កម្ពុជា​

មេធាវី សុំ​ឲ្យ​តុលាការ​កំពូល​ដោះលែង ឌុច

ឌុច អតីត​មេគុក​ទួល​ស្លែង
ឌុច អតីត​មេគុក​ទួល​ស្លែង ©សុវណ្ណារា

នៅ​ថ្ងៃ​ចន្ទ​នេះ សហ​មេធាវី​ការពារ ឌុ​ច បាន​ស្នើ​ទៅ​កាន់​តុលាការ​កំពូល ឲ្យ​ដោះលែង ឌុច អតីត​មេ​គុក​ទួលស្លែង ព្រោះថា ឌុច មិនមែន​ជា​ប្រភេទ​មេដឹកនាំ​ខ្មែរក្រហម ដែល​ត្រូវ​ចាប់ មក​កាត់​ទោស​​ឡើយ។ ក៏ប៉ុន្តែ​សហព្រះរាជអាជ្ញា បាន​ច្រានចោល​នូវ​ការ​លើក​ឡើង​របស់​មេធាវី និង​ស្នើ​ឲ្យ​តុលាការ​កំពូល របស់​សាលាក្តី​ខ្មែរក្រហម បដិសេធ​បណ្តឹង​របស់​មេធាវី ទុក​ជា​អសារបង់។

ផ្សាយពាណិជ្ជកម្ម

សេចក្តី​រាយការណ៍​របស់ លី ម៉េងហួរ ពីទីក្រុង​ភ្នំពេញ

អង្គ​ជំនុំ​ជម្រះ​តុលាការ​កំពូល របស់​សាលាក្តី​ខ្មែរក្រហម បាន​បើក​សវនាការ លើ​បណ្តឹង​សាទុក្ខ ក្នុង​សំណុំរឿង​ក្តី ០០១ របស់ កាំង ហ្កេកអ៊ាវ ហៅ ឌុច នា​ថ្ងៃ​ទី​២៨​មីនា ឆ្នាំ​២០១១។ សវនាការ​ជំនុំជម្រះ​នេះ ធ្វើឡើង​ចាប់ពី​ថ្ងៃ​ចន្ទ ទី​២៨ ដល់​ថ្ងៃ​ទី​៣០មីនា ឆ្នាំ​២០១១។ សវនាការ​ករណី ឌុច ពេលនេះ មិន​មាន​សាក្សី ឬ​អ្នកជំនាញ​ទេ ហើយ​ក៏​មិន​ជជែក​ពី​ការធ្វើ​ទារុណកម្ម សម្លាប់​មនុស្ស​នៅ​គុក​ទួលស្លែង ដូច​សវនាការ​លើក​មុន​ឡើយ។​

​សវនាការ​រយៈពេល​ពេញ​មួយ​ថ្ងៃ​ចន្ទ​នេះ ជា​ការលើក​ឡើង​ពី​យុត្តាធិការ​លើ​បុគ្គល ដែល​ជា​ការ​តវ៉ា​ផ្ទាល់មាត់​របស់​មេធាវី​ការពារ​ក្តី សហព្រះរាជអាជ្ញា និង​ដើម​បណ្តឹង​រដ្ឋប្បវេណី​ក្រុម ៣។ ពោល​គឺ​ជា​ការ​លើក​អំណះអំណាង​ផ្លូវ​ច្បាប់​រៀង​ខ្លួន ថា​តើ​ឌុច ជា​ប្រភេទ​មេ​ខ្មែរក្រហម ដែល​ត្រូវ​យក​មក​កាត់ទោស នៅ​តុលាការ​ចម្រុះ​កាត់ទោស​មេ​ខ្មែរក្រហម នា​ពេលនេះ តើ​ត្រូវ​ឬ​ខុស?

ក្នុង​អង្គ​សវនាការ សហមេធាវី​ការពារ ឌុច លោក​មេធាវី ការ សាវុត្ថ និង​លោក​មេធាវី កង ឫទ្ធារី បាន​ស្នើ​សុំ​ដោយ​ផ្ទាល់​មាត់ ឲ្យ​អង្គ​ជំនុំជម្រះ​តុលាការ​កំពូល ដោះលែង​អតីត​មេគុក​ទួលស្លែង កាំង ហ្កេកអ៊ាវ ហៅ ឌុច។ មេធាវី សំអាង​ថា ឌុច មិន​ស្ថិត​ក្នុង​យុត្តាធិការ របស់​តុលាការ​ខ្មែរ​ក្រហម​ឡើយ។
​លោក​មេធាវី ការ សាវុត្ថ បាន​លើក​ឡើង​ថា កិច្ចព្រមព្រៀង​រវាង​រដ្ឋាភិបាល និង​អង្គការ​សហប្រជាជាតិ បាន​កម្រិត​កំណត់​កាត់ទោស​តែ​លើ​មេដឹកនាំ​ជាន់ខ្ពស់​របប​កម្ពុជា​ប្រជាធិបតេយ្យ និង​អ្នក​ទទួល​ខុស​ត្រូវ​ជាន់​ខ្ពស់។ ចំណែក ឌុច ជា​ថ្នាក់​ក្រោម​បំផុត នៅ​មូលដ្ឋាន។ ម្យ៉ាងទៀត​ក្នុង​ជួរ​បក្ស ឌុច ជា​លេខា​តូចតាច មិន​មាន​សិទ្ធិ​អំណាច​អ្វី អាច​ធ្វើ​សេចក្តី​សម្រេច ឬ​ក៏​ចាត់ចែង ខុសពី​សេចក្តី​សម្រេច​របស់​បក្ស​ថ្នាក់​លើ​បាន​ទេ។

​លោក​មេធាវី ការ សាវុត្ថ បាន​បន្ថែម​ថា ឌុច ជា​ប្រធាន​ឆ្មាំ​គុក ដូច​ប្រធាន​ឆ្មាំ​គុក ទាំង ១៩៥ ឯ​ទៀត​ក្នុង​សម័យ​ខ្មែរក្រហម។ ប្រធាន​គុក​ខ្មែរក្រហម​ទាំង ១៩៥ មិន​ត្រូវបាន​ចាប់​មក​កាត់ទោស​ឡើយ។​
លោក​មេធាវី ស្នើ​ដល់​អង្គ​ជំនុំជម្រះ​តុលាការ​កំពូល ចាត់ទុក​សាលក្រម​លើ​សំណុំ​រឿង​០០១ របស់​អង្គ​ជំនុំជម្រះ​សាលាដំបូង ជា​មោឃៈ និង​ដោះលែង ឌុច។ ទី​២-​ កំណត់ថា ការ​ឃុំ​ខ្លួន ឌុច កន្លង​មក ជា​ការការពារ​សាក្សី ដែល​មាន​សក្តានុពល ដើម្បី​ចង្អុល​បង្ហាញ​ពី​មេដឹកនាំ​ជាន់ខ្ពស់​របស់​ខ្មែរក្រហម។​

យ៉ាងណាក៏ដោយ សហ​ព្រះរាជអាជ្ញា​ជាតិ លោកស្រី ជា លាង បាន​ច្រានចោល​នូវ​ការ​លើក​ឡើង​របស់​មេធាវី​ការពារ ឌុច។ ​លោកស្រី ជា លាង បាន​មាន​ប្រសាសន៍​ក្នុង​អង្គ​សវនាការ​ថា ការ​បក​ស្រាយ​របស់​មេធាវី​ការពារ​ក្តី កាំង ហ្កេកអ៊ាវ ហៅ ឌុច សហ​ព្រះរាជអាជ្ញា​មិន​អាច​ទទួល​យក​បាន​ឡើយ ហើយ​សុំ​ឲ្យ​អង្គ​ជំនុំ​ជម្រះ​តុលាការ មេត្តា​បដិសេធ​បណ្តឹង​សាទុក្ខ​របស់​មេធាវី​ការពារ​ក្តី​ចោល​ជា​អសារបង់។
​លោកស្រី​ព្រះរាជ​អាជ្ញា បាន​បន្ត​ថា ឌុច មិន​អាច​ចាត់ទុក​ថា ជា​សាក្សី​ដែល​មាន​សក្តានុពល នៅ​ក្នុង​សំណុំ​រឿង​០០១ បាន​ទេ ពីព្រោះ​ឌុច បាន​ទទួល​ស្គាល់​អំពី​តួនាទី និង​សិទ្ធិ​អំណាច​របស់​ខ្លួន ជាពិសេស​ទទួល​ស្គាល់​ចំពោះ​ឧក្រិដ្ឋកម្ម ដែល​បាន​កើត​ឡើង​នៅ​មន្ទីរ​ស​២១ ក្នុង​នាម​ជា​ប្រធាន​មន្ទីរ​សន្តិសុខ ស​២១។
 

សវនាការ​លើ​បណ្តឹង​សាទុក្ខ​ក្នុង​ករណី​០០១ របស់​ឌុច នឹង​ធ្វើ​ឡើង​បន្ត​នៅ​ថ្ងៃ​អង្គារ ទី​២៩​មីនា ឆ្នាំ​២០១១ ដោយ​ផ្តោត​​លើ​ឧក្រិដ្ឋកម្ម​ប្រឆាំង​នឹង​មនុស្សជាតិ ដែល​ជា​ការតវ៉ា​ផ្ទាល់មាត់ រវាង​សហ​ព្រះរាជអាជ្ញា និង​សហ​មេធាវី​ការពារ​ក្តី៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI