អានតួអត្ថបទ
ទស្សនៈព្រឹត្តិការណ៍ពិភពលោក

ចិន​ឆ្លៀត​ទាញ​ប្រយោជន៍​ប្រេង ពេល​ប្រេស៊ីល ងរ​ដាក់​អាមេរិក

សំឡេង ០៤:៣៧
ស្ថានីយ៍​បូមប្រេង​មួយ​របស់​ក្រុមហ៊ុន​ប្រេង​ដ៏ធំPetrobras នៅប្រទេស​ប្រេស៊ីល
ស្ថានីយ៍​បូមប្រេង​មួយ​របស់​ក្រុមហ៊ុន​ប្រេង​ដ៏ធំPetrobras នៅប្រទេស​ប្រេស៊ីល RFI/François Cardona
ដោយ៖ ឈាង បុប្ផា
៣០ នាទី

នៅថ្ងៃ​ចន្ទ ទី ២១​តុលានេះ រដ្ឋាភិបាល​ប្រេស៊ីល​បើក​ការដេញថ្លៃ​លើ​អាជីវកម្ម​បូមប្រេង​ Libra។ ក្រុមហ៊ុន​យក្ស​​ប្រេង​របស់​ចិន​ចំនួន​បី​ចូលរួម ដេញថ្លៃ ជាមួយ​ក្រុមហ៊ុន​បរទេស​១១ ផ្សេងទៀត។ តាំងពី​ថ្ងៃ​ព្រហស្បតិ៍ ចុងសប្តាហ៍មុន បុគ្គលិក និង​កម្មករ​សហជីព ធ្វើការ​នៅ​ស្ថានីយ៍​បូមប្រេង​ក្នុង​ប្រទេស​ប្រេស៊ីល​ បាន​នាំគ្នា​ធ្វើ​បាតុកម្ម នៅមុខ​ក្រុមហ៊ុន​ប្រេង​ជាតិ Petrobras ដើម្បី​ប្រឆាំង​នឹង​មិន​ឲ្យ​ក្រុមហ៊ុន​បរទេស​ទាញ​យក​ប្រយោជន៍​ពី​ក្រុមហ៊ុន​ប្រេងជាតិ។

ផ្សាយពាណិជ្ជកម្ម

បុគ្គលិក​ប្រមាណ ៤ម៉ឺននាក់​របស់​ក្រុមហ៊ុន​ប្រេង​ដ៏ធំ Petrobras របស់​ប្រទេស​ប្រេស៊ីល​បាន​សន្យា​ធ្វើ​បាតុកម្ម ក្នុង​រយៈ​ពេល​គ្មាន​កំណត់ ពោល គឺ រហូត​ដល់ពេល​ពួកគេ​បាន​ទទួល​ការយល់ព្រម​ពី​រដ្ឋាភិបាល គឺ​ផ្អាកឈប់​ឲ្យ​ក្រុមហ៊ុន​បរទេស​ដេញថ្លៃ​យក​អាជីវកម្ម​ប្រេង​របស់​ជាតិ​បាន។ ការទាមទារ​របស់​បុគ្គលិក​ប្រេស៊ីល នឹង​មិន​អាច​សម្រេច​ទៅបាន​ទេ។ រដ្ឋមន្រ្តី​ក្រសួងសេដ្ឋកិច្ច​ប្រេស៊ីល​បាន​បញ្ជាក់​រួចហើយ​ពី​សារៈសំខាន់​នៃ​ការវិនិយោគ​លើក​នេះ។ អាងប្រេង​កាត​ក្រោមសមុទ្រ Libra​នឹង​នាំ​មក​ឲ្យ​ប្រេស៊ីល​នូវ​ទឹកប្រាក់​វិនិយោគ​១៨០​ពាន់​លាន​ដុល្លារ ក្នុង​រយៈពេល ៣៥​ឆ្នាំទៅមុខ។

អាង​ប្រេង​ក្រោម​សមុទ្រ​Libra ដែល​ស្ថិតនៅ​ប្រមាណ ១៨០​គីឡូម៉ែត្រ​ពី​ទីក្រុង Rio de jeneiro ត្រូវ​បាន​គេ​រកឃើញ នៅឆ្នាំ ២០០៧។ ជាដំណឹង​ល្អមួយ​សម្រាប់​សេដ្ឋកិច្ច​ប្រេស៊ីល ដែល​ពេលនេះ​កំពុង​ត្រូវ​គេ​ចាត់ចូល​ក្នុង​ចំណោម​ប្រទេស​ទើប​មាន​សេដ្ឋកិច្ច​រីកលូតលាស់​ថ្មី ជាមួយ​ចិន រុស្ស៊ី ឥណ្ឌា និង​អាហ្វ្រិក​ខាងត្បូង។ គេ​បាន​ប៉ាន់​ប្រមាណ​ថា អាងប្រេង​ Libra​នឹង​អាច​ផ្តល់​ប្រេងឆៅ​ពី​៨ ទៅ ​១២​ពាន់​លាន​ធុង។ ពោល​គឺ​អាង​ប្រេង​ Libra តែមួយ​កន្លែង​នឹង​ផ្តល់​ប្រេង​ប្រមាណ​១​លាន​ធុង ក្នុង​មួយថ្ងៃៗ ក្នុង​ពេល​ដែល​សព្វថ្ងៃនេះ អាជីវកម្ម​ផលិតប្រេង​នៅ​ទូទាំង​ប្រេស៊ីល​ផ្តល់​ប្រេង​សរុប​២​លាន​ធុង ក្នុង​មួយ​ថ្ងៃ។

ដោយ​មើល​ឃើញ​ សារៈសំខាន់ និង​ទឹកប្រាក់​មហាសាល​បាន​មក ពី គម្រោង​នេះ ទើប រដ្ឋមន្រ្តី​ការពារ​ជាតិ​ប្រេស៊ីល​បាន​បញ្ជាក់ហើយ​ថា ទាហាន និង​ប៉ូលិស​រាប់រយ​នាក់​នឹង​ត្រូវ​ពង្រាយ យាម​ជុំវិញ កន្លែង​ដែល​ការដាក់ដេញថ្លៃ​នឹង​ប្រព្រឹត្ត​ធ្វើឡើង។ រដ្ឋាភិបាល​ប្រេស៊ីល​ចង់​ណាស់​បំពេញ​ចិត្ត​ប្រជាជន​ប្រេស៊ីល ជាពិសេស នៅក្នុង​ពេល​ការបោះឆ្នោត​ប្រធានាធិបតី នៅ​ឆ្នាំ​ក្រោយ កាន់តែខិត​ចូលមកដល់។ ប៉ុន្តែ លោកស្រី​ប្រធានាធិបតី Dilma Rousseff  ដែល​ធ្លាក់​ប្រជាប្រិយភាព គ្មាន​ជម្រើស​ទេ នៅពេល​បច្ចុប្បន្ន​នេះ។

ប្រេង​ក្រោមសមុទ្រ​ប្រេស៊ីល​នឹងមាន​តម្លៃ​មហាសាល ក៏ពិត​មែនហើយ ប៉ុន្តែ ដើម្បី​បូម​យកវា​បាន គេ​ត្រូវការ​ចំណាយ​ខ្ពស់ និង​ប្រថុយ​គ្រោះថ្នាក់​ភូមិសាស្ត្រ​ច្រើន។ អាងប្រេង​Libra ស្ថិតនៅ​ជម្រៅ​៧​ពាន់​ម៉ែត្រ ក្រោមផ្ទាំងថ្ម និង​ស្រទាប់​អំបិល នៅ​បាតសមុទ្រ។ ក្រុមហ៊ុន​ប្រេង​ដ៏ធំ​របស់​ប្រេស៊ីល គឺ​ Petrobras តែម្នាក់​ឯង មិន​អាច​គ្រប់គ្រង និង​ធ្វើ​បានទេ។ ជារួម រដ្ឋាភិបាល​ត្រូវការ​ការសហការ​ពីក្រុមហ៊ុន​ វិនិយោគ​បរទេស ព្រោះ​ការជីក​យក​ប្រេង​នៅ​Libra​ជាប្រតិបត្តិការ​ដ៏លំបាក​ស្មុគស្មាញ។

នៅក្នុង​ការដេញថ្លៃ រដ្ឋាភិបាល​ប្រេស៊ីល​កំពុង​ស្វែងរក​ក្រុមហ៊ុន​ដៃគូ​ណា​ដែល​នឹង​ហ៊ាន​ផ្តល់​ប្រេង​ច្រើន​ដល់​រដ្ឋាភិបាល។ លើសពីនោះ ក្រុមហ៊ុន​ប្រេង​ជាតិ​ Petrobras នៅតែ​ជាម្ចាស់​កម្មសិទ្ធិ​ផ្តាច់មុខ​ក្នុង​អាជីវកម្ម គឺ​មានម្ចាស់​ភាគហ៊ុន​ប្រមាណ​៤៦ភាគរយ ចំណែក ក្រុមហ៊ុន​បរទេស​គ្រាន់តែ ជាអ្នកជីក បូម និង​ចែក​ប្រយោជន៍​ប្រេង​ជាមួយ​រដ្ឋាភិបាល។ ឧបសគ្គច្រើន និង​មិន​បាន​ទទួល​ប្រយោជន៍ច្រើន​ធ្វើ​ឲ្យ​ក្រុមហ៊ុន​ប្រេងធំៗ​របស់​អាមេរិក និង​អង់គ្លេស ជាដើម មិនចូលរួម ​នៅក្នុង​ការដាក់​ដេញថ្លៃ​លើកនេះ។ ការមើលមុខ​គ្នា​មិន​ចំ​រវាង​រដ្ឋាភិបាល​ប្រេស៊ីល និង​អាមេរិក បន្ទាប់​ពី​បែកលេច​ធ្លាយ​រឿង​ស្តាប់លួចការណ៍​សម្ងាត់​របស់​អាមេរិក​លើ​ក្រុមហ៊ុន​ប្រេង​ Petrobras ក៏​អាច​ជា​មូលហេតុ​មួយ​ដែល​ធ្វើ​ឲ្យ​ក្រុមហ៊ុន​ប្រេង​អាមេរិក​អវត្តមាន​នៅក្នុង​ការដេញថ្លៃ នៅ​ថ្ងៃ​ចន្ទនេះ។

ប្រេស៊ីល​បែរខ្នង​ដាក់​អាមេរិក។ គឺ​ចិន​ដែល​នៅ​តែ​ស្រក់​ទឹកមាត់​ចំពោះ​សម្បត្តិ​ធម្មជាតិ​សម្បូរបែប​របស់​ប្រេស៊ីល កំពុង​ចាំ​ត្រង​យក​ប្រយោជន៍។ ចិន​ដែល​ទើប​ជាប់​ចំណាត់ថ្នាក់​ជា​ប្រទេស​នាំ​ចូល​ប្រេង​ច្រើន​ជាងគេ នៅលើ​ពិភពលោក បាន​បញ្ជូន​ក្រុមហ៊ុន​ប្រេងជាតិ​របស់ខ្លួន​ធំៗ​ពីរ និង​ក្រុមហ៊ុន​ឯកជន​មួយ​ទៅ​ចូលរួម​ក្នុង​ការដេញថ្លៃ​អាងប្រេង​របស់​ប្រេស៊ីល។ តាមការសិក្សា​របស់​ស្ថាប័ន​ស្រាវជ្រាវ​Ernst &Young ក្រុមហ៊ុន​ចិន​អាច​ផ្តល់​ប្រេងច្រើន​ជាង ៥០​ភាគរយ​ដែល​ផលិត​បាន ទៅ​ឲ្យ​រដ្ឋាភិបាល​ប្រេស៊ីល។

ចិន​ហ៊ាន​ឲ្យ​ថ្លៃ ដើម្បី​បាន​ទទួល​សិទ្ធិ​ទាញ​ប្រយោជន៍​ពី​ប្រេង​ប្រេស៊ីល។ ចិន​សំឡឹង​ឃើញ​ប្រយោជន៍​ធនធាន​ធម្មជាតិ​ប្រេស៊ីល។ នេះ​មិនមែន​ជារឿង​ថ្មីទេ។ សមាជិក​ទាំងពីរ​របស់​ក្រុមប្រទេស​ទើប​មាន​សេដ្ឋកិច្ច​រីកលូតលាស់​ថ្មី ​BRICS បាន​សហការ​គ្នា តាំងពីយូរហើយ។ រហូត​មក​ចិន​​ជា​អតិថិជន​ផ្តាច់មុខ ទិញ​រ៉ែក្រោមដី​របស់ប្រទេស​ប្រេស៊ីល ក្នុង​ពេល​ប្រេស៊ីល​ក្លាយ​ជា​ទីផ្សារ​នៃ​ផលិតផល​សម្រេច​របស់​ប្រទេស​ចិន។ ជញ្ជីង​ពាណិជ្ជកម្ម​មិន​ស្មើគ្នា​នេះ​បាន​ធ្វើ​ឲ្យ​ប្រេស៊ីល​រអ៊ូ​ដាក់​ចិន​ច្រើន​ដង​មកហើយ ប៉ុន្តែ យ៉ាងណា​ក៏ដោយ ប្រេស៊ីល​នៅតែ​មិន​ខឹង និង​បោះបង់​ចោល​ដៃគូ​ដូចជា​ចិន ជាពិសេស ក្នុង​កាលៈទេសៈ​បច្ចុប្បន្ន ដែល​សេដ្ឋកិច្ច របស់​ប្រេស៊ីល នៅ​មិនទាន់​អាច​ប្រកួតប្រជែង​ជាមួយ ចិន។ ប្រេស៊ីល​នៅ​ខ្សត់ខ្សោយ​ខាងផ្នែក​ហេដ្ឋារចនាសម្ព័ន្ធ និង​សំបូរ​ដោយ​អំពើពុករលួយ ក្នុង​រដ្ឋាភិបាល។ ប៉ុន្តែ ប្រេស៊ីល​ដែល​ទើប​រកឃើញ​អាង​ប្រេង​មហាសាល សង្ឃឹម​ទាញ​ប្រយោជន៍​ពី​ប្រេង ដើម្បី​កែលម្អ កសាង​ផ្លូវថ្នល់ កំពង់ផែ ការអប់រំ និង​វិស័យ​សេវា​សាធារណៈ។ ទៅថ្ងៃមុខ ជាមួយ​នឹង​សេដ្ឋកិច្ច​បោះជំហាន​យ៉ាងលឿន ប្រេស៊ីល មិន​ត្រឹម​តែ​ក្លាយ​ជា​ដៃគូ​មិន​អាច​ខ្វះបាន​របស់​ចិន ប៉ុន្តែ ក៏​នឹង​ក្លាយ​ជា​គូប្រកួតប្រជែង​ស្មើមុខមាត់​មួយ​ជាមួយ​ចិន៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ