អានតួអត្ថបទ
ចិន

ចិន​ដំឡើងបន្ថែម​​ថវិកា​វិស័យ​កងទ័ព​សម្រាប់​ឆ្នាំ ២០១១

នាវា​មុជទឹក​ចិន​
នាវា​មុជទឹក​ចិន​ REUTERS/Guang Niu
ដោយ៖ ឈាង បុប្ផា
១៩ នាទី

រដ្ឋាភិបាល​ចិន​បាន​សម្រេច​ដំឡើង​ថវិកា​បន្ថែម​សម្រាប់​វិស័យ​ការពារជាតិ​របស់ខ្លួន។ ជាមួយ​នឹង​ការដំឡើង ១២,៧ ភាគរយ នៅឆ្នាំ ២០១១ ក្នុង​ពេល​ដែល​ការដំឡើង​ឆ្នាំមុន មាន​តែ ៧,៥​ភាគរយ ថវិកា​សម្រាប់​វិស័យ​កងទ័ព​ចិន នៅ​ឆ្នាំ នេះ​មាន​ចំនួន​ដល់​ទៅ ៦០១ ពាន់លាន​យ័ន ត្រូវ​នឹង​៩១​ពាន់​លានដុល្លារ​អាមេរិក។ អ្នកនាំពាក្យ​របស់​សភា​ចិន​ដែល​បាន​ប្រកាស​ឲ្យ​ដឹង​ព័ត៌មាន​នេះ គឺ​នៅ​តែ​មួយថ្ងៃ​មុន​បើក​ការប្រជុំ​សន្និបាត​សភា​ជាតិ​ចិន ដែល​នឹង​ចាប់ផ្តើម នៅ​ថ្ងៃ​សៅរ៍ទី ៥ មីនា ២០១១។

ផ្សាយពាណិជ្ជកម្ម

 

សេចក្តី​រាយការណ៍​របស់​ឈាង បុប្ផា

ជាមួយ​នឹង​កំណើន​សេដ្ឋកិច្ច​ចេះ​តែ​ទៅមុខ​របស់ខ្លួន ចិន ក្នុង​រយៈពេល ប៉ុន្មាន​ឆ្នាំ​ចុងក្រោយ បាន​ដំឡើង ពីមួយឆ្នាំ ទៅមួយឆ្នាំ ​ថវិកា សម្រាប់​វិស័យ​ការពារជាតិ។ ចិន​ចាប់ផ្តើម​អភិវឌ្ឍ​វិស័យកង​ទ័ព ដើម្បី​ឆ្លើយតប​នឹង​ភាពយឺតយ៉ាវ​របស់​ខ្លួន និង​ដោយ​ចង់តាម​ឲ្យ​ទាន់ ប្រទេសអាមេរិក និង​រុស្ស៊ី។

ការដំឡើង​ថវិកា​សម្រាប់​វិស័យ​យោធា​ចិន​បាន​ធ្វើ​ឡើង ទន្ទឹម​ពេល​ដែល​អាមេរិក និង​ប្រទេស​ជិតខាង​នៅ​អាស៊ី ដូចជា​ជប៉ុន ​តៃវ៉ាន់ ឥណ្ឌា ​កំពុង​ព្រួយ​បារម្ភ​ពី​ការពង្រីក​វិសាលភាព​អំណាច​យោធា​របស់​​ចិន។ បើតាម​អ្នកវិភាគ​ខ្លះ ចិន​ដែល​ដំឡើង​ថវិកា​យោធា កាន់តែ​ច្រើន​ជាង​ឆ្នាំមុន គឺ​កំពុងចង់​បង្ហាញ​អំណាច​យោធា​កាន់តែ​ខ្លាំង​របស់ខ្លួន នៅ​ក្នុង​តំបន់ និង​ក្នុង​ពិភពលោក។

ការបន្ថែម​ថវិកា ដើម្បី​ពង្រឹង​វិស័យ​យោធា​ចិន កំពុង​ត្រូវ​​តាមដាន​ដោយ​យកចិត្ត​ទុកដាក់​ពី​ប្រទេស​គូ​ប្រកួត​ប្រជែង ​ជប៉ុន និង​អាមេរិក។ គេ​បាន​ប៉ាន់ស្មាន​ថា ថវិកា​ពិតប្រាកដ​សម្រាប់​វិស័យយោធា ចិន​មាន​ចំនួន​លើស តួលេខ​ដែល​រដ្ឋាភិបាល​ចិន​ប្រកាស​ជាផ្លូវការ​ទៅទៀត។ តាមរយៈ​ការដំឡើង​ថវិកា ចិន​បាន​ធ្វើ​ទំនើបកម្ម អាវុធ​ក្នុង​ផ្លូវ​អាកាស ផ្លូវទឹក និង​ផ្លូវគោក។ ការអភិវឌ្ឍ​បច្ចេកវិទ្យា​ចុងក្រោយ​របស់​ចិន គឺ យន្តហោះ​ទម្លាក់​គ្រាប់បែក​Chengdu « J-20 »ដែល​ប្រព័ន្ធ​រ៉ាដា​មិន​អាច​ចាប់បាន។ រហូត​មកដល់​ពេលនេះ មាន​តែ​អាមេរិក​ទេ ដែល​មាន​យន្តហោះ​ប្រភេទនេះ។ ចិន​នៅ​បាន​អភិវឌ្ឍ​ផលិត​មីស៊ីល ដែល​អាច​បាញ់​កំទេច​នាវា​ចម្បាំង ដែល​ស្ថិតនៅ​ចំងាយ​រាប់ពាន់​គីឡូម៉ែត្រ​ពី​ទឹកដីចិន។

នៅ​ប្រទេស​ចិន​ឯណោះវិញ លោក​Li Zhaoxing អតីត​រដ្ឋមន្រ្តីការបរទេស​ចិន បាន​និយាយ​ថា នៅក្រោយ​ការដំឡើង​លើកនេះ ថវិកា​យោធា​ចិន តំណាង​ឲ្យ​តែ ៦ភាគរយ​នៃ​ថវិកា​ជាតិ​សរុប​តែ​ប៉ុណ្ណោះ។ លោក​បាន​អះអាង​ថា ថវិកា​ប៉ុណ្ណឹង មិន​អាច​គំរាម​ដល់​សន្តិសុខ​របស់​ប្រទេស​ណាមួយ​បាន​ទេ។ កន្លងមក ចិន​នៅ​តែ​ទាមទារ​ថា ថវិកាកងទ័ព​របស់ខ្លួន​មាន​ចំនួន​តិចតួច​ខ្លាំងណាស់ ជាពិសេស​បើប្រៀបធៀប​នឹង​ថវិកា​ទ័ព​របស់​អាមេរិក ដែល​មានចំនួន​ដល់​ទៅ ជាង ៦៦៣ ពាន់លាន​ដុល្លារ។

សម្រាប់​លោក​Rick Fisher ដែល​បំរើការ​នៅ​មជ្ឈមណ្ឌល​វាយតម្លៃ​យុទ្ធសាស្រ្ត​អន្តរជាតិ រដ្ឋាភិបាល​ចិន​ដំឡើង​ថវិកា​សម្រាប់​វិស័យ​ការពារ​ជាតិ ដើម្បី​អាច ទីមួយ​បង្ហើយ​គម្រោង​អភិវឌ្ឍ​សព្វាវុធ និង​ទីពីរ​ដើម្បី​អាច​ដំឡើង​ប្រាក់ខែ​ដល់​កងទ័ព។ របប​កុម្មុយនិស្ត​ចិន ពិត​ជា​បាន​មើលឃើញ​យ៉ាងច្បាស់​នូវ​គំរូ​បះបោរ​របស់​ប្រជាជន​ នៅ​ពិភពអារ៉ាប់ ដែល​ភាគច្រើន​បាន​ចេញមុខ​គាំទ្រ​ដោយ​កងទ័ព៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ