អានតួអត្ថបទ
បង់ក្លាដែស

​បាតុកម្ម​ទូទៅ​មុន​ថ្ងៃ​បោះឆ្នោត​សភាក្លាយ​ជា​អំពើ​ហិង្សា​

បណ្តា​ជន​បង់ក្លាដែល​ប្រមូល​ផ្តុំ​គ្នា​ធ្វើ​បាតុកម្ម​ នៅ​ក្រុង​ដាកា ថ្ងៃ​ទី ៤ មករា ២០១៤
បណ្តា​ជន​បង់ក្លាដែល​ប្រមូល​ផ្តុំ​គ្នា​ធ្វើ​បាតុកម្ម​ នៅ​ក្រុង​ដាកា ថ្ងៃ​ទី ៤ មករា ២០១៤ © Reuters
ដោយ៖ អៀង សុខម៉ិញ
១៣ នាទី

គណបក្ស​ប្រឆាំងបង់ក្លាដែស​​បាន​ដឹកនាំ​ធ្វើ​បាតុកម្ម​ទូទៅ​មួយ ចាប់​ពី​ថ្ងៃ​សៅរ៍ទី ៤​មករា​នេះ​តទៅ ពោលគឺ​​មួយ​ថ្ងៃ​មុន​ការ​បោះឆ្នោត​សភា។ កម្មវត្ថុនៃ​បាតុកម្ម​​ គឺ​ធ្វើ​យ៉ាង​ណា​ រារាំង​កុំ​ឱ្យ​ការ​បោះឆ្នោតអាច​ដំណើរ​ការ​ទៅ​បាន។​ ការ​បោះឆ្នោត​ដែល​គណបក្ស​​របស់​នាយក​រដ្ឋមន្ត្រី​ផុត​អាណត្តិ​ ត្រូវ​ឈ្នះ​ទៀត។ បាតុកម្ម​ដែល​ចៀស​មិន​រួច​ក្លាយ​ជា​អំពើ​ហិង្សា មាន​ស្លាប់​យ៉ាង​ហោច​ណាស់​ម្នាក់ និង​មាន​ការិយាល័យ​បោះឆ្នោត​ មិន​តិច​ជាង​៦០​កន្លែង​ត្រូវ​រង​អគ្គីភ័យ​ឆាប​ឆេះ។

ផ្សាយពាណិជ្ជកម្ម

 

សម្រាប់​គណបក្ស​​ជាតិ​និយម​បង់ក្លាដែល​ជា​បក្ស​ប្រឆាំង ការ​បោះឆ្នោត​សភា​ថ្ងៃ​ទី ៥​មករា​ស្អែក​នេះ គ្រាន់​តែ​ជា​ឆាក​ល្ខោន​​ បំភ័ន្ត​ភ្នែក​សាធារណមតិ​តែ​ប៉ុណ្ណោះ ពុំ​មែន​ជាការ​បោះឆ្នោត​ត្រឹម​ត្រូវ មាន​តម្លាភាព​ តាម​បែប​លទ្ធិប្រជាធិបតេយ្យ​ទេ ហេតុ​ដូច្នេះ​ហើយ​បាន​ជា​គណបក្ស​ប្រឆាំង​មួយ​នេះបន្ត​​​ប្រកូក​ប្រកាស​ធ្វើ​បាតុកម្ម​ ចាប់​ពី​ថ្ងៃ​ សៅរ៍​នេះ​តទៅ ដើម្បី​សាក​ល្បង​រារាំង​ដំណើរ​ការ​បោះឆ្នោតឱ្យ​បាន។

តាម​ការពិត​ចលនា​បាតុកម្ម​បាន​ ធ្វើ​ឱ្យ​ សាលា​រៀន និង​សេវា​សាធារណៈ​របស់ បង់ក្លាដែស​​គាំង​ស្តូក​ស្តឹង​ ជា​ញឹក​ញយ​ តាំង​ពី​ជា​ច្រើន​សប្តាហ៍​មក​ហើយ។ ម្សិលមិញ លោកស្រី ប្រមុខ​បក្ស​ជាតិនិយម​ Khaleda Zia ដែល​ជាប់​ឃុំ​ឃាំង​ក្នុង​​​​​គេហដ្ឋាន តាំង​ពី​ចុង​ខែ​ធ្នូ បាន​អំពាវនាវ​សុំ​ឱ្យ​បណ្តា​ជន​បង់ក្លាដែស​ទាំង​អស់​ធ្វើ​ពហិការ​ទាំង​អស់​គ្នា ដូច​បក្ស​ប្រឆាំង​ មិន​ទៅ​ចូល​រួម​បោះឆ្នោត។

បក្ស​ប្រឆាំង​បាន​ទាមទារ​ឱ្យ​រដ្ឋាភិបាល​កំពុង​កាន់​អំណាច​លាលែង​ចេញ​ពី​តំណែង​ និង​ដាក់​ឱ្យ​មាន​រដ្ឋាភិបាល​អព្យាក្រិត្យ បណ្តោះអាសន្ន​ មុន​នឹង​ធ្វើ​ការ​បោះឆ្នោត ប៉ុន្តែ​លោកស្រី​នាយក​រដ្ឋមន្ត្រីបដិសេធ​ដាច់​ខាត និង​ជំនះ​បញ្ជាក់​ម្តង​ទៀត​នៅ​ថ្ងៃ​ព្រហស្បតិ៍​រៀប​ចំ​បោះឆ្នោត​ថ្ងៃ​ស្អែក​ដដែល ព្រមទាំង​ចោទ​ប្រកាន់​​ប្រមុខ​បក្ស​ប្រឆាំង​ថា​យក​ប្រទេស​មក​ធ្វើ​ជា​ចំណាប់​ថ្នូរ​នយោបាយ​ តាម​រយៈ​បាតុកម្ម និង​ធ្វើ​ជា​ឧបសគ្គ​រារាំង​មុន​ថ្ងៃ​បោះឆ្នោត​។

តាំង​ពី​ខែ​តុលា​មក អំពើ​ហិង្សា​តែ​កើត​មាន​ជា​ញយៗ​ មាន​ស្លាប់​យ៉ាង​ហោច​ណាស់ ១៥០​នាក់ ប៉ូលិស​ទាហាន​ជាង​៥ម៉ឺន​នាក់ត្រូវ​បាន​ដាក់​ពង្រាយ​ពេញ​ផ្ទៃ​ប្រទេស។ នៅ​ថ្ងៃ​នេះ​កង​កម្លាំង​ប្រឆាំង​ភេរវកម្ម​បានទៅ​ព័ទ្ធ​និង​បិទ​ខ្ទប់​ទ្វារ​ចូល​គេហដ្ឋាន​ប្រមុខ​បក្ស​ប្រឆាំង។ ការិយាល័យ​បោះឆ្នោត​យ៉ាង​ហោច​ណាស់​៦០ ត្រូវ​បាន​ដុត​បំផ្លាញ។ អស្ថិរភាព​ និង​បាតុកម្ម​ បាន​ប៉ះពាល់​យ៉ាង​ខ្លាំង​ដល់​សេដ្ឋកិច្ច​ និងដល់​បណ្តាជន​​បង់ក្លាដែស​ជាង​១៥០​លាន​នាក់ ដែល​​មួយ​ភាគ​បី​រស់​ក្រោម​បន្ទាត់​នៃ​ភាព​ក្រីក្រ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ