កម្ពុជា​

កម្ពុជា ឥណ្ឌូណេស៊ី ថៃ កំពុង​រៀបចំ​បែបបទ​ការងារ​សង្កេតការណ៍

លោក​នាយក​រដ្ឋមន្ត្រី​ខ្មែរ និង​បេសកជន​ពិសេស​របស់​យូណេស្កូ
លោក​នាយក​រដ្ឋមន្ត្រី​ខ្មែរ និង​បេសកជន​ពិសេស​របស់​យូណេស្កូ © Reuters

ប្រទេស​ឥណ្ឌូណេស៊ី​ដែល​ទទួល​បន្ទុក​សង្កេតការណ៍ លើ​បទ​ឈប់​បាញ់​រវាង​កម្ពុជា និង​ថៃ​នៅ​តាម​ព្រំដែន​នោះ កំពុង​ធ្វើ​លិខិត​ឆ្លើយឆ្លង​ជាមួយ​ប្រទេស​ទាំងពីរ ស្តី​ពី​បែប​បទ​ការងារ​ សម្រាប់​ការ​សង្កេតការណ៍។ លោក កុយ គួង​ អ្នកនាំពាក្យ​ក្រសួង​ការបរទេស​កម្ពុជា​បាន​អះអាង​អោយ​ដឹង​ថា កម្ពុជា​បាន​ឆ្លើយ​តប​ជា​វិជ្ជមាន​គាំទ្រ​សេចក្តី​ព្រាង​ស្តីពី​បែបបទ​ ការងារ​សង្កេតការណ៍​ទៅ​រដ្ឋាភិបាល​ឥណ្ឌូណេស៊ី ក្នុងនាម​ជា​ប្រធាន​អាស៊ាន​រួចហើយ។

ផ្សាយពាណិជ្ជកម្ម

សេចក្តី​រាយការណ៍​របស់ លាង ដឺលុច ពីទីក្រុង​ភ្នំពេញ

រដ្ឋាភិបាល​ឥណ្ឌូណេស៊ី​កំពុង​រៀបចំ​សេចក្តីព្រាង​បែបបទ​ការងារ​សម្រាប់​ក្រុម​អ្នក​សង្កេតការណ៍​របស់​ខ្លួន​៣០​នាក់ ដែល​ត្រូវ​មក​បំពេញ​បេសកកម្ម​នៅ​តំបន់​ព្រំដែន​ប្រាសាទ​ព្រះវិហារ​ខ្មែរ។ ជា​បេសកកម្ម​សង្កេតការណ៍​បទ​ឈប់​បាញ់​រវាង​កម្ពុជា និង​ថៃ​នៅ​តាម​ព្រំដែន។ អ្នកនាំពាក្យ​ក្រសួង​ការបរទេស​កម្ពុជា​លោក កុយ គួង​ មិនទាន់​អាច​បង្ហាញ​ពី​ខ្លឹមសារ​នៃ​សេចក្តីព្រាង​បែប​បទ​ការងារ​របស់​អ្នកសង្កេតការណ៍​នេះ​នៅ​ឡើយ​ទេ។ ប៉ុន្តែ​លោក​អះអាង​ថា ឥណ្ឌូណេស៊ី​បាន​ផ្ញើ​សេចក្តីព្រាង​បែបបទ​បំពេញ​ការងារ​នេះ​មក​បង្ហាញ​កម្ពុជា ហើយ​រដ្ឋាភិបាល​កម្ពុជា​បាន​យល់ស្រប និង​យល់ព្រម​តាម​បែបបទ​នោះ​ហើយ។ ទោះយ៉ាងនេះ​ក្តី អ្នក​នាំពាក្យ​រូប​នេះ​បញ្ជាក់​ថា លោក​នៅ​មិនទាន់​ទទួល​បាន​ព័ត៌មាន​អំពី​កាលបរិច្ឆេទ​នៃ​ការ​មក​ដល់​នៃ​ក្រុម​អ្នក​សង្កេតការណ៍​ឥណ្ឌូណេស៊ី​នៅ​ឡើយ​ទេ។ ក្រុម​អ្នក​សង្កេតការណ៍​ឥណ្ឌូណេស៊ី​ដែល​មិន​កាន់​អាវុធ នឹង​អាច​ឈរ​ជើង​ជាមួយ​កងទ័ព​កម្ពុជា​និង​ថៃ ម្ខាងៗ​១៥​នាក់។

         យោងតាម​ការ​លើក​ឡើង​របស់​លោក កុយ គួង ទន្ទឹម​នឹង​ការ​ឆ្លើយ​តប​ជា​វិជ្ជមាន​ទៅ​ប្រទេស​ឥណ្ឌូណេស៊ី កម្ពុជា​ក៏​បាន​បង្ហាញ​ជំហរ​ច្បាស់លាស់​របស់ខ្លួន​ផង​ដែរ​ថា កម្ពុជា​នឹង​យល់ព្រម​ទទួល​យក​អ្នកសង្កេតការណ៍​ឥណ្ឌូណេស៊ី​នៅក្នុង​តំបន់​ព្រំដែន​នេះ រហូត​ដល់​បញ្ហា​ត្រូវបាន​ដោះស្រាយ។ ហើយថា បើទោះជា​នៅ​ក្នុង​ឆ្នាំ​២០១១​នេះ បញ្ហា​នៅ​មិនទាន់​ត្រូវ​បាន​ដោះស្រាយ​ចប់​សព្វ​គ្រប់​នោះ ហើយ​ដល់​ឆ្នាំ​ក្រោយ​ដែល​កម្ពុជា​ត្រូវ​ដល់​វេន​ធ្វើជា​ប្រធាន​អាស៊ាន​ក៏ដោយ ក៏​កម្ពុជា​នឹង​ត្រូវការ​អ្នក​សង្កេតការណ៍​ឥណ្ឌូណេស៊ី​នៅ​បន្ត​បេសកកម្ម​របស់​ខ្លួន​ដដែល។

         អ្នកនាំពាក្យ​ក្រសួង​ការបរទេស​កម្ពុជា​ពន្យល់​ថា​កម្ពុជា​សម្រេច​យក​អ្នក​សង្កេតការណ៍​ឥណ្ឌូណេស៊ី​ជា​រៀង​រហូត​យ៉ាង​នេះ​ដោយសារ​តែ ទី១ អ្នកសង្កេតការណ៍​ឥណ្ឌូណេស៊ី​នឹង​មាន​បទពិសោធន៍ ស្គាល់​ការងារ​ស្រាប់ បន្ទាប់ពី​ទទួល​បេសកកម្ម​នេះ។ ទី២ គឺ​ដោយសារ​ឥណ្ឌូណេស៊ី​បាន​បង្ហាញ​ឆន្ទៈ​ក្នុងការ​ជួយ​ដោះស្រាយ​វិបត្តិ​កម្ពុជា​ថៃ​នេះ និង​ទី​៣ គឺ​ដោយសារ​ឥណ្ឌូណេស៊ី​មាន​ប្រវត្តិ​ជួយ​កម្ពុជា​ក្នុងការ​ស្វែង​រក​សន្តិភាព​រហូត​ដល់​មាន​កិច្ចព្រមព្រៀង​ទីក្រុង​ប៉ារីស។

         បើទោះជា​មិនទាន់​មាន​វត្តមាន​អ្នកសង្កេតការណ៍​ឥណ្ឌូណេស៊ី​ក៏ដោយ ការសង្កេតការណ៍​លើ​តំបន់​ព្រំដែន​ពីអន្តរជាតិ​នៅតែ​មាន​បន្ត។ ទន្ទឹម​វត្តមាន​អនុព័ន្ធ​យោធា​ប្រចាំ​ស្ថានទូត​ឥណ្ឌូណេស៊ី​នៅ​ព្រំដែន និង​ទស្សនកិច្ច​របស់​បេសកជន​ពិសេស​របស់​យូណេស្កូ​នៅ​កម្ពុជា នៅថ្ងៃ​ទី​៣​មីនា​ខាន​ស្អែក​នេះ ក្រសួង​ការពារ​ជាតិ​កម្ពុជា​នឹង​នាំ​អនុព័ន្ធយោធា​ប្រចាំ​ស្ថានទូត​ចំនួន​១៩​ប្រទេស​ទៅ​ត្រួត​ពិនិត្យ​តំបន់​ប៉ះ​ទង្គិច​គ្នា​នៅ​ព្រំដែន​ប្រាសាទ​ព្រះវិហារ​ផងដែរ៕ 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI