អានតួអត្ថបទ
កម្ពុជា

អាដហុក​​ព្រួយបារម្ភ​​ចំពោះ​​ការ​​ប្រឈម​​របស់​​ពលករ​​ចំណាកស្រុក​​

បញ្ហា​ប្រឈម​គួរ​អោយ​សម្គាល់ នៅ​ដើមឆ្នាំ​២០១៣ ​​មាន​ដូចជា ការបង្ខំ​ឲ្យពលករ​​បន្ត​កិច្ចសន្យាការងារ ការ​វាយដំពលករ​ បង្អត់អាហារ គ្មាន​ពេល​សំរាក ខ្វះ​ការ​យកចិត្តទុកដាក់​លើ​សុខភាព ជា​ដើម
បញ្ហា​ប្រឈម​គួរ​អោយ​សម្គាល់ នៅ​ដើមឆ្នាំ​២០១៣ ​​មាន​ដូចជា ការបង្ខំ​ឲ្យពលករ​​បន្ត​កិច្ចសន្យាការងារ ការ​វាយដំពលករ​ បង្អត់អាហារ គ្មាន​ពេល​សំរាក ខ្វះ​ការ​យកចិត្តទុកដាក់​លើ​សុខភាព ជា​ដើម RFI/Ly Menghour
ដោយ៖ លី ម៉េងហួរ
២០ នាទី

សមាគម​ការពារ​សិទ្ធិមនុស្ស អាដហុក បាន​បង្ហាញ​ការ​ព្រួយបារម្ភ​យ៉ាងខ្លាំង ចំពោះ​ការ​ប្រឈម​របស់​ពលករ​ចំណាកស្រុក ការរំលោភ​សិទ្ធិ​ការងារ និង​បញ្ហា​ជួញដូរ​មនុស្ស ដែល​នៅតែ​បន្ត​កើតមាន ជាពិសេស​នៅក្នុង​កំឡុង​​ត្រីមាស​ទី​១ ក្នុង​រយៈពេល ៣ ខែ ដើមឆ្នាំ​២០១៣។ រយៈពេល​៣​ខែ គិត​ចាប់ពី​ខែ​មករា អាដហុក​បាន​ទទួល​ពាក្យបណ្តឹង និង​អន្តរាគមន៍ ពាក់ព័ន្ធ​នឹង​ករណី​ជួញដូរ​មនុស្ស និង​ការរំលោភ​សិទ្ធិ​ពលករ​ចំណាកស្រុក ប្រមាណ ៥៥ ករណី ដែល​បាន​ប៉ះពាល់​ដល់​ជនរងគ្រោះ ចំនួន ១២១ នាក់។

ផ្សាយពាណិជ្ជកម្ម

គឺ​នៅ​ព្រឹក​ថ្ងៃ​ព្រហស្បតិ៍​នេះ​តែម្តង ដែល​សមាគម​សិទ្ធិមនុស្ស អាដហុក បាន​បង្ហាញ​ការ​ព្រួយបារម្ភ តាមរយៈ​សេចក្តីថ្លែងការណ៍ និង​ការ​ថ្លែង​ផ្ទាល់មាត់ នៅក្នុង​សន្និសីទ​កាសែត នៅ​ទីស្នាក់ការ ក្នុង​ទីក្រុង​ភ្នំពេញ។​

បុរស​ពលករ ១១ នាក់ ក្នុង​ចំណោម ២៣ នាក់ ដែល​ត្រូវបាន​ជួយសង្គ្រោះ ពី​ប្រទេស​ម៉ូរីស ក៏​ត្រូវបាន​នាំ​មក​បង្ហាញ ក្នុង​សន្និសីទកាសែត​។ ពលករ​កម្ពុជា​ទាំង ២៣ នាក់ បាន​ឆ្លង​ដែន​ខុសច្បាប់ ចូល​ទៅ​ធ្វើការ​នៅ​លើ​ទូក​នេសាទ ចេញពី​ប្រទេស​ថៃ ទៅកាន់​ប្រទេស​ម៉ូ​រី​ស អស់​រយៈពេល ២ ឆ្នាំ​កន្លះ ដោយ​មិន​ទទួលបាន​ប្រាក់ខែ មុន​នឹង​ពួកគេ ត្រូវ​ចាប់​ឃុំខ្លួន រយៈពេល ៧ ខែ នៅ​ប្រទេស​ម៉ូរីស។​

ពលរដ្ឋ​ខ្មែរ ២៣ នាក់ ដែល​មាន​ស្រុកកំណើត​នៅ​ខេត្ត​ឧត្តរមានជ័យ រងគ្រោះ​ដោយ​ការជួញដូរ​មនុស្ស តាមរយៈ​ការ​ឆ្លងដែន ទៅ​រក​ការងារ​ធ្វើ​ដោយ​ខុសច្បាប់ នៅ​ប្រទេស​ថៃ ហើយ​ត្រូវបាន​ជួយ​សង្គ្រោះ​នៅ​ប្រទេស​ម៉ូរីស (Mauristius)។ បុរស​ពលករ ១១ នាក់ បាន​មកដល់​កម្ពុជា កាលពី​ថ្ងៃ​ទី​៩​មេសា ហើយ ១១ នាក់ ផ្សេងទៀត បាន​មក​ដល់​ភ្នំពេញ កាលពី​ព្រឹក​ថ្ងៃ​១១​មេសា​នេះ​។ រីឯ​ពលករ​ម្នាក់ទៀត បាន​បាត់​ខ្លួន។​

ពលរដ្ឋ​ខ្មែរ​រងគ្រោះ​ទាំង ២៣ នាក់​នោះ ត្រូវបាន​មេខ្យល់​បោក​បញ្ឆោត នាំយក​ទៅ​ធ្វើ​ការខុសច្បាប់ នៅ​លើ​ទូក​នេសាទ​ថៃ ហើយ​ត្រូវបាន​ជួយសង្គ្រោះ នៅពេល​ទូក​នេសាទ​ថៃ ចូល​នេសាទ​ខុសច្បាប់ ក្នុង​ដែនទឹក​ប្រទេស​ម៉ូរីស។​

ក្នុង​សន្និសីទកាសែត នៅ​ព្រឹក​មិញ លោក ធន សារាយ ប្រធាន​អង្គការ​អាដហុក បានលើកឡើង​ពី​បញ្ហា​ប្រឈម​គួរឲ្យកត់សម្គាល់ នៅ​ដើមឆ្នាំ​២០១៣ ដែល​មាន​ដូចជា ការបាត់​ដំណឹង​រវាង​ក្រុមគ្រួសារ និង​ពលករ ការបង្ខំ​ឲ្យ​បន្ត​កិច្ចសន្យាការងារ ការរំលោភ​សិទ្ធិ​មូលដ្ឋាន​របស់​មនុស្ស (វាយដំ បង្អត់អាហារ គ្មាន​ពេល​សំរាក ខ្វះ​ការ​យកចិត្តទុកដាក់​លើ​សុខភាព) ការរំលោភ​សិទ្ធិ​ការងារ ដូចជា ប្រាក់ខែ​មិន​ទទួល​បាន​គ្រប់​ចំនួន ឬ​មិន​បើក​ប្រាក់ខែ​ដោយ​បង្ខំ​ឲ្យ​បន្ត​ការងារ ការ​ដកហូត​លិខិតឆ្លងដែន បណ្តាល​ឲ្យ​ប៉ូលិស​ចាប់​ដាក់គុក និង​ការបង្ខំ​ឲ្យ​បម្រើ​ផ្លូវភេទ (ករណី​ជួញដូរ​ភេទ) ជាដើម។​

លោក ធន សារាយ ក៏​បាន​លើក​បង្ហាញ​ពី​បញ្ហា​គួរឲ្យ​ព្រួយបារម្ភ​មួយទៀត គឺ​ការ​ទ្រុឌទ្រោម​សុខភាព​យ៉ាងខ្លាំង នៅពេល​វិលត្រឡប់​មក​ដល់​ប្រទេស​កម្ពុជា​វិញ​។ ពលករ​ខ្លះ​ត្រូវ​ធ្លាក់​ខ្លួន​ពិការ ស្មារតី​ខុស​ប្រក្រតី ខណៈពេល​ដែល​ប្រាក់ខែ មិន​ត្រូវ​គេ​បាន​ផ្តល់ជូន ឬ​ផ្តល់​ជូន​មិន​គ្រប់​ចំនួន​។​

​របាយការណ៍​របស់​ក្រសួង​ការងារ និង​បណ្តុះបណ្តាល​វិជ្ជាជីវៈ បង្ហាញថា គិត​ត្រឹម​ឆ្នាំ​២០១២ ពលករ​កម្ពុជា​ចំណាកស្រុក ទៅ​ធ្វើការ​នៅ​ក្រៅប្រទេស ដោយ​ស្របច្បាប់ មាន​ចំនួន ១៣ ម៉ឺន​នាក់​។ ក្នុងនោះ ភាគច្រើន ពលករ​កម្ពុជា ចេញ​ទៅ​ធ្វើ​ការងារ​នៅ​ប្រទេស​ថៃ​។​

​ចំណែក​អង្គការ ខា​រ៉ា​ម កម្ពុជា បង្ហាញ​ថា គិត​ត្រឹម​បំណាច់​ឆ្នាំ​២០១២ ពលករ​ខ្មែរ​ដែល​ធ្វើ​ចំណាកស្រុក​ទៅ​ធ្វើការ​នៅ​ក្រៅប្រទេស ទាំង​ស្រប​ច្បាប់​ដោយ​មាន​លិខិតឆ្លងដែន​ត្រឹមត្រូវ និង​តាមរយៈ​ក្រុមហ៊ុន ព្រមទាំង​ចេញទៅ​មិនមាន​ច្បាប់ សរុប​មាន​ជិត ៥ សែន​នាក់​។ ក្នុងនោះ ពលករ​ធ្វើ​ចំណាកស្រុក​ទៅកាន់​ប្រទេស​ថៃ មាន​ចំនួន​ជាង ៤ សែន​នាក់ រាប់​ទាំង​មាន​ឯកសារ និង​មិន​មាន​ឯកសារ​ត្រឹមត្រូវ ប្រទេស​ម៉ាឡេស៊ី មាន​ចំនួន ៥ ម៉ឺន​នាក់ និង​ប្រទេស​កូរ៉េខាងត្បូង អាច​មាន​រហូត​ដល់ ២ ម៉ឺន​នាក់៕​

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ