ឥណ្ឌា

ឆ្នេរភាគខាងកើត​ឥណ្ឌា​​ប្រឈម​​ព្យុះសង្ឃរា​ Phailin​

ព្យុះសង្ឃរា Phailin ​​អាច​មាន​​ល្បឿន​ខ្យល់​​បោកបក់​ដល់​​២៤០គីឡូម៉ែត្រ​ក្នុង​មួយម៉ោង នឹង​មកដល់​ឆ្នេរ​ខាងកើត​ឥណ្ឌា​ យប់ថ្ងៃ​សៅរ៍នេះហើយ។
ព្យុះសង្ឃរា Phailin ​​អាច​មាន​​ល្បឿន​ខ្យល់​​បោកបក់​ដល់​​២៤០គីឡូម៉ែត្រ​ក្នុង​មួយម៉ោង នឹង​មកដល់​ឆ្នេរ​ខាងកើត​ឥណ្ឌា​ យប់ថ្ងៃ​សៅរ៍នេះហើយ។ STRINGER/INDIA/Reuters

នៅ​យប់​​ថ្ងៃ​សៅរ៍នេះ ​ ឥណ្ឌា​កំពុង​ត្រៀម​ចាំ​ការមកដល់​នៃ​ព្យុះ​សង្ឃរា​ Phailinនៅ​​ឆ្នេរ​ភាគ​ខាងកើត​ប្រទេស​។ ​មនុស្ស​រាប់សិបម៉ឺននាក់​ត្រូវបាន​ជម្លៀស​ ទៅរក​កន្លែង​មាន​សុវត្ថិភាព។ ផ្នែក​ឧតុនិយម​ឥណ្ឌា​បាន​​ប្រកាស​សញ្ញា​អាសន្ន​ ​អោយ​ប្រជាជន​មាន​ការ​ប្រុងប្រយ័ត្ន​ខ្ពស់ ព្រោះ​ថា ព្យុះដែល​​អាច​មាន​ល្បឿន​ខ្យល់​​ដល់​២៤០គីឡូម៉ែត្រ​ក្នុង​មួយម៉ោង​​នោះ អាចនឹង​បង្ក​មហន្តរាយ​ធ្ងន់ធ្ងរ ហើយ​​ជនរងគ្រោះ​អាច​មាន​ដល់​១២លាននាក់​។

ផ្សាយពាណិជ្ជកម្ម

នៅព្រឹក​​ថ្ងៃ​សៅរ៍នេះ ​ព្យុះ​សង្ឃរា Phailin មាន​កំលាំង​ខ្យល់​បោកបក់​យ៉ាងតិច ២២០គីឡូម៉ែត្រ​ក្នុង​មួយម៉ោង។ ព្យុះនេះ​បានវាតទី​ឈូងសមុទ្រ​បង់ហ្កាល់ មួយភាគ​ធំ ហើយ​ត្រូវ​ធ្វើដំណើរ​មកដល់​ឆ្នេរ​​ភាគខាងកើត​ប្រទេស​ឥណ្ឌា នៅយប់​ថ្ងៃសៅរ៍​នេះហើយ។ កំពស់​ទឹក​​​អាច​កើនឡើង​​ខ្ពស់​៣ម៉ែត្រ នៅ​ឆ្នេរសមុទ្រ។

ភ្លៀងបាន​​ធ្លាក់​ជោគជាំ ​​ខ្យល់​បោកបក់​​ខ្លាំង ហើយ​ប្រជាជន​នៅឆ្នេរភាគខាងកើត​រាប់សែននាក់ កំពុង​ជ្រកកោន​នៅកន្លែង​មានសុវត្ថិភាព​ ដើម្បី​ចៀសផុត​ពី​មហន្តរាយ។ ​អាជ្ញាធរ​ឥណ្ឌា​ បាន​ប្រកាស​សញ្ញា​អាសន្ន​​អោយ​មានការ​ប្រុងប្រយ័ត្ន​ខ្ពស់ ព្រោះថា​កំលាំង​ខ្យល់​​​ព្យុះ​ដែលអាច​​មាន​ល្បឿន​ដល់​​ទៅ​២៤០គីឡូម៉ែត្រ​​ក្នុង​មួយម៉ោង​ អាច​​បង្ក​ការខូចខាត​ធ្ងន់ធ្ងរ។ អាជ្ញាធរ​គិតថា ប្រជាជន​ប្រហែល​១២លាននាក់​ អាច​នឹង​រងគ្រោះ​ដោយសារ​ព្យុះ​សង្ឃរា​នេះ។

ខ្យល់​បាន​បោកបក់​ផ្តួល​​ដើមឈើ​ នៅ​រដ្ឋ​អូរីសា និង​រដ្ឋ​​អាន់ដ្រា ប្រាដេស ដែល​នៅជិត​គ្នា​នោះ រួច​មកហើយ។ ព្យុះ​សង្ឃរា​ផៃលិន​ បាន​ឈានដល់​ដំណាក់កាល​ទី៥ដែល​ជា​ដំណាក់​កាល​ចុងក្រោយនៃ​​កម្រិត​Saffir-Simpson រឺ​ហៅ​ម្យ៉ាងទៀតថា កម្រិត​កំលាំង​ព្យុះ​ត្រូពិច។ ផ្នែក​ឧតុនិយម​អាមេរិក បាន​​កត់ត្រា​ល្បឿន​​ខ្យល់​រហូត​ដល់​៣១៤គីឡូម៉ែត្រ​ ក្នុង​មួយម៉ោង។

ព្យុះសង្ឈរា​ផៃលិន ធ្វើអោយ​គេ​នឹង​ដល់​ព្យុះ​សង្ឈរា​មួយទៀត​ដែរ​ កាលពី​ឆ្នាំ​១៩៩៩ នៅ​ក្នុង​តំបន់​នេះ ដែលកាលណោះ​ ព្យុះសង្ឃរា​មានល្បឿន​​ខ្យល់​រហូត​៣០០គីឡូម៉ែត្រ​ក្នុង​មួយម៉ោង ហើយ​បាន​សម្លាប់​មនុស្ស​ជាង​៨ពាន់នាក់៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI