បារាំង-ភូមា

លោកស្រី អ៊ុងសាន ស៊ូជី ​​ជួប​ពិភាក្សា​​ជាមួយ​​លោក​ប្រធានាធិបតី​​បារាំង​​នៅវិមាន​​អេលីហ្សេ​​

លោក​ប្រធានាធិបតី​​បារាំង​​ ហ្វ្រង់ស័រ​​ ហូឡង់​​ នៅ​ថ្ងៃ​អង្គារ​​ទី២៦​​មិថុនា​​ឆ្នាំ២០១២ បាន​​ទទួល​​យ៉ាង​រាក់ទាក់​​និង​​យ៉ាង​​អ៊ឹកអធិក​ ​ លោកស្រី​​ អ៊ុងសាន​​ ស៊ូជី​​ ប្រមុខ​​បក្ស​ប្រឆាំង​​ភូមា​
លោក​ប្រធានាធិបតី​​បារាំង​​ ហ្វ្រង់ស័រ​​ ហូឡង់​​ នៅ​ថ្ងៃ​អង្គារ​​ទី២៦​​មិថុនា​​ឆ្នាំ២០១២ បាន​​ទទួល​​យ៉ាង​រាក់ទាក់​​និង​​យ៉ាង​​អ៊ឹកអធិក​ ​ លោកស្រី​​ អ៊ុងសាន​​ ស៊ូជី​​ ប្រមុខ​​បក្ស​ប្រឆាំង​​ភូមា​ REUTERS/Philippe Wojazer

លោក​ប្រធានាធិបតី​បារាំង​ ហ្វ្រង់ស័រ​ ហូឡង់​ នៅ​ថ្ងៃអង្គារ​ទី២៦​មិថុនា​ម្សិលមិញ​ បាន​ទទួល​យ៉ាង​រាក់ទាក់​និង​យ៉ាង​អ៊ឹកអធិក ​ លោកស្រី​ អ៊ុងសាន​ ស៊ូជី​ ប្រមុខ​បក្សប្រឆាំង​ភូមា​និង​ជា​និមិត្តរូប​នៃ​ប្រជាធិបតេយ្យ​ភូមា។​ ទស្សនកិច្ច​ចំនួន​បីថ្ងៃ​នៅ​ប្រទេស​បារាំង​របស់​ លោកស្រី​ អ៊ុងសាន​ ស៊ូជី​ គឺជា​ដំណាក់ការ​ចុងក្រោយ​នៃ​ទស្សនកិច្ច​របស់​លោកស្រី​នៅ​អឺរ៉ុប​ពោរពេញ​​ដោយ​ជោគជ័យ​ដ៏ធំធេង។

ផ្សាយពាណិជ្ជកម្ម

លោកស្រី​ អ៊ុងសាន​ ស៊ូជី​ ប្រមុខ​បក្សប្រឆាំង​ភូមា​និង​ជា​និមិត្តរូប​នៃ​ប្រជាធិបតេយ្យ​ភូមា​ ​ បំពេញ​ទស្សនកិច្ច​ចំនួន​បីថ្ងៃ​នៅ​ប្រទេស​បារាំង​ ចាប់តាំង​ពី​ថ្ងៃអង្គារ​ទី២៦​មិថុនា។​ នៅយប់​ថ្ងៃអង្គារ​ម្សិលមិញ​ ​ លោក​ប្រធានាធិបតី​បារាំង​ ហ្វ្រង់ស័រ​ ហូឡង់​បាន​រៀបចំ​ទទួល​ជប់លៀង​សាយភោជន៍​​នៅ​វិមាន​ប្រធានាធិបតី​អេលីហ្សេ​​ដោយមាន​ការ​ចូលរួម​ពីសំណាក់​លោក​នាយករដ្ឋមន្ត្រី​បារាំង​ Jean-Marc Ayrault ​ ហើយនិង​ឥស្សរជន​សំខាន់ៗ​ជាច្រើន​ទៀត​ ​ មាន​ជាអាទិ៍​ អ្នកនិពន្ធ​បារាំង​ដ៏ល្បី​ លោក​ Stéphane Hessel ​និង​សមិទ្ធិការិនី​ Agnès Varda។​ ប៉ុន្តែ​ មុន​ពិធី​ជប់លៀង​ ​ លោក​ប្រធានាធិបតី​បារាំង​ ហ្វ្រង់ស័រ​ ហូឡង់​ បាន​ពិភាក្សា​ជាមួយ​លោកស្រី​ អ៊ុងសាន​ ស៊ូជី​ ប្រមុខ​បក្សប្រឆាំង​ភូមា​ប្រមាណ​ជាង​កន្លះម៉ោង។

 
ប្រទេស​បារាំង​បាន​ក្រាល​ព្រំក្រហម​ទទួល​ លោកស្រី​ អ៊ុងសាន​ ស៊ូជី​ ជ័យលាភី​រង្វាន់​ណូបែល​សន្តិភាព។​ តាមធម្មតា​ ការរៀបចំ​ទទួល​យ៉ាង​អ៊ឹកអធិក​បែបនេះ​ គឺ​គេ​រៀបចំ​សម្រាប់តែ​ទទួល​ប្រមុខរដ្ឋ​តែ​ប៉ុណ្ណោះ​ ​ ប៉ុន្តែ​ទាំងនេះ​ក៏​ពីព្រោះតែ​ប្រទេស​បារាំង​ចង់​ផ្តល់​កិត្តិយស​ដ៏​ខ្ពង់ខ្ពស់​ជូន​លោកស្រី​ អ៊ុងសាន​ ស៊ូជី​ ដែលជា​និមិត្តរូប​នៃ​ប្រជាធិបតេយ្យ​ភូមា។

ក្រោយពី​មាន​កិច្ចសន្ទនា​ លោក​ប្រធានាធិបតី​បារាំង​ ហ្វ្រង់ស័រ​ ហូឡង់​ និង​ លោកស្រី​ អ៊ុងសាន​ ស៊ូជី​ ប្រមុខ​បក្សប្រឆាំង​ភូមា​ បាន​ធ្វើ​សន្និសីទ​កាសែត​រួមគ្នាមួយ​នៅ​វិមាន​អេលីហ្សេ។​ នាឱកាសនោះ​ លោកប្រធានាធិបតី​បារាំង​បាន​ថ្លែង​ជាអាទិ៍ថា​ ​ ប្រទេស​បារាំង​គាំទ្រ​រាល់​តួអង្គ​ដែល​ជួយ​ជំរុញ​ឲ្យ​ប្រទេស​ភូមា​ឈាន​ទៅ​ដល់​លទ្ធិ​ប្រជាធិបតេយ្យ​ ​ ហើយប្រទេស​បារាំង​នឹង​ធ្វើយ៉ាងណា​ឲ្យ​អភិក្រម​ប្រជាធិបតេយ្យ​ភូមា​ឈាន​ដល់​ទិសដៅ​របស់​ខ្លួន។​ ទាំងនេះ​បាន​សេចក្តីថា​ ​ ធ្វើយ៉ាងណា​ឲ្យ​ប្រទេស​ភូមា​ក្លាយទៅជា​ប្រទេស​គោរព​លទ្ធិ​ប្រជាធិបតេយ្យ​ពេញលេញ។​ លោក​ប្រធានាធិបតី​បារាំង​បានទាំង​គូស​បញ្ជាក់ទៀតថា​ ​ លោក​បាន​ត្រៀម​លក្ខណៈ​នឹង​ទទួល​លោក​ប្រធានាធិបតី​ភូមា​ ថេន សេន ​នៅ​ប្រទេស​បារាំង​ ​ បើប្រសិនជា​លោក​ ថេន សេន​ “ចង់អញ្ជើញ​មក​ប្រទេស​បារាំង”។

នាឱកាស​ទស្សនកិច្ច​របស់​លោកស្រី​ អ៊ុងសាន​ ស៊ូជី​ នៅ​ប្រទេស​បារាំង​ ​ លោកស្រី​ប្រមុខ​បក្ស​ប្រឆាំង​ភូមា​ដែលមាន​អាយុ​៦៧ឆ្នាំ​នឹងមាន​ជំនួប​ពិភាក្សា​ជាមួយ​លោក​ប្រធាន​រដ្ឋសភា​បារាំង​ ​ លោកប្រធាន​ព្រឹទ្ធសភា​ ​ និង​លោក​អភិបាល​ក្រុង​ប៉ារីស។​ ហើយ​អភិបាល​ក្រុងប៉ារីស​លោក​ Bertrand Delanoë ​នឹង​ផ្តល់​កិត្តិយស​ជូន​លោក​ស្រី​អ៊ុងសាន​ស៊ូជី​ជា​ “បុរីជន​កិត្តិយស​នៃ​ទីក្រុង​ប៉ារីស”​ផងទៀត។​ បន្ទាប់មក​ លោកស្រី​នឹង​មាន​ជំនួប​ជាមួយ​អង្គការ​ក្រៅរដ្ឋាភិបាល​ ​ និង​ជាមួយ​និស្សិត​នៅ​មហាវិទ្យាល័យ​ស័របូន។

លោក​ប្រធានាធិបតី​បារាំង​ ហ្វ្រង់ស័រ​ ហូឡង់​ ក៏បាន​សង្កត់​បញ្ជាក់​ទៀតថា​ ​ ប្រទេស​បារាំង​នឹង​មាន​ការ​ប្រុងប្រយ័ត្ន​ជានិច្ច​ក្នុង​វិស័យ​ “តម្លាភាព”​ ​ ហើយនិង​ “ការប្រព្រឹត្ត​ដោយ​ត្រឹមត្រូវ” ​របស់​សហគ្រាស​បារាំង​ដែល​ទៅបោះទុន​ធ្វើ​វិនិយោគ​នៅក្នុង​ប្រទេស​ភូមា។

បន្ទាប់មក​ ​ ប្រមុខ​បក្ស​ប្រឆាំង​ភូមា​ លោកស្រី​ អ៊ុងសាន​ ស៊ូជី​ បាន​ថ្លែង​អំពាវនាវ​នៅ​ថ្ងៃអង្គារ​ម្សិលមិញ​ឲ្យ​សហគ្រាស​នៃ​ប្រទេស​លោក​ខាងលិច​ចូល​ទៅ​បោះទុន​ធ្វើ​វិនិយោគ​នៅ​ប្រទេស​ភូមា​ ​ ដើម្បី​ជួយ​ពង្រឹង​គ្រឹះ​មូលដ្ឋាន​ប្រជាធិបតេយ្យ​ភូមា​ ​ ដោយ​ថ្លែង​ពន្យល់ថា​ ​ “យើង​ត្រូវ​ការ​លទ្ធិ​ប្រជាធិបតេយ្យ​ដូចយើង​ត្រូវ​ការ​អភិវឌ្ឍន៍​សេដ្ឋកិច្ច​ ​ ក៏​ប៉ុន្តែ​ ការ​អភិវឌ្ឍន៍​សេដ្ឋកិច្ច​ត្រូវ​យកមក​ជួយ​ពង្រឹង​ គ្រឹះមូលដ្ឋាន​ប្រជាធិបតេយ្យ​ ​ អភិវឌ្ឍ​នយោបាយ​ ​ និង​សង្គម​របស់​ប្រទេស​ភូមា”​។​ នេះ​ជា​សេចក្តី​ថ្លែងប្រកាស​របស់​ លោកស្រី​ អ៊ុងសាន​ ស៊ូជី​ ប្រមុខ​បក្សប្រឆាំង​និង​ជា​និមិត្តរូប​នៃ​ប្រជាធិបតេយ្យ​ភូមា៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI