កម្ពុជា

កម្ពុជា​ ជម្រុញ​ឲ្យ​ឡាវ​ ភូមា​ វៀតណាម​ និង​ថៃ​ រួមគ្នា​នាំ​ចេញ​អង្ករ​

ក្នុងកិច្ច​ប្រជុំ​កំពូល AMECS​ ដែលធ្វើឡើងនៅថ្ងៃពុធ​ទី​១៧​វិច្ឆិកា​នេះ​ កម្ពុជា​ ជម្រុញ​ឲ្យ​ឡាវ​ ភូមា វៀតណាម និង ថៃ រួមគ្នា​នាំចេញ​អង្ករ​
ក្នុងកិច្ច​ប្រជុំ​កំពូល AMECS​ ដែលធ្វើឡើងនៅថ្ងៃពុធ​ទី​១៧​វិច្ឆិកា​នេះ​ កម្ពុជា​ ជម្រុញ​ឲ្យ​ឡាវ​ ភូមា វៀតណាម និង ថៃ រួមគ្នា​នាំចេញ​អង្ករ​ © សុវណ្ណារ៉ា

លោក​នាយក​រដ្ឋមន្ត្រី ហ៊ុន សែន បាន​ជម្រុញ​ឲ្យ​បណ្តា​ប្រទេស​ជា​សមាជិក ACMECS ដែល​រួម​មាន​៖ កម្ពុជា ឡាវ ភូមា វៀតណាម និង​​ថៃ ខិតខំ​ពង្រឹង​ឲ្យ​កាន់តែ​ខ្លាំង​ថែម​ទៀត ក្នុង​កិច្ច​សហប្រតិបត្តិការ​​​លើ​វិស័យ​កសិកម្ម​និង​ការ​នាំចេញ​ស្រូវ​អង្ករ ព្រោះថា ​បណ្តា​ប្រទេស​ទាំង​៥​នេះ គឺ​ជា​ជម្រុក​ស្រូវ​ដ៏​សំខាន់​របស់​ពិភពលោក។

ផ្សាយពាណិជ្ជកម្ម

សេចក្តីរាយការណ៍​របស់ លី ម៉េងហូរ

ក្នុង​កិច្ចប្រជុំ​កំពូល ACMECS លើក​ទី ៤ ដែល​បាន​ធ្វើ​ឡើង​នៅ​ថ្ងៃ​ពុធ​​ទី​១៧​វិច្ឆិកា​នៅ​ទីក្រុង​ភ្នំពេញ លោក​នាយក​រដ្ឋមន្ត្រី ហ៊ុន សែន បាន​លើក​ឡើង​ថា ប្រទេស ACMECS ដែល​រួម​មាន​ កម្ពុជា ឡាវ ភូមា វៀតណាម និង​ប្រទេស​ថៃ គឺ​ជា​ជម្រុក​ស្រូវ​ដ៏​សំខាន់​មួយ​របស់​ពិភពលោក​។ ក្នុង​នោះ ប្រទេស​ថៃ និង​វៀតណាម បាន​ទទួល​លំដាប់ថ្នាក់​ជា​ប្រទេស​ទី​១ និង​ទី​២ ក្នុង​ការ​នាំ​ចេញ​​ស្រូវ​អង្ករ ក្នុង​ពិភពលោក។ ចំណែក​ប្រទេស​ភូមា ក៏​មានសក្តានុពល​ខ្ពស់​ដែរ ក្នុង​វិស័យ​នេះ។

 
ចំពោះ​មុខ​នាយក​រដ្ឋមន្ត្រី​បណ្តា​ប្រទេស​សមាជិក ACMECS លោក​នាយក​រដ្ឋមន្ត្រី ហ៊ុន សែន បាន​លើកឡើង​ថា កម្ពុជា​បាន​ផ្តល់​អាទិភាព​ខ្ពស់​លើ​ការ​ខិតខំ​ប្រឹងប្រែង​លើក​ស្ទួយ​ផលិតកម្ម​ស្រូវ និង​ការនាំចេញ​អង្ករ ដោយ​បាន​ដាក់​ចេញ​នូវ​គោល​នយោបាយ​ជម្រុញ​ផលិតកម្ម​ស្រូវ និង​​ការ​នាំចេញ​អង្ករ កាលពី​ពេល​ថ្មីៗ​នេះ។

ក្រោយ​កិច្ចប្រជុំ​កំពូល​ក្នុង​តំបន់ នៅ​រសៀល​ថ្ងៃ​ពុធ​នេះ លោក​នាយក​រដ្ឋមន្ត្រី ហ៊ុន សែន បាន​គូស​បញ្ជាក់​ថា ចំនួន​នៃ​ការ​នាំចេញ​ផលិតផល​អង្ករ ក្នុង​ចំណោម​បណ្តា​ប្រទេស ACMECS ទាំង​៥ ប្រទេស គឺ​ស្មើ​នឹង ៤៥% នៃ​ការផ្គ​ត់ផ្គង់​អង្ករ​លើ​ទីផ្សារ​ពិភពលោក។

យ៉ាងណាក៏ដោយ លោក​នាយក​រដ្ឋមន្ត្រី ហ៊ុន សែន បាន​បញ្ជាក់​ថា ប្រសិនបើ​ការ​បង្កើត​សមាគម​នាំចេញ​អង្ករ ឬ​យន្តការ​ណា​មួយ​របស់ ACMECS ត្រូវ​កើត​ឡើង​លើ​ការនាំចេញ​អង្ករ​នោះ​មិនមែន មាន​ន័យថា ACMECS ជា​អង្គការ សម្រាប់​ការ​តថ្លៃ របៀប​ដូច​អង្គការ OPEC នៃ​បណ្តា​ប្រទេស​ផលិត​ប្រេងកាត ដើម្បី​ដំឡើង​​ថ្លៃ​ប្រេង ឬ​ក៏​ទម្លាក់​ថ្លៃ​ប្រេង​នោះ​ទេ។
តាម​លោក​នាយក​រដ្ឋមន្ត្រី គោលបំណង​របស់ ACMECS ដែល​ចង់​ធ្វើ​ជា​សមាគម​នាំ​អង្ករ គឺ​ចង់​ជួយ​ទ្រទ្រង់​ធានា​ស្ថិរភាព​ស្បៀង នៅលើ​ពិភពលោក យ៉ាងហោច​ណាស់​នៅ​ក្នុង​តំបន់ ដែល​កំពុង​ទទួល​រងគ្រោះ​ពី​ការ​ប្រែប្រួល​អាកាសធាតុ ក្នុង​នោះ ប្រទេស​ក្នុង​តំបន់​មួយ​ចំនួន រងគ្រោះ​ដោយសារភាព​​រាំងស្ងួត និង​គ្រោះ​ទឹកជំនន់។

ក្រៅពី​សហប្រតិបត្តិការ​លើ​វិស័យ​ពាណិជ្ជកម្ម សេដ្ឋកិច្ច បញ្ហា​ប្រែប្រួល​អាកាសធាតុ​ដែល​បង្ក​ជា​គ្រោះទឹកជំនន់ នៅ​កម្ពុជា ថៃ និង​វៀតណាម នាពេលនេះ ក៏​ជា​ប្រធានបទ​នៃ​កិច្ចប្រជុំ​កំពូល រវាង​នាយករដ្ឋមន្ត្រី​កម្ពុជា ឡាវ​ភូមា វៀតណាម និង​នាយករដ្ឋមន្ត្រី​ថៃ នា​ព្រឹក​ថ្ងៃ​ទី​១៧​វិច្ឆិកា​នេះ​ផង​ដែរ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI