កម្ពុជា​-​ចិន

ចិន​ជួយ​១៦០០​លាន​ដុល្លារ​ដើម្បី​​អភិវឌ្ឍន៍​កម្ពុជា​

ពីធី​​ចុះ​​ហត្ថលេខា​​លើ​​គម្រោង​​សហប្រតិបត្តិការ និង​​ជំនួយ​ ថ្ងៃ​ទី​៤​វិច្ឆិកា ២០១០
ពីធី​​ចុះ​​ហត្ថលេខា​​លើ​​គម្រោង​​សហប្រតិបត្តិការ និង​​ជំនួយ​ ថ្ងៃ​ទី​៤​វិច្ឆិកា ២០១០ ©សុវណ្ណារ៉ា

រាល់​ដំណើរ​ទស្សនកិច្ច​របស់​មេដឹកនាំ​កំពូល​របស់​ប្រទេស​ចិន​ប្រជាមានិត តែង​មាន​នាំ​យក​ជំនួយ​មហាសាល ជា​ជំនួយ​ឥត​សំណង​ក្តី ជា​សម្បទាន​ក្តី មក​អោយ​កម្ពុជា។ ដំណើរ​ទស្សនកិច្ច​របស់​ប្រធាន​សភា​ប្រជាជន​ចិន លោក ​វូ បាំងហ្គួ​ នៅ​ពេល​នេះ គម្រោង​សហប្រតិបត្តិការ​ចំនួន​២៣​មាន​តម្លៃ​១៦០០​លាន​ដុល្លារ​ត្រូវ​បាន​ចុះ ​ហត្ថលេខា​កាល​ពី​ល្ងាច​ថ្ងៃ​ទី​៤​វិច្ឆិកា​ម្សិលមិញ។ ជំនួយ និង​ជំនួញ​របស់​ប្រទេស​ចិន​មាន​ច្រើន​អនេក​នៅ​កម្ពុជា។

ផ្សាយពាណិជ្ជកម្ម

 

សេចក្តី​រាយការណ៍​របស់ លាង ដឺលុច ពីទីក្រុង​ភ្នំពេញ

ប្រធាន​សភា​ប្រជាជន​ចិន​លោក វូ បាំងហ្គួ និង​លោក​នាយក​រដ្ឋមន្ត្រី​ ហ៊ុន សែន​ បាន​ធ្វើ​ជា​អធិបតី​ក្នុង​ពីធី​ចុះ​ហត្ថលេខា​លើ​គម្រោង​សហប្រតិបត្តិការ និង​ជំនួយ​ចំនួន​២៣ កាល​ពី​ព្រលប់​ថ្ងៃទី​៤​វិច្ឆិកា​ម្សិលមិញ។ គម្រោង​ទាំងនោះ​មាន​តម្លៃ​រហូត​ដល់​១៦០០​លាន​ដុល្លារ ស្ថិត​នៅក្នុង​ក្របខ័ណ្ឌ​នៃ​កិច្ចការ​អភិវឌ្ឍន៍​ឆ្នាំ​២០១០-២០១៥​នៅ​កម្ពុជា។ មាន​រដ្ឋមន្ត្រី​របស់​រដ្ឋាភិបាល​កម្ពុជា​ចំនួន​៥​រូប និង​ប្រធាន​សភា​ពាណិជ្ជកម្ម​កម្ពុជា​ដែល​ជា​អ្នក​ចុះ​ហត្ថលេខា​ជាមួយ​ភាគី​ពាក់ព័ន្ធ​របស់​ប្រទេស​ចិន​ដើម្បី​ទទួល​ជំនួយ និង​គម្រោង​អភិវឌ្ឍន៍​ទាំងនោះ។

         គម្រោង​ដែល​ត្រូវ​បាន​ចុះ​ហត្ថលេខា​ផ្តោត​ទៅ​លើ​ការ​ពង្រីក​ផ្នែក​ប្រព័ន្ធ​បច្ចេកវិទ្យា​របស់​ទីស្តី​ការ​គណៈរដ្ឋមន្ត្រី ការ​សាងសង់​ស្ពាន​ក្រុង​តាខ្មៅ គម្រោង​អភិវឌ្ឍន៍​ហេដ្ឋារចនា​សម្ព័ន្ធ​ធនធាន​ទឹក​ រូម​មាន​នៅ​ព្រែក​ស្ទឹងកែវ ខេត្ត​កំពត គម្រោង​អភិវឌ្ឍន៍​ស្ទឹង​ពោធិសាត់ គម្រោង​សាងសង់​កំពង់ផែ​ភ្នំពេញ គម្រោង​សិក្សា​សមិទ្ធិ​លទ្ធភាព​អំពី​គម្រោង​វារី​អគ្គីសនី​ស្ទឹង​ជែងអារែង​នៅ​ខេត្ត​កោះកុង គម្រោង​វារីអគ្គីសនី​សំបូរ នៅ​ខេត្ត​ក្រចេះ គម្រោង​វារី​អគ្គីសនី​ស្រែពក ខេត្ត​ស្ទឹងត្រែង។ ក្រៅពីនេះ ក្រុមហ៊ុន​ផ្គត់ផ្គង់​សេវា​ទូរស័ព្ទ​CamGSM​របស់​កម្ពុជា​ក៏​បាន​ចុះ​ហត្ថលេខា​លើ​គម្រោង​សហប្រតិបត្តិការ​ជាមួយ​ចិន​ដែល​មាន​តម្លៃ​៥៩១​លាន​ដុល្លារ​ផង​ដែរ។

         ចិន​ក៏​មាន​បំណង​ចង់​ជួយ​កសាង​ផ្លូវ​ដែក​អោយ​កម្ពុជា​ផង​ដែរ។ ជា​ផ្លូវដែក​ឆ្ពោះ​ទៅ​កាន់​ប្រទេស​វៀតណាម។ លោក​ ខៀវ កាញារីទ្ធ​ អ្នក​នាំ​ពាក្យ​រដ្ឋាភិបាល​ត្រូវ​បាន​ទីភ្នាក់ងារ​AFP​ស្រង់​សំដី​ដែល​និយាយ​ថា លោក​ប្រធាន​រដ្ឋសភា​ចិន​បាន​ប្រាប់​លោក​នាយក​រដ្ឋមន្ត្រី​ខ្មែរ​ ហ៊ុន សែន ថា​ប្រទេស​ចិន​គ្មាន​បំណង​ចង់​ពង្រីក​អំណាច និង​ធ្វើ​ជា​ម្ចាស់​នៅក្នុង​តំបន់​នោះ​ទេ។

         មក​ដល់​ពេលនេះ មាន​ក្រុមហ៊ុន​ចិន​ជិត​៤០០​ក្រុមហ៊ុន បាន​បោះទុន​វិនិយោគ​រាប់ពាន់​លាន​ដុល្លារ​នៅ​ប្រទេស​កម្ពុជា៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI