ​ទូទាំង​ប្រទេស​ ក្នុង​អត្ថន័យ​ថា​ «បើ​គ្មាន​ថ្ងៃ​៧​មករា​ទេ ​ក៏​គ្មាន​អ្វីៗ​ដូច​សព្វ​ថ្ងៃ​នេះ​ដែរ ​រាប់ទាំង​ជីវិត​មនុស្ស​ និង​ សមិទ្ធផល​ទាំងឡាយ​ដែល​យើង​កំពុង​មាន»។ ​នេះ​ជា​សច្ចធម៌​ប្រវត្តិសាស្ត្រ​សម្រាប់​គណបក្ស​ប្រជាជន​កម្ពុជា​ និង​ពលរដ្ឋ​ខ្មែរ​ជាទូទៅ។ ​សច្ចធម៌​នេះ​ងាយ​នឹង​យល់​ណាស់​សម្រាប់​អ្នក​ដែល​បាន​ហែល​ឆ្លង​កាត់​របប​ខ្មែរក្រហម។

 
គឺ​ក្នុង​ន័យ​នេះ​ហើយ​ដែល​គណបក្ស​កាន់អំណាច​បាន​ពង្រីក​អត្ថន័យ​ថ្ងៃ​៧មករា​ឲ្យ​ហួស​ពី​គុណ​សម្បត្តិ​ផ្តាច់​មុខ​របស់​ខ្លួន​ឲ្យ​ទៅ​ជា​របស់​រួម​សម្រាប់​ប្រជាជន​ខ្មែរ​ទាំងមូល។ ​សម្រាប់​គណបក្ស​ប្រជាជន​កម្ពុជា​ មាន​តែ​របប​ប្រល័យ​ពូជសាសន៍​ ប៉ុល ពត​ ប៉ុណ្ណោះ​ដែល​ជា​សត្រូវ​របស់​ថ្ងៃ៧​មករា ​ពោលគឺ ​អ្នក​ប្រឆាំង​ថ្ងៃ​៧មករា​គឺ​ជាពួក​ខ្មែរក្រហម។​ ជាញឹកញាប់ ​លោក​នាយក​រដ្ឋមន្ត្រី​ ហ៊ុន សែន​ បា​នហៅ​ក្រុមប្រឆាំង​ថា​ ពួកគេ​ធ្វើ​ជា​ភ្លេច​គុណ​ថ្ងៃ​៧​មករា​ ដោយសារ​តែ​ហេតុផល​នយោបាយ​បើ​ទោះបី​ជា​ពួកគេ​បាន​រួច​ជីវិត​ដោយសារ​តែ​ថ្ងៃ​៧មករា​ក៏ដោយ។ ​ទាំងអស់​នេះ​គឺ​ជា​អ្វី​ដែល​គេ​បាន​លឺ​ជាង​៣០​ឆ្នាំ​មក​ហើយ។

ប៉ុន្តែ ​សច្ចធម៌​ប្រវត្តិសាស្ត្រ​របស់​ក្រុម​អ្នកនយោបាយ​ប្រឆាំង​វិញ​ គឺ​ថ្ងៃ៧​មករា​ជា​ថ្ងៃ​ដែល​វៀតណាម​បាន​ចូល​មក​លុក​លុយ​ប្រទេស​កម្ពុជា​ដោយ​លើក​បន្តុប​ក្រុម​មេដឹកនាំ​គណបក្ស​ប្រជាជន​កម្ពុជា​ដែល​កំពុង​កាន់​អំណាច​សព្វថ្ងៃ។​ ទឡ្ហីករណ៍​របស់​ពួកគេ​គឺ​ ក្រោយ​ការ​ផ្តួល​រំលំ​របប​ខ្មែរក្រហម​រួច​ហើយ​ កងទ័ព​វៀតណាម​មិន​បាន​ដក​ចេញ​ពី​កម្ពុជា​ទេ ​តែ​បន្ត​ស្ថិត​នៅ​និង​កាន់​កាប់​ប្រទេស​នេះ​រហូត​ដល់​១០​ឆ្នាំ ​ដែល​គេ​ចាត់​ទុក​ថា​ជា​ការ​ធ្វើ​អាណានិគម​មក​លើ​ប្រទេស​កម្ពុជា ​បើ​ទោះបី​ជា​ វត្តមាន​យូរ​អង្វែង​របស់​កងទ័ព​វៀតណាម​ត្រូវ​បាន​គណបក្ស​ប្រជាជន​កម្ពុជា​បក​ស្រាយ​ថា​ ជាការ​ចាំបាច់​ដើម្បី​ទប់ស្កាត់​ការ​វិល​មក​វិញ​របស់​ខ្មែរក្រហម​ក៏ដោយ។

ជម្លោះ​នេះ​បាន​ស្តែង​ឲ្យ​ឃើញ​ថា​ ភាគី​ជម្លោះ​ម្ខាង​បាន​ព្យាយាម​លើក​តែ​គុណសម្បត្តិ ​ដោយ​បំភ្លេច​គុណវិបត្តិ​ រីឯ​ភាគី​ម្ខាងទៀត​បាន​លើក​តែ​គុណវិបត្តិ​ ហើយ​បំភ្លេច​គុណសម្បត្តិ​ទាំងស្រុង​របស់​ថ្ងៃ​៧មករា។ ​ទឡ្ហីករណ៍​ទាំង​នេះ​មិន​ឆ្លុះ​បញ្ចាំង​ពី​ទស្សនៈ​គ្រប់​ជ្រុងជ្រោយ​នោះ​ឡើយ។ សម្រាប់​ក្រុម​អ្នកវិភាគ​ស្ថានការណ៍​នយោបាយ​ប្រទេស​កម្ពុជា ​ជំនួស​ឲ្យ​ការ​បន្ត​ជម្លោះ​បែក​បាក់​គ្នា ​ជនជាតិ​ខ្មែរ​គ្រប់​និន្នាការ​ ជាពិសេស​អ្នកនយោបាយ​តែម្តង ​គួរ​នាំគ្នា​សិក្សា​ពី​សច្ចធម៌​ប្រវត្តិសាស្ត្រ​ពិតប្រាកដ​មួយ​អំពី​ថ្ងៃ៧មករា ​ដោយ​ឈរ​លើ​ទស្សនៈ​គ្រប់​ជ្រុងជ្រោយ។ ការ​ស្វែង​រក​ឲ្យ​ឃើញ​គុណសម្បត្តិ ​និង​គុណវិបត្តិ​របស់​ថ្ងៃ​៧មករា គឺ​ដើម្បី​ទាញ​យក​ បទពិសោធន៍​នយោបាយ​សម្រាប់​តម្រង់​ទិស​ប្រទេស​ជាតិ​ទៅ​ថ្ងៃ​អនាគត។

តាមពិត ​៧មករា​១៩៧៩​ គ្រាន់តែ​ជា​របត់​នយោបាយ​មួយ​ប៉ុណ្ណោះ ​ប៉ុន្តែ ​ឫសគល់​ពិតប្រាដក​របស់​វា​គឺ​របប​ខ្មែរក្រហម​ឯណោះ​ទេ។ ​តើ​ហេតុអ្វី​បាន​ជា​មាន​របប​ខ្មែរក្រហម?​ តើ​ហេតុអ្វី​បាន​ជា​របប​នេះ​កាប់​សម្លាប់​ប្រជាពលរដ្ឋ​ខ្លួន​ឯង? ​នេះ​ទើប​ជា​សំណួរ​សំខាន់​ និង​មាន​ប្រយោជន៍​ដែល​ត្រូវ​ពិចារណា​រក​ហេតុផល ​និង​ដក​បទពិសោធន៍។​ ការ​ព្យាយាម​បង្កើត​ជម្លោះ​គ្រាន់តែ​ដើម្បី​ផលប្រយោជន៍​នយោបាយ​មិន​ផ្តល់​ផល​ល្អ​សម្រាប់​ប្រទេស​ជាតិ​ឡើយ​ទោះ​បី​ជា​គេ​ត្រូវ​បន្ត​ជម្លោះ​នេះ​១០០​ឆ្នាំ​ទៀត​ក៏​ដោយ។ ​សម្រាប់​ប្រទេស​កម្ពុជា ​បទពិសោធន៍​អតីតកាល​គឺ​ជា​កញ្ចក់​ឆ្លុះ​បញ្ចាំង​យ៉ាង​ច្បាស់​សម្រាប់​បច្ចុប្បន្ន​ និង​អនាគត។

បទពិសោធន៍​ដែល​ល្អ​ជាង​គេ​គឺ ​ការ​បង្ក​ជម្លោះ​ផ្ទៃក្នុង​រវាង​ខ្មែរ​និង​ខ្មែរ​គ្នា​ឯង​រហូត​ដល់​ប្រទេស​ជាតិ​ធ្លាក់​ក្នុង​ក្តី​វិនាស​អន្តរាយ​ ដែល​ទាមទារ​ឲ្យ​មាន​អន្តរាគមន៍​ពី​បរទេស។ ​នេះ​ជា​សច្ចធម៌​ប្រវត្តិសាស្ត្រ​មួយ​របស់​កម្ពុជា​ដែល​អ្នក​នយោបាយ​គួរ​នាំគ្នា​សិក្សា ​និង​យក​ជា​មេរៀន​ដើម្បី​កុំ​ឲ្យ​ប្រវត្តិសាស្ត្រ​ច្រំដែល៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI