អានតួអត្ថបទ
រុស្ស៊ី-APEC

វេទិកាធុរកិច្ច​ ”មុន​បើក”​ជំនួប​កំពូល​ផ្ទាល់”​របស់​ APEC​ នៅ​ថ្ងៃ​ស្អែក​

វេទិកាធុរកិច្ច​មុន​បើក​ជំនួបកំពូល​ផ្ទាល់​របស់ APEC​នៅថ្ងៃសៅរ៍ស្អែក៨កញ្ញា២០១២​នៅ​ក្រុង​Vladivostok​ប្រទេស​រុស្ស៊ី
វេទិកាធុរកិច្ច​មុន​បើក​ជំនួបកំពូល​ផ្ទាល់​របស់ APEC​នៅថ្ងៃសៅរ៍ស្អែក៨កញ្ញា២០១២​នៅ​ក្រុង​Vladivostok​ប្រទេស​រុស្ស៊ី RFI/Keo Chhaya
ដោយ៖ កែវ ឆាយា
១៨ នាទី

ប្រធានាធិបតី​រុស្ស៊ី-ជា​ប្រទេស​ម្ចាស់​ផ្ទះ​ទទួល​ជំនួប​កំពូល​APEC​លើក​នេះ​គឺ​លោក​ពូទីន​ថ្ងៃ​នេះ​បាន​ថ្លែង​សុន្ទរកថា​ ពី​លើ​វេទិកា​ធុរកិច្ច​នេះ​ដែល​ចូល​រួម​ដោយ​ថៅកែ​និង​ប្រធាន​អគ្គនាយក​ក្រុមហ៊ុន​ធំៗ​បំផុត​នៅ​ក្នុង​លោក​ចំនួន​ជាង​៥០០​នាក់។ បទ​អន្តរាគមន៍​នេះ​ឆ្ពោះ​ទៅ​ស៊ី​ជម្រៅ​​សមាហរ័ណកម្ម​សេដ្ឋកិច្ច​និង​បំផុស​បំផុល​ទំនាក់​ទំនង​ពាណិជ្ជកម្ម​ស្រប​នឹង​ ឈ្មោះ​របស់ APEC ជា​អង្គការ“សហប្រតិបត្តិការ​សេដ្ឋកិច្ច​តំបន់​អាស៊ី-ប៉ាស៊ីហ្វិក”។

ផ្សាយពាណិជ្ជកម្ម

ជា​ការ​កត់​សម្គាល់ APEC បាន​ប្រសូត្រ​មក​ក្នុង​ឆ្នាំ​១៩៨៩ ដោយ​តាំង​គោលដៅ​បង្កើន​កំណើន​សេដ្ឋកិច្ច​និង​ការ​រីកចម្រើន​នៅ​តំបន់​អាស៊ី-ប៉ាស៊ីហ្វិក។ រុស្ស៊ី​ដែល​ឆ្នាំ​នេះ ឡើង​ធ្វើ​ជា​ប្រធាន APEC ជា​លើក​ទី​១ ត្រូវ​បាន​ទទួល​ឲ្យ​ចូល​ក្នុង APEC គឺ​ក្នុង​ឆ្នាំ​១៩៩៨ ដោយ​រួម​ជាមួយ​និង​Vietnam​និង Perou ជា​ប្រទេស​នៅ​មាត់​មហាសមុទ្រ​ប៉ាស៊ីហ្វិក។ បច្ចុប្បន្ន ក្នុងA​PEC​ មាន​២១​ប្រទេស​ជា​សមាជិក​ដែល​តំណាង​ឲ្យ​បណ្តាជន​៤០%​លើ​ផែនដី, និង​៤៤% នៃ​ពាណិជ្ជកម្ម​ក្នុង​លោក។ ប៉ុន្តែ ​ដោយ​ហេតុថា Taiwan បាន​ត្រូវ​ទទួល​ឲ្យ​ចូល​កាល​ក្នុង​ឆ្នាំ​១៩៩១ ដោយ​មាន​ការ​យល់ព្រម​របស់​ចិន បាន​ជា ក្នុង APEC គេ​និយម​ប្រើ​ពាក្យ​ថា គឺ ២១​សេដ្ឋកិច្ច មិន​មែន ២១​ប្រទេស​ទេ ដែល​ស្ថិត​នៅ​ក្នុង​អង្គការសេដ្ឋកិច្ច APEC។

ចំណុច​គួរ​ឲ្យ​កត់​សម្គាល់​មួយ​ទៀត គឺ​ថា​ឲ្យ​សម្ភាសន៍​ម្សិលមិញ​ទៅ​កាណាល់​ទូរទស្សន៍​រដ្ឋ​រុស្ស៊ី
​ដែល​ផ្សាយ​ជា​ភាសា​អង់គ្លេស​ទៅ​បរទេស​ឈ្មោះ Russia Today មុន​នឹង​គាត់​ចេញ​ដំណើរ ទៅ​ធ្វើ​ជា​ប្រធាន​ជំនួប​កំពូល​ APEC​នៅ​ក្រុង Vladivostok ចម្ងាយ​ជាង​៩.០០០​គម​ខាង​កើត​ពី​រដ្ឋធានី ម៉ូស្គូ លោក​ប្រធានាធិបតី​ពូទីន បាន​សំដែង​នូវ​ការ​សោក​ស្តាយ​និង​ការ​យោគ​យល់​ចំពោះ​ការ​បង្ខំ​ចិត្ត​អវត្តមាន​ក្នុង​ជំនួប​នេះ​នៃ​លោក​ប្រធានាធិបតី​អាមេរិក Barack Obama មក​ពី​គាត់​ជាប់​រវល់​នឹង​រឿង​បោះឆ្នោត​ថ្ងៃ​មុខ​នៅ​ស.រ.អា.។ ម៉្លោះហើយ បាន​ជា​លោក​អូបាម៉ា​នឹង​ជំនួស​មុខ​ដោយ​ រដ្ឋមន្ត្រី​ការបរទេស​របស់​គាត់​គឺ​លោកស្រី Hillary Clinton។

លោក​ពូទីន​ ដោយ​ថ្លែង​ថ្ងៃ​នេះ​ពី​លើ”វេទិកា​ធុរកិច្ច” APEC បាន​សំដែង​នូវ​ភាព​ប្រាកដ​ក្នុង​ចិត្ត ថា “សមាហរ័ណកម្ម​សេដ្ឋកិច្ច​ភូម៌ភាគ”​នឹង​ដើរ​តួ​នាំ​មុខ​សម្រាប់​ធានា​ដល់​ទីផ្សារ​សេរី​នៅ​តំបន់​អាស៊ី-ប៉ាស៊ីហ្វិក។

ពាក្យ​ថា “សមាហរ័ណកម្ម​សេដ្ឋកិច្ច​ភូម៌ភាគ” ក្នុង​បទ​អន្តរាគមន៍​លោក​ពូទីន គឺ​សំដៅ​ទៅ​លើ “សហភាព​គយ”​និង​”លំហ​សេដ្ឋកិច្ច​រួម” ដែល​រួម​ក្តោប​ប្រទេស Russie Belarus Kazakhstan ដែល​ឥឡូវ​កំពុង​ធ្វើ​កិច្ច​ចរចា​ជាមួយ​ប្រទេស Nouvelle Zelande ជា​សមាជិក APEC ស្រាប់​ដើម្បី​ចុះ​កិច្ច​ព្រមព្រៀង ស្តី​អំពី “លំហពាណិជ្ជកម្ម​សេរី “ ហើយ​ក្នុង​គោលដៅ​នេះ ​ក៏​កំពុង​ប្រព្រឹត្ត ទៅ​ដែរ​ដំណើរ​រៀបចំ ធ្វើ​កិច្ច​ចរចា ជា​មួយ ប្រទេស APEC មួយ​ទៀត គឺ Vietnam ព្រម​ទាំង ប្រទេស​រាប់​សិប​ទៀត​ដែល​បាន​សំដែង​នូវ​ភាព​ត្រៀម​ខ្លួន​ចរចា​ដែរ។

ពិត​ជា​ក្នុង​ន័យ​នេះ ដែល​តាម​លោក​ប្រមុខរដ្ឋ​រុស្ស៊ី​ពូទីន ៖ សំវាទ​ រវាង​រចនា​សម្ព័ន្ធ​សេដ្ឋកិច្ច​នៃ​ភូម៌ភាគ​ធំៗ បែប​យ៉ាង APEC , កិច្ច​ព្រមព្រៀង​អំពី​ពាណិជ្ជកម្ម​សេរី​នៃ​ស.រ.អា. កាណាដា​និង​ ម៉ិចស៊ិក​ហៅកាត់​ថា NAFTA ,សហភាព​អឺរ៉ុប​និង​លំហ​សេដ្ឋកិច្ច​រួម​នៃ​សហគមន៍​រដ្ឋ​ឯករាជ្យ​គឺ​បម្រើ​ជា​គ្រឹះមូលដ្ឋាន​ដ៏​ល្អ ​សម្រាប់​សុវុឌ្ឍិកម្ម​ក្បួន​ខ្នាត នៃ​ពាណិជ្ជកម្ម​ពិភពលោក៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ