អានតួអត្ថបទ
កម្ពុជា​

សាលាក្តី​ខ្មែរ​ក្រហម​ទទួល​ប្រាក់​ជំនួយ​ជាង​បី​សែន​ដុល្លារ​ពី​​អង់គ្លេស

រូបសញ្ញា​តុលាការ​ខ្មែរក្រហម
រូបសញ្ញា​តុលាការ​ខ្មែរក្រហម ©រក្សាសិទ្ធិ
ដោយ៖ បូលីន ដាវីដ
១៨ នាទី

សាលាក្តី​ខ្មែរក្រហម​ បាន​ប្រកាស​ឲ្យ​ដឹង​នៅ​ថ្ងៃនេះ​ថា​ ខ្លួន​បាន​ទទួល​ជំនួយ​ពី​រដ្ឋាភិបាល​អង់គ្លេស​ ដែល​នឹង​ជួយ​បំពេញ​កង្វះ​ខាត​ថវិកា​សម្រាប់​ចុងឆ្នាំ ​២០១០​នេះ។​ ប៉ុន្តែ​សាលាក្តី​នៅ​ប្រឈមមុខ​នឹង​បញ្ហា​ថវិកា​ដដែល​សម្រាប់​គម្រោង​ឆ្នាំ ​២០១១។ ការ​អំពាវនាវ​ស្វែងរក​ជំនួយ​បន្ថែម​នៅ​តែ​ធ្វើ​បន្ត។

ផ្សាយពាណិជ្ជកម្ម

សេចក្តី​រាយការណ៍​របស់ នេត្រ ភក្ត្រា ពីទីក្រុង​ភ្នំពេញ

រដ្ឋាភិបាល​នៃ​ចក្រភព​អង់គ្លេស​បាន​ផ្តល់​ជំនួយ​ថវិកា​ចំនួន​ជាង​ ៣៣​ម៉ឺន​ដុល្លារ​អាមេរិក​ដល់​សាលាក្តី​ខ្មែរក្រហម​ ដើម្បី​បំពេញ​តម្រូវការ​ខាង​ភាគី​កម្ពុជា​ក្នុង​ចន្លោះ​ពេល​រង់ចាំ​ការ​មក​ដល់​នៃ​ជំនួយ​មកពី​ប្រទេស​ម្ចាស់​ជំនួយ​ផ្សេងៗ។​ នេះ​គឺ​ជាការ​ប្រកាស​ឲ្យ​ដឹង​របស់​សាលាក្តី​ខ្មែរក្រហម​នៅថ្ងៃ​សៅរ៍​នេះ។​ លោក​ ឌឹម ​សុវណ្ណារុំ អ្នកនាំ​ពាក្យ​សាលាក្តី​ខ្មែរ​ ក្រហម​បានថ្លែង​ឲ្យ​ដឹង​ថា​ ថវិកា​នេះ​នឹង​បំពេញ​កង្វះខាត​លើ​ការ​ចំណាយ​របស់​សាលាក្តី​សម្រាប់​ខែ​ធ្នូ ​ឆ្នាំ ​២០១០។​ រហូត​មក​ទល់​ពេលនេះ​ ប្រទេស​អង់គ្លេស​បាន​ផ្តល់​ជំនួយ​ដល់​សាលាក្តី​ខ្មែរ​ក្រហម​មាន​ចំនួន​ ៣,៧​លាន​ដុល្លារ​ហើយ។​

ប៉ុន្តែ​ទោះ​បី​យ៉ាង​ណា​ថវិកា​សម្រាប់​គម្រោង​ឆ្នាំ ​២០១១​ នៅ​តែ​ចោទ​ជា​បញ្ហា​នៅ​ឡើយ។  លោក​ ឌឹម​ សុវណ្ណារុំ​ បាន​​ឲ្យ​ដឹង​ថា​ថ្នាក់​ដឹកនាំ​សាលាក្តី​នឹង​ធ្វើ​ការការពារ​គម្រោង​ថវិកា​របស់​ខ្លួន​នៅ​ចំពោះ​មុខ​គណៈកម្មាធិការ​មួយ​នៅ​សហរដ្ឋ​អាមេរិក​ នៅ​ដើម​ខែ​មករា​ឆ្នាំ ​២០១១។

ថវិកា​ឆ្នាំ ​២០១១​ ដែល​សាលាក្តី​គ្រោង​នឹង​ចំណាយ​មាន​ចំនួន​ជាង ​៤៥ លាន​ដុល្លារ​ ក្នុង​នោះ​ភាគី​កម្ពុជា​មាន​ចំនូន​ជាង​ ១០ ​លាន​ដុល្លារ ​ហើយ​ភាគី​អង្គការ​សហ​ប្រជាជាតិ​មាន​ចំនួន​ជាង ​៣៥​លាន​ដុល្លារ។ ភាគី​អង្គការ​សហប្រជាជាតិ​នៅ​ខ្វះ​ថវិកា​ជិត​ ៣០​លាន​ដុល្លារ​ទៀត​សម្រាប់​ឆ្នាំ ​២០១១។​ ចំណែក​ភាគី​កម្ពុជា​ ត្រូវ​បាន​ លោក​ ឌឹម​ សុវណ្ណារុំ​ ឲ្យ​ដឹង​ថា ​បាន​ទទួល​ជំនួយ​ចំនួន​ជាង​ ៣​លាន​ដុល្លារ​សម្រាប់​គម្រោង​ថវិកា​ឆ្នាំ ​២០១​។

         ដោយលើក​ឡើង​ថា​ ឆ្នាំ ​២០១១​ ជា​ដំណាក់​កាល​ដ៏​សំខាន់​របស់​សាលាក្តី​ក្នុង​ការ​បើក​ការ​ជំនុំ​ជម្រះ​លើ​អតីត​មេដឹកនាំ​ខ្មែរក្រហម​ក្នុង​សំណុំ​រឿង​០០២​ អ្នកនាំ​ពាក្យ​សាលាក្តី ​លោក​ ឌឹម​ សុវណ្ណារុំ ​បាន​អំពាវនាវ​ដល់​ប្រទេស​ម្ចាស់​ ជំនួយ​នានា​បន្ត​ផ្តល់​វិភាគទាន​បន្ថែម​ទៀត។​ គួរ​បញ្ជាក់​ថា​ នៅក្នុង​ជំនួប​ជាមួយ​មន្ត្រី​ជាតិ ​និង​អន្តរជាតិ​នៃ​សាលាក្តី​ខ្មែរ​ ក្រហម​នា​ពេល​កន្លង​មក អគ្គលេខាធិការ​អង្គការ​សហប្រជាជាតិ​ បាន ​គីមូន​ បាន​ថ្លែង​ថា សូម​កុំ​ឲ្យ​មាន​ការព្រួយ​បារម្ភ​ពី​បញ្ហា​កង្វះ​ថវិកា​ លោក​នឹង​កៀង​គរ​ប្រទេស​ម្ចាស់​នានា​ ដើម្បី​ផ្តល់​ជំនួយ​ដល់​សាលាក្តី​ខ្មែរ​ក្រហម៕  

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ