អាមេរិក-ជប៉ុន

អាមេរិក​និង​ជប៉ុន​ចង់អោយ​សម្ព័ន្ធភាព​យោធារវាង​ប្រទេស​ទាំងពីរ​​ មាន​ភាព​ទំនើប​

ពីឆ្វេង​ទៅស្តាំ លោក Chuck Hagel, លោក Jonh Kerry, នាយករដ្ឋមន្ត្រី​ជប៉ុន អាបេ, ប្រមុខការទូត​ជប៉ុន Fumio Koshida និង​ប្រមុខការពារជាតិ​ជប៉ុន Itsunori Onodera
ពីឆ្វេង​ទៅស្តាំ លោក Chuck Hagel, លោក Jonh Kerry, នាយករដ្ឋមន្ត្រី​ជប៉ុន អាបេ, ប្រមុខការទូត​ជប៉ុន Fumio Koshida និង​ប្រមុខការពារជាតិ​ជប៉ុន Itsunori Onodera REUTERS/Koji Sasahara/Pool

នៅថ្ងៃ​ព្រហស្បតិ៍​នេះ នៅក្នុង​កិច្ច​ពិភាក្សាអាមេរិក-ជប៉ុន​ ​​ប្រមុខការពារ​ជាតិ​និង​ប្រមុខការទូត​ប្រទេស​ទាំងពីរ​ ​បាន​​បង្ហាញ​ប្រាប់​ពី​គោលបំណង​ធ្វើ​អោយ​សម្ព័ន្ធ​ភាព​យោធា​រវាង​ប្រទេស​ទាំងពីរ​ មាន​លក្ខណៈ​កាន់តែ​ទំនើបថែមទៀត។ បន្ទាប់​ពី​បាន​ទស្សនកិច្ច​ផ្លូវការ​នៅ​កូរ៉េខាងត្បូង​មក ប្រមុខការពារ​ជាតិ​អាមេរិក​ ឆាក់ ហាហ្កែល បាន​បន្ត​ដំណើរ​​ទស្សនកិច្ច​មក​ក្រុងតូក្យូ ប្រទេស​​ជប៉ុន នៅថ្ងៃ​ព្រហស្បតិ៍​នេះទៀត។

ផ្សាយពាណិជ្ជកម្ម

ដូច​ជា​ទស្សនកិច្ច​នៅកូរ៉េខាងត្បូង​ដែរ ទស្សនកិច្ច​របស់​ប្រមុខការពារ​ជាតិ​អាមេរិក​ នៅ​ជប៉ុន ស្ថិត​ក្នុង​ក្របខណ្ឌ​​​យុទ្ធសាស្ត្រ​អាមេរិក នៅ​អាស៊ីប៉ាស៊ីហ្វិក ប្រឈម​មុខ​នឹង​ប្រទេស​មហាអំណាចចិន​ និងប្រទេស​មហិច្ឆតា​នុយក្លេអ៊ែរ កូរ៉េខាង​ជើង។ អាមេរិក​ និង​ជប៉ុន​ ចង់ពង្រឹង​សម្ព័ន្ធ​ភាព​យោធា​​រវាង​គ្នា បន្ថែមទៀត។

ប្រមុខការទូត​អាមេរិក ចន​ ឃេរី ក៏មាន​វត្តមាន​ នៅក្រុងតូក្យូ ថ្ងៃ​ព្រហស្បតិ៍​នេះ​​ដែរ។ ប្រមុខ​ការពារជាតិ​និង​ប្រមុខការទូត​អាមេរិក បាន​ជួបពិភាក្សា​ជាមួយ​ប្រមុខការពារជាតិ​និង​ប្រមុខការទូត​ជប៉ុន ក្នុង​កិច្ចប្រជុំ​មាន​ឈ្មោះថា “២បូក​២”។ តំណាង​​​​​​ប្រទេស​ទាំងពីរ បាន​ផ្តោតការពិភាក្សា​សំខាន់​លើ​ការធ្វើអោយ​សម្ព័ន្ធភាពយោធា​​រវាង​ប្រទេស​ទាំងពីរ កាន់តែ​មានភាព​ទំនើប​ថែមទៀត។ ពួកគេ​ក៏បាន​ពិភាក្សា​គ្នា​ពី​សុវត្ថិភាព​សន្តិសុខ​តំបន់​ផងដែរ។ ជប៉ុ​ន​បាន​សំដែង​ការព្រួយបារម្ភ​​ពី​​​ការកើនឡើង​​​នៃ​សក្តានុពល​ទ័ពចិន។ ​ក្នុង​តំបន់​ ជប៉ុន​ក៏បាន​រងការគំរាម​កំហែង​នុយក្លេអ៊ែរ ពី​កូរ៉េខាងជើង​ផងដែរ។

គួររំលឹកថា ចាប់តាំង​ពីឆ្នាំ​១៩៩៧ មក អាមេរិក​ និង​ជប៉ុន នៅ​មិនទាន់​​បាន​សើរើ​​ឡើងវិញ នូវ​ឯកសារ​ទាក់ទង​កិច្ចសហប្រតិបត្តិការ​យោធា​ទ្វេភាគី​ នៅឡើយទេ។ យោងតាម​ប្រមុខ​ការទូត​​អាមេរិក​ ចន ឃេរី ​ ស្ថានភាព​ក្នុងតំបន់​បាន​ផ្លាស់ប្តូរ​ច្រើន ហើយ​ក្នុង​តំបន់​ក៏​មាន​ការគំរាមកំហែង​បែបផែន​ថ្មីៗ​​ផងដែរ។

ដើម្បីឆ្លើយតប​នឹង​ដំណើរការ​វិវត្តន៍​ទាំងអស់​នេះ ប្រទេស​ទាំងពីរ​បាន​​​ពិភាក្សា​គ្នា​ពី​កិច្ចសហប្រតិបត្តិការ​​ផ្នែក​ទិន្នន័យ​​អ៊ីនថឺនេត និង​​​សមត្ថភាព​​​ការពារ​ប្រឈម​ទៅនឹង​អាវុធ​មីស៊ីល។ អាមេរិក​និង​ជប៉ុន​បាន​ព្រមព្រៀងគ្នា​ថា​ នឹង​ដាក់​រ៉ាដា​រ​​​ប្រកាស​​​អាសន្ន​ទីពីរ​ទៀត​ នៅ​​ប៉ែក​កណ្តាល​ប្រទេស​ជប៉ុន ដែល​​ជា​ការ​​បន្ត​​​ឃ្លាំមើល​វត្តមាន​អាវុធ​មីស៊ីល ក្នុង​តំបន់។

លើសពីនេះ ប្រមុខការទូត​ និង​ប្រមុខការពារ​ជាតិ អាមេរិក​និង​ជប៉ុន ​បាន​ជជែក​​គ្នា​ពី​ការចាកចេញ​​របស់​កងទ័ព​អាមេរិក​៥០០០នាក់ ពីកោះ​អូគីណាវ៉ា​ ក្រោយឆ្នាំ​២០២០ និង​ការដាក់​​​យន្តហោះ​ដ្រូនឈ្មោះ​ថា Global Hawk​ ពី​ពីរទៅបី​​គ្រឿង នៅជប៉ុន។ នៅសប្តាហ៍​ក្រោយនេះ អាមេរិ​កនិង​ជប៉ុន​នឹង​ធ្វើ​សមយុទ្ធ​យោធា​រួមគ្នា​មួយ​ផងដែរ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI