កម្ពុជា

គ្រោះថ្នាក់​ចរាចរណ៍​នៅ​កម្ពុជា​ ៥​ ខែ​​នេះ​ កើន​ឡើង​គួរ​ឲ្យ​ព្រួយបារម្ភ

គ្រោះថ្នាក់​ចរាចរណ៍​នៅ​កម្ពុជា​ ៥​ ខែ​នេះ ​កើន​ឡើង​គួរ​ឲ្យ​ព្រួយបារម្ភ
គ្រោះថ្នាក់​ចរាចរណ៍​នៅ​កម្ពុជា​ ៥​ ខែ​នេះ ​កើន​ឡើង​គួរ​ឲ្យ​ព្រួយបារម្ភ RFI/Siv Channa

រយៈពេល ៥ ខែ ក្នុង​ឆ្នាំ​២០១១​នេះ មាន​គ្រោះថ្នាក់​ចរាចរណ៍​សរុប​ទូទាំង​ប្រទេស ចំនួន ២០០១ ករណី ដែល​បាន​បណ្តាល​ឲ្យ​មាន​មនុស្ស​ស្លាប់ ៨០១ នាក់។ អត្រា​គ្រោះថ្នាក់​ចរាចរណ៍​នៅ​កម្ពុជា បាន​កើន​ឡើង​ខ្ពស់ ដែល​នាំ​ឲ្យ​មន្ត្រី​ជំនាញ បង្ហាញ​ការ​ព្រួយបារម្ភ​យ៉ាង​ខ្លាំង។ យុទ្ធនាការ​អប់រំ​សាធារណៈ ស្តីពី សុវត្ថិភាព​ចរាចរណ៍ ក៏​ត្រូវ​បាន​ធ្វើ​ឡើង ដើម្បី​ទប់​ស្កាត់ និង​កាត់បន្ថយ​គ្រោះថ្នាក់​ចរាចរណ៍ តាម​រយៈ​ការ​គោរព​ច្បាប់ ដោយ​ពាក់​មួក​សុវត្ថិភាព ពាក់​ខ្សែក្រវាត់​សុវត្ថិភាព មិន​បើកបរ​ហួសល្បឿន​កំណត់ និង​មិន​បើកបរ​ក្រោយ​ពេល​​ពិសា​ជាតិ​​ស្រវឹង ជា​ដើម។

ផ្សាយពាណិជ្ជកម្ម

យុទ្ធនាការ​អប់រំ​សាធារណៈ ស្តីពី សុវត្ថិភាព​ចរាចរណ៍ ត្រូវ​បាន​រៀបចំ​ឡើង​ដោយ​គណៈកម្មាធិកា​រ​ជាតិ​សុវត្ថិភាព​ចរាចរណ៍​ផ្លូវគោក អង្គការ​ដៃ​គូ​ដើម្បី​សុវត្ថិភាព​ចរាចរណ៍​សកល អង្គការ​សុខភាព​ពិភពលោក និង​អង្គការ​ជនពិការ​អន្តរជាតិ បែលហ្សិក។ សិក្ខាសាលា​រយៈ​ពេល​ពីរ​ថ្ងៃ ដែល​បាន​ចាប់​ផ្តើម​នៅ​ថ្ងៃ​៧​មិថុនា នៅ​សណ្ឋាគារ Himawary ក្នុង​ទីក្រុង​ភ្នំពេញ បាន​ផ្ញើសារ​​ដល់​អ្នក​ប្រើប្រាស់​ផ្លូវ​គ្រប់រូប ឲ្យ​ទទួល​បាន​ព័ត៌មាន​តាម​រយៈ​ការ​ផ្សព្វ​ផ្សាយ​ និង​ចូលរួម​ក្នុង​ការ​ទប់ស្កាត់ កាត់​បន្ថយ​គ្រោះថ្នាក់​ចរាចរណ៍ តាម​រយៈ​ការ​គោរព​ច្បាប់ ដោយ​ពាក់​មួក​សុវត្ថិភាព ពាក់​ខ្សែក្រវាត់​សុវត្ថិភាព មិន​បើកបរ​ហួស​ល្បឿន​កំណត់ និង​មិន​បើកបរ​ក្រោយ​ពេល​ពិសា​ជាតិ​ស្រវឹង​ជាដើម។

លោក ពៅ ម៉ាលី អគ្គនាយក​រង នៃ​អគ្គនាយកដ្ឋាន​ដឹក​ជញ្ជូន និង​ជា​តំណាង​គណៈកម្មាធិការ​ជាតិ​សុវត្ថិភាព​ចរាចរណ៍​ផ្លូវ​គោក បាន​លើក​ឡើង​ថា គ្រោះថ្នាក់​ចរាចរណ៍​រយៈ​ពេល ៥ ខែ ក្នុង​ឆ្នាំ​២០១១​នេះ បាន​កើន​ឡើង​ខ្ពស់​គួរ​ឲ្យ​ព្រួយបារម្ភ។ នោះ​គឺនៅ​ទូទាំង​ប្រទេស មាន​គ្រោះថ្នាក់​​ចំនួន ២០០១ ករណី ដោយ​បាន​សម្លាប់​ជីវិត​មនុស្ស ៨០១ នាក់។ ចំណែក​គ្រោះថ្នាក់​ចរាចរណ៍​ទូទាំង​ប្រទេស កាលពី​ឆ្នាំ​២០១០ មាន​ជិត ៥០០០ ករណី និង​បាន​សម្លាប់​ជីវិត​មនុស្ស ១៨១៦ នាក់។

តំណាង​រដ្ឋាភិបាល​រូបនេះ បាន​បន្ថែម​ថា មូលហេតុ​ចម្បង ដែល​នាំ​ឲ្យ​កើត​មាន​គ្រោះថ្នាក់​ចរាចរណ៍ គឺ​បណ្តាល​មក​ពី​កត្តា​មនុស្ស តាម​រយៈ​ការ​បើកបរ​ហួស​ល្បឿន​កំណត់ ការ​បើកបរ​ក្រោយ​ពេល​ពិសាជាតិ​ស្រវឹង និង​ការ​វ៉ា​ជែង​ក្នុង​ស្ថានភាព​គ្រោះថ្នាក់ ជាដើម។

តាម​របាយការណ៍ នៅ​កម្ពុជា អ្នក​ប្រើ​ប្រាស់​ម៉ូតូ យុវជន​វ័យ​ក្មេងៗ និង​អ្នក​ថ្មើរជើង គឺ​ជា​អ្នក​ប្រឈម​នឹង​គ្រោះថ្នាក់​ចរាចរណ៍​ច្រើន​ជាង​គេ។ គ្រោះថ្នាក់​ចរាចរណ៍ បាន​ប៉ះពាល់​ដ៏​ធ្ងន់ធ្ងរ​ចំពោះ​សេដ្ឋកិច្ច​គ្រួសារ និង​សេដ្ឋកិច្ច​ជាតិ។ ពោល​គឺ គ្រោះថ្នាក់​ចរាចរណ៍ កាលពី​ឆ្នាំ​២០១០ បាន​ធ្វើ​ឲ្យ​កម្ពុជា​ខាតបង់​ដល់​ទៅ ២៧៩ លាន​ដុល្លារ​អាមេរិក៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI