កម្ពុជា

លោក​នាយក​រដ្ឋមន្ត្រី​សង្ឃឹម​លើ​ការ​អភិវឌ្ឍន៍​ខេត្ត​ព្រះសីហនុ

តំបន់​ឆ្នេរ​សមុទ្រ​ក្រុង​ព្រះសីហនុ​
តំបន់​ឆ្នេរ​សមុទ្រ​ក្រុង​ព្រះសីហនុ​ RFI/Chan Lida

ស្ពាន​ដំបូង​ឆ្លង​ពី​ដី​គោក​ខេត្ត​ព្រះសីហនុ​ទៅ​កោះពស់ ដែល​ស្ថិត​នៅ​ក្នុង​គម្រោង​អភិវឌ្ឍន៍​របស់​ក្រុមហ៊ុន​​រុស៊្សី​លើ​កោះ​ពស់​នោះ​ ត្រូវ​បាន​ដាក់​សម្ពោធ​អោយប្រើប្រាស់​ជា​ផ្លូវការ​ហើយ​​នៅ​ថ្ងៃ​នេះ។ នៅក្នុង​ឱកាស​ធ្វើ​ជា​អធិបតី​សម្ពោធ​ស្ពាន​ ដែល​មាន​តម្លៃ​៣០លាន​ដុល្លារ​នេះ លោក​នាយក​រដ្ឋ​មន្ត្រី​ហ៊ុន សែន​បាន​​បង្ហើប​ពី​​សក្តានុពល​សេដ្ឋកិច្ច ​និង​​ការ​​អភិវឌ្ឍន៍​​ដែល​​នឹង​កើត​មាន​​នៅ​ក្នុង​​ខេត្ត​​ព្រះសីហនុ។

ផ្សាយពាណិជ្ជកម្ម

ស្ពាន​ឆ្លងកាត់​សមុទ្រ​ទៅ​កោះពស់​តម្លៃ​៣០​លាន​ដុល្លារ។ ស្ពាន​នេះ​ស្ថិត​នៅក្នុង​គម្រោង​អភិវឌ្ឍន៍​រមណីយដ្ឋាន​ទេសចរ​កោះពស់​របស់​ក្រុមហ៊ុន​រុស៊្សី​ដែល​មាន​តម្លៃ​៣០០​លាន​ដុល្លារ។ ឆ្នេរ​សមុទ្រ​កម្ពុជា​ជាប់ឆ្នោត​ចូលជា​សមាជិក​ក្លឹប​ឆ្នេរសមុទ្រ​ស្អាត។ ចំនួន​ទេសចរ​កើនឡើង​ជា​រៀងរាល់​ឆ្នាំ​នៅក្នុង​ខេត្ត​ជាប់​សមុទ្រ​មួយ​នេះ។ តំបន់​សេដ្ឋកិច្ច​ពិសេស​ចំនួន​ពីរ​កំពុង​ត្រូវ​សាងសង់​នៅ​ទី​នោះ។​ ហើយ​នៅ​ថ្ងៃទី​១២ ខែ​ធ្នូ ឆ្នាំ​២០១២ កម្ពុជា​នឹង​ចាប់ផ្តើម​ចម្រាញ់​ប្រេងបាត​សមុទ្រ​ជា​លើក​ដំបូង។ សកម្មភាព​ដែល​បង្ហាញ​ពី​សក្តានុពល​សេដ្ឋកិច្ច​ទាំងនេះ​នៅក្នុង​ខេត្ត​ព្រះសីហនុ​ត្រូវបាន​លោក​នាយករដ្ឋមន្ត្រី​ហ៊ុន សែន​រៀបរាប់​អោយ​ដឹង​នៅក្នុង​ពិធី​សម្ពោធ​បើក​អោយ​ប្រើប្រាស់​ស្ពាន​ដែល​មាន​ឈ្មោះ​ថា តេជោ​មរកត​ នៅក្នុង​ខេត្ត​ព្រះសីហនុ​កាល​ពីព្រឹកមិញ​នេះ។

ប្រមុខ​រដ្ឋាភិបាល​កម្ពុជា​បាន​អត្ថាធិប្បាយ​ផ្តោតក្តី​សង្ឃឹម​ខ្លាំង​ទៅលើ ​ការ​រីកចម្រើន​នៅក្នុង​ខេត្ត​ទេសចរ​មួយ​នេះ​និយាយ​ដោយ​ឡែក និង​ការ​អភិវឌ្ឍន៍​នៅ​តាម​តំបន់​ឆ្នេរ​សមុទ្រ​ប៉ែក​និរតី​ប្រទេស​និយាយ​ជារួម។ តំបន់​ឆ្នេរ​ដែល​លោក​ចាត់ទុក​ថា​ជា​ក្បាលនាគ​នៃ​ការ​អភិវឌ្ឍន៍​សេដ្ឋកិច្ច​កម្ពុជា​ផង។

ប្រធាន​សមាគម​សេដ្ឋកិច្ច​កម្ពុជា​លោក​ចាន់ សុផល​បាន​ថ្លែង​ស្រដៀងគ្នា​នឹង​លោក​នាយក​រដ្ឋមន្ត្រី​ថា ខេត្ត​ព្រះសីហនុ​នឹង​ក្លាយ​ទៅជា​តំបន់​ដ៏​មាន​សក្តានុពល​សេដ្ឋកិច្ច​មួយ​យ៉ាង​ខ្លាំង។​ ប៉ុន្តែ​ទន្ទឹមគ្នា​នេះ សេដ្ឋវិទូ​រូប​នេះ​ជំរុញ​អោយ​រដ្ឋាភិបាល​បង្កើត​ជើង​ហោះហើរ​ត្រង់​ពី​ក្រុង​សៀមរាប​មក​ខេត្ត​ព្រះសីហនុ​អោយ​បាន​លឿន ហើយថា​រដ្ឋាភិបាល​ក៏​ត្រូវ​រៀបចំ​ហេដ្ឋារចនា​សម្ព័ន្ធ​ដើម្បី​ទទួល​រោងចក្រ​កាត់ដេរ​អោយមកនៅ​ក្បែរ​តំបន់​ឆ្នេរ​នេះ ក៏​រឹតតែ​ប្រសើរ​ផងដែរ​សម្រាប់​ការ​ដឹក​ជញ្ជូន​នោះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI