ភូមា

អ៊ុងសាន់ស៊ូជី៖ភូមា​ពុំមែន​ជាទីលាន​ប្រយុទ្ធ​​រវាង​ប៉េកាំង​និង​វ៉ាស៊ីនតោន​ទេ​

លោកស្រី​អ៊ុង​សាន់​ស៊ូជី​(រូបកណ្តាល​)នៅ​​ក្នុង​វេទិកា​សេដ្ឋពិភពលោក​ស្តីពីអាស៊ីបូព៌ា​នៅសណ្ឋាគារមួយក្នុងកទីក្រុង​បាងកកថ្ងៃសុក្រទី១មិថុនា​២០១២
លោកស្រី​អ៊ុង​សាន់​ស៊ូជី​(រូបកណ្តាល​)នៅ​​ក្នុង​វេទិកា​សេដ្ឋពិភពលោក​ស្តីពីអាស៊ីបូព៌ា​នៅសណ្ឋាគារមួយក្នុងកទីក្រុង​បាងកកថ្ងៃសុក្រទី១មិថុនា​២០១២ REUTERS/Chaiwat Subprasom

ជ័យលាភី​​រង្វាន់​​ណូបែល​​សន្តិភាព​លោកស្រី​​អ៊ុងសាន់ស៊ូជី​​នៅ​​ថ្ងៃ​​សុក្រ​​១​​មិថុនា​​នេះ​បាន​​​ព្រមាន​​​ចិន​​​និង​​​សហរដ្ឋ​​អាមេរិក​​​ថា ​​”ភូមា​​​ពុំមែន​​​ជា​​​ទីតាំង​​យុទ្ធសាស្ត្រ​​​នយោបាយ​​​សំរាប់​​ការ​​​ប្រជែង​​ឥទ្ធិពល​​ដាក់​​គ្នា​នោះ​ទេ។​ ឥឡូវនេះ​ ​មតិសាធារណៈ ​កំពុង​តែ​ចោទ​សួរ​ថា ​តើ​​​ភូមា​​​នឹង​​ត្រូវ​​​ប្រកាន់​​ជំហ​​​​នយោបាយ​​បែប​ណា?​​ បើសិន​ជា​​ភូមា​ងាក​ខ្លាំង​ទៅ​ខាង​អាមេរិក​នោះ​​ទំនាក់​​​​ទំនង​​ជា​​ប្រវត្តិ​សាស្ត្រ​​រវាង​ភូមា​និង​ចិន​​នឹង​ត្រូវ​​ប៉ះពាល់​​ជា​មិន​ខាន-នេះ​ជា​ការ​​ថ្លែង​​បញ្ជាក់​​របស់​​​លោកស្រី​ស៊ូជី​​ប្រមុខ​​បក្ស​​​ប្រឆាំង​​ភូមា​​នៅ​​ក្នុង​​​សន្និសីទ​​សារព័ត៌មាន​​មួយ​​នៅ​​ទីក្រុង​​បាងកក​។

ផ្សាយពាណិជ្ជកម្ម

 

ថ្លែង​នៅ​ក្នុង​វេទិកា​សេដ្ឋកិច្ច​ពិភពលោក​ស្តីពី​អាស៊ី​បូព៌ា​នៅទីក្រុង​បាងកក​ ក្នុង​ដំណើរ​ទស្សនកិច្ច​​ជា​​លើក​ដំបូង​របស់​ខ្លួន​នៅ​ឯ​បរទេស​នា​រយៈពេល​២៤​ឆ្នាំ​ចុង​ក្រោយ​នេះ លោកស្រី​​អ៊ុងសាន់ស៊ូជី បាន​សំដែងក្តី​ព្រួយបារម្ភ​យ៉ាង​ខ្លាំង​ អំពី​អនាគត​ប្រទេស​ភូមា​នៅ​ខណៈ​​​ដែល​ប្រទេស​​មហា​អំណាច​ទាំង​ពីរ « ចិននិងអាមេរិក »​​ ប៉ុនប៉ង​​យក​ភូមា​ធ្វើ​ជា​ទីលាន​យុទ្ធសាស្រ្ត​នយាបាយដ៏សំខាន់​របស់​ពួក​គេ​ក្នុង​ការ​​ប្រជែង​ឥទ្ធិពល​ដាក់​គ្នា។

«ប្រទេស​ភូមា មិន​ត្រូវ​ស្ថិត​នៅ​ក្នុង​ករណី​ដូច​ខាង​លើ​នេះ​ទេ តែ​គួរ​ជា​​តំបន់​មួយប្រកប​ដោយ​សុខដុមរមនា​សំរាប់​ប្រទេស​មហា​អំណាច​ទាំង​ពីរ"-នេះ​ជា​ការ​ថ្លែង​​បញ្ជាក់រ​បស់​​លោក​ស្រី​អ៊ុងសាន់ស៊ូជី ដោយ​បាន​សង្តត់​ធ្ងន់​ទៀត​ថា «​ប្រទេស​ភូមា​និង​ប្រទេស​ចិន ជា​ប្រទេស​ភូមិ​ផង​របង​មួយ​ដ៏​ល្អ​តាំងពី​​យូរ​ឆ្នាំ​កន្លង​មក​ហើយ"។

មួយវិញ​ទៀត ប្រទេស​ចិន​  បាន​ធ្វើ​វិនិយោគ​ទុន​មុន​គេ​បង្អស់​នៅ​​ភូមា​និង​បាន​ទិញ​ជា​ពិសេស​ប្រេង​ឥន្ធនៈ​និង​ឧស្ម័ន​ធម្មជាតិ​​ភូមា​ ដោយ​ថែម​ទាំង​បាន​នាំ​ចូលផលិតផលចិន​យ៉ាង​ច្រើន​ឥត​គណនា ​មក​ក្នុង​​ទីផ្សា​រប្រទេសភូមា។

ជា​សំណង​វិញ  ទីក្រុង​ប៉េកាំង បាន​ប្រើ​ឥទ្ធិពល​របស់​​ខ្លួន​​អស់​​រយៈ​ពេល​ជា​ច្រើន​ឆ្នាំ​កន្លង​មក​ហើយក្នុង​នាម​ជា​សមាជិក​អចិន្ត្រៃយ​នៃ​​ក្រុមប្រឹក្សា​សន្តិសុខអសប ដោយបានខិតខំជួយ​​​​ភូមា​ក្នុង​​​ជំនាន់​ដឹកនាំ​ដោយ​របបសឹកដើម្បីកុំ​ឲ្យ​ជាប់​ទណ្ឌកម្ម​របស់​អសប។

របប​សឹក​ បាន​រំលាយ​ខ្លួន​នៅ​ខែ​មីនា​២០១១ និង​បាន​ផ្តល់​អំណាច​ទៅឲ្យ​​រដ្ឋាភិបាល​ស៊ីវិល​ភូមា​ ​ដែល​សមាជិក​សុទ្ធ​តែ​ជា​អតីត​មេ​យោធា កាន់​កាប់​វិញ។​ រដ្ឋាភិបាល​ថ្មី​ភូមា​នេះ បាន​ខិតខំ​ធ្វើ​កំណែ​ទម្រង់​យ៉ាង​សម្បើម​អស្ចារ្យ​​នៅ​ក្នុង​ប្រទេស​និង​បាន​ជួយ​លើក​ទឹកចិត្ត​ប្រមុខ​បក្ស​​ប្រឆាំង​លោកស្រី​ស៊ូជី ឲ្យ​វិល​ត្រឡប់​ចូលមក​ប្រឡូក​ក្នុង​ឆាក​នយោបាយ​វិញ រហូត​ដល់​​ក្លាយ​ជា​អ្នក​តំណាងរាស្ត្រ​ភូមា​ចាប់​តាំង​ពី​ការ​បោះ​ឆ្នោត​សភា​មួយ​ភាគ​នៅ​ខែ​មេសា​កន្លង​ផុតទៅ។​​

ម្យ៉ាង​ទៀត នៅ​ខែ​កញ្ញា​ឆ្នាំ​ទៅ​មិញ លោក​ប្រធានាធិបតី​ភូមា​ថេនសេនក៏​បាន​ធ្វើ​ឲ្យ​គេ​ភ្ញាក់​ផ្អើល​មិន​តិចដែរ ដោយ​លោក​បាន​ជូន​ដំណឹង អំពី​ការ​លើក​ផ្អាក​គម្រោង​សាង​សង់​ទំនប់​វារី​អគ្គីសនី​មួយ​ដែល​មាន​តម្លៃ​ប្រមាណ​ជា ៣៦០០​លាន​ដុល្លារ​និងដែល​​ផ្ត​ល់​ហិរញ្ញប្បទាន​ដោយប្រទេសចិន​ បន្ទាប់​ពី​មាន​បាតុកម្ម​ប្រឆាំង​យ៉ាង​ខ្លាំងក្លា​ពី​ប្រជាពលរដ្ឋ​ភូមា៕ ​

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI