អាមេរិក-អាហ្វហ្កានីស្ថាន

ទស្សនកិច្ច​​គួរ​​ឲ្យ​​ភ្ញាក់​ផ្អើល​​របស់​​លោក​​ Leon​ Panetta​​ នៅ​​កាប៊ូល​​

លោករដ្ឋមន្ត្រីការពារជាតិអាមេរិក​ Leon Panetta និងលោកនាយករដ្ឋមន្ត្រីឥណ្ឌា Manmohan Singh
លោករដ្ឋមន្ត្រីការពារជាតិអាមេរិក​ Leon Panetta និងលោកនាយករដ្ឋមន្ត្រីឥណ្ឌា Manmohan Singh Reuters

បន្ទាប់​ពី​​​បញ្ចប់​​​ទស្សនកិច្ច​​​នៅ​​​តំបន់​​អាស៊ី​​​ប៉ាស៊ីហ្វិក​​​ចំនួន​​​៩​​​ថ្ងៃ​​​មក​​ជា​អាទិ៍​នៅ​​សិង្ហបុរី​​​​វៀតណាម​​​និង​​ឥណ្ឌា ​រដ្ឋមន្ត្រី​​​​ការពារ​ជាតិ​អាមេរិក​លោក ​Leon Panetta​​ បាន​​ធ្វើ​​ដំណើរ​​​ទៅ​ដល់​​ទីក្រុង​​​កាប៊ូល​​​ប្រទេស​​អាហ្វហ្កានីស្ថាន​នៅ​ថ្ងៃ​ព្រហស្បតិ៍​៧​មិថុនា​នេះ។​​ជា​ដំណើរ​​ទស្សនកិច្ច​​មួយ​​គួរ​ឲ្យ​ភ្ញាក់​ផ្អើល មួយ​​ថ្ងៃ​​បន្ទាប់​​ពី​​អាហ្វហ្កានីស្ថាន​បាន​ទទួល​​រង​​អំពើ​​ភេរវកម្ម​​អត្តឃាត​​ពីរ​​លើក​​​​និង​​​ការ​​វាយ​ប្រហារ​​ដ៏​​កាច​​សាហាវ​​មួយ​​​បណ្តាល​​ឲ្យ​​ស្លាប់​​​ជន​​ស៊ីវិល​អាហ្វហ្កានីស្ថាន​​អស់​​ជា​​ចើ្រន​​នាក់​​ដែល​​អង្គការ​​អូតង់​ត្រូវ​ជាប់​ចោទ​​​ថា​ជា​​អ្នក​​ទទួល​​ខុស​ត្រូវ។

ផ្សាយពាណិជ្ជកម្ម

 ទស្សនកិច្ច​​របស់​លោក Leon Panetta រដ្ឋមន្ត្រី​ការពារ​ជាតិ​អាមេរិកនៅ​អាហ្វហ្កានីស្ថាន​នៅ​ថ្ងៃ​នេះ​​ ​​​បាន​ប្រព្រឹត្ត​​ទៅ​បន្ទាប់ពី​បាន​បញ្ចប់​ដំណើរ​​ទស្សនកិច្ច​របស់​លោក​​ជាង​មួយ​សប្តាហ៍​​នៅ​តំបន់​អាស៊ីប៉ាស៊ីហ្វិក។  បណ្តាប្រទេស​តំបន់​អាស៊ី​ប៉ាស៊ីហ្វិក​​ដែល​​សុំ​ឲ្យ​អាមេរិក​រៀបចំ​យុទ្ធសាស្ត្រ​ខ្លួន​​​ជាថ្មី​​នៅ​ក្នុង​តំបន់​ ជាអាទិ៍​ការ​បង្កើន​កង​នាវា​​ចម្បាំង​​សំរាប់​ត្រួត​ពិនិត្យ​លើ​ការ​ជួញ​ដូរ​ខុស​​ច្បាប់​​តាម​ផ្លូវ​សមុទ្រ​និង​ទប់ទល់​​កុំ​ឲ្យ​ប្រទេស​​ចិន​​ពង្រីក​ឥទ្ធិពល​របស់​ខ្លួន​កាន់​តែ​ខ្លាំ​ង​​​នៅ​​ក្នុង​តំបន់។

 
នៅ​ពេល​ឈប់​សំចត​នៅ​ទីក្រុងញូវដែលី លោក Panetta បាន​ថ្លែង​លើក​ទឹកចិត្ត​អ្នក​ដឹកនាំ​​​ឥណ្ឌា​​ ដោយសុំ​ឲ្យ​ជ្រោមជ្រែង​​​ជួយ​ប្រទេស​អាហ្វហ្កានិស្ថាន​ថែមទៀត​ក្នុង​ការ​កសាង​​សេដ្ឋកិច្ច​ប្រទេសនេះ​​និង​​ជួយ​បង្វឹក​ហាត់​កង​កម្លាំង​សន្តិសុខ​អាហ្វហ្កានី​​ស្ថាន​ស្រប​ពេល​​ដែល​កង​ទ័ព​​ចម្រុះ​អន្តរជាតិ- ឈប់​បំពេញ​បេសកកម្ម​​នៅ​អាហ្វហ្កានីស្ថាន។​ រដ្ឋមន្រ្តីការពារអាមេរិក បាន​ស្នើ​សុំ​ផងដែរ​ឲ្យ​ឥណ្ឌា​ខិតខំ​ពង្រឹង​ទំនាក់ទំនង​ល្អប្រសើ​រ​ជាមួយ​ប៉ាគីស្ថាន ទោះបីជា​ទំនាក់​ទំនង​នេះ ​មាន​លក្ខណៈ​ស្មុគស្មាញ​ក្តីក៏ប៉ុន្តែ​វា​ជា​ការ​ចាំបាច់-នេះជាការថ្លែង​បញ្ជាក់​បន្ថែម​របស់​លោក​​Panetta។

លោកឡេអុងប៉ានេតាបានថ្លែងទៀត​ថា សហរដ្ឋអាមេរិក-​បាន​ធ្វើ​សង្គ្រាម​ប្រយុទ្ធ​​ប្រឆាំង​នឹង​បណ្តាញ​ភេរវជន​អាល់កៃដា​នៅ​​តំបន់​កុលសម្ព័ន្ធ​ភាគ​ពាយ័ព្យ​ប្រទេស​ប៉ាគីស្ថាន។ ត្រង់នេះ​ -​លោក​​រដ្ឋមន្ត្រី​ការពារជាតិ​អាមេរិក ចង់គូសបញ្ជាក់ប្រាប់ប៉ាគីស្ថានថា -យន្តហោះ Drones ​អាមេរិក នៅតែ​បន្ត​ការ​វាយប្រហារ​ទៅ​លើ​ពួក​មេ​ដឹកនាំ​នៃបណ្តាញ​​អាល់កៃដា​នៅ​ក្នុង​តំបន់​តទៅ​ទៀត​​ទោះបី​ជា​មានការស្តីបន្ទោស​ពីប៉ាគីស្ថានដែលចោទ​​ថាអាមេរិក​បាន​រំលោភ​អធិបតេយ្យ​​​របស់​ខ្លួនក្តី។

ទាក់ទង​ប្រទេស​អាហ្វហ្កនីស្ថានវិញ​លោក Panetta បាន​សង្កត់​ធ្ងន់​ពីសារៈសំខាន់​នៃ បណ្តាញ​ឧទ្ទាម Haqqani ដែល​មាន​ទីតាំង​នៅ​ប៉ែក​ខាង​លិច​ប៉ាគីស្ថាន​និង​គាំទ្រ​ពួក​តាលីបង់​​នៅ​​អាហ្វហ្កានីស្ថាន។ លោក បានព្រមានទៀតថា ទីក្រុង​វ៉ាស៊ីនតោន​នឹង​បន្ត​ដាក់​គំនាប​ទៅ​លើ​ទីក្រុង​អ៊ីស្លាម៉ាបាត​ដើម្បី​ឲ្យប៉ាគីស្ថានប្រយុទ្ធប្រឆាំង​បណ្តាញ​ឧទ្ទាម Haqqani។

នៅទីក្រុងកាប៊ូល​នៅថ្ងៃព្រហស្បតិ៍​នេះ លោករដ្ឋមន្ត្រីការពារជាតិអាមេរិក មានបំណងចង់​ស្វែង​យល់​​អំ​ពីការ​រីករាល​ដាល​​នៃ​អំពើ​ភេរវកម្ម​នៅអាហ្វហ្កានីស្ថាននេះ បន្ទាប់ពីមានអំពើ​ភេរវកម្ម​អត្តឃាតពីរលើក​ដែលបណ្តាល​ឲ្យ​មនុស្សស្លាប់ចំនួន​២៣​នាក់​និង​របួសជាង​៥០នាក់​នៅ​ថ្ងៃពុធម្សិលមិញនេះ៕​

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI