អាកាសចរណ៍

អាស៊ី-ប៉ាស៊ីហ្វិក អនាគត​ទីផ្សារ​ទិញ​យន្តហោះ​ទីមួយ​នៅ​លើ​ពិភពលោក

យន្តហោះ Airbus A380 ហោះសាកល្បង ថ្ងៃ​ទី ១៩ មេសា ២០១០
យន្តហោះ Airbus A380 ហោះសាកល្បង ថ្ងៃ​ទី ១៩ មេសា ២០១០ Reuters / J-P Arles

នៅ​ក្នុង​រយៈ​ពេល​២០​ឆ្នាំ​ខាងមុខ ​តំបន់​អាស៊ី-ប៉ាស៊ីហ្វិក នឹង​ក្លាយ​ទៅ​ជា​ទី​ផ្សារ​ទី​មួយ​ សម្រាប់​ក្រុមហ៊ុន​ផលិត​​យន្តហោះ​អឺរ៉ុប​។ ​តំបន់​នេះ​នឹងអាច​​ធ្វើ​ការ​បញ្ជា​ទិញ​ ​យន្ត​ហោះ​ ដល់​ទៅ​មួយ​ភាគ​បី នៃ​ការ​បញ្ជាទិញ​ទាំង​មូល​នៅ​លើ​ពិភពលោក ទៅ​ថ្ងៃ​អនាគត។ នេះ​បើ​យោង​តាម​ការ​សន្និដ្ឋាន​របស់​ក្រុម​អាកាសចរណ៍ផលិត​យន្តហោះ​ អ៊ែរប៊ូស Airbus នៅ​ថ្ងៃ​ចន្ទ​ទី ៧ មីនា ២០១១។

ផ្សាយពាណិជ្ជកម្ម

សេចក្តី​រាយការណ៍​របស់ អៀង សុខម៉ិញ

អាស៊ី-ប៉ាស៊ីហ្វិក នឹង​វ៉ា​ដាច់​សហភាព​អឺរ៉ុប និង​សហរដ្ឋ​អាមេរិក​ នៅក្នុង​​ការ​អភិវឌ្ឍន៍​វិស័យ​អាកាសចរណ៍​របស់​ខ្លួន ! ពីពេល​នេះ​ទៅ​ដល់​ឆ្នាំ​២០២៩ តំបន់​អាស៊ី-ប៉ាស៊ីហ្វិក​អាច​នឹង​បញ្ជា​ទិញ​យន្ត​ហោះ​ក្នុង​តម្លៃ​ទឹក​ប្រាក់​ប្រមាណជាង ១២០០​ពាន់​លាន​ដុល្លារ។
អ្នក​ទទួល​បន្ទុក​គ្រប់​គ្រង​យុទ្ធសាស្ត្រ​ក្រុមហ៊ុន​Airbus ហ៊ាន​ធ្វើ​សេចក្តី​សន្និដ្ឋាន​បែប​នេះ ដោយ​សំអាង​លើ​ហេតុ​ផល​ពីរ​យ៉ាង។ ​

ចំនួន​អ្នក​ធ្វើ​ដំណើរ​ និង​ការ​ដឹក​ជញ្ជូន​តាម​យន្តហោះ​ នៅ​ក្នុង​តំបន់​ កើន​ឡើង​លើស​ពី​កំរិត​មធ្យម ព្រោះ​តែ​តំបន់​អាស៊ី-ប៉ាស៊ីហ្វិក មាន​កំណើន​សេដ្ឋកិច្ចខ្លាំង​ ចរាចរណ៍​ផ្លូវអាកាស​បើក​ទូលាយ​ខ្លាំង​ ប្រជាជន​មាន​កំរិត​ជីវភាព​​​ខ្ពស់​ជាងមុន។

ម្យ៉ាង​វិញ​ទៀត យន្ត​ហោះ​​ជា​ច្រើន ដែល​កំពុង​ធ្វើ​ចរាចរណ៍​ ​ក្នុង​ពេល​បច្ចុប្បន្ន​នេះ សុទ្ធតែ​​ចាស់​ទ្រុឌទ្រោម។ ក្នុង​ចំណោម​យន្ត​ហោះ​ទាំង​ ៣៦០០​គ្រឿង ៧៨%​ ត្រូវ​ប្តូរចោល។

ក្នុង​ពេល​ដែល​​ចំនួន​អ្នក​ធ្វើ​ដំណើរ និងការ​ដឹក​ជញ្ជូន លើ​ពិភពលោក​កើន​ឡើង​តែ ៤,៨%​និង​៥,៩% នៅ​តំបន់​អាស៊ី-ប៉ាស៊ីហ្វិកវិញ ចំនួន​អ្នក​ធ្វើ​ដំណើរ​ប្រចាំ​ឆ្នាំ​នឹង​កើន​ឡើង​ ៥,៨% ចំណែក​ឯ​ការ​ដឹក​ជញ្ជូន​វិញ​នឹង​កើន​ឡើង​៧%។ នេះ​បើ​តាម​ការ​អះអាង​របស់​ក្រុម​ហ៊ុន​Airbus ពី​ទីក្រុង​ហុងកុង ព្រឹក​មិញ និង​ដែល​បាន​បន្ថែម​ទៀត​ថា តំបន់អាស៊ី​ដែល​មាន​ប្រជាជនរស់​នៅ​​​ច្រើន ​អាច​នឹង​ត្រូវ​ការ​បញ្ជា​ទិញ​យន្តហោះ​ធុន​ធំ​ រយៈ​ឆ្ងាយ ដល់​ទៅ​៣៣៦០​គ្រឿង គឺ​ស្មើ​នឹង​៤០%​នៃ​ការ​បញ្ជាទិញ​នៅ​លើពិភពលោក។ ចំណែក​យន្ត​ហោះ​ប្រភេទ​មធ្យម​ រយៈ​ខ្លី ដែល​អាច​ផ្ទុក​អ្នក​ដំណើរ​ពី ១០០ ទៅ២០០​នាក់​វិញ តំបន់​នេះ​ត្រូវ​ការ​ដល់​ទៅ​ប្រមាណ​ជា​៥២០០​គ្រឿង។

នៅ​ក្នុង​ឆ្នាំ​២០១០​ ក្រុមហ៊ុន Airbus លក់​​​​បាន​យន្តហោះ​ចំនួន​១៥​គ្រឿង​ ក្នុង​តម្លៃ​ទឹក​ប្រាក់​១៥០០​លាន​ដុល្លារ។ ជា​ទឹក​ប្រាក់​ដែល​ច្រើន​បំផុត​មិន​ធ្លាប់​មាន​សម្រាប់​ក្រុម​ហ៊ុន​ ហើយ២៥%​ជា​ប្រាក់​របស់​​ប្រទេសចិន៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI