អានតួអត្ថបទ
ចិន

នៅឆ្នាំ ២០១១​ចិន​ផ្តល់​​ថវិកាដល់​​ប៉ូលិសច្រើន​ជាង​​កងទ័ព

ប៉ូលិស​ចិន​យាម​ចាំ​ នៅ​ទីក្រុង​ប៉េកាំង ការពារ​កុំ​ឲ្យ​មាន​ប្រជាជន​តវ៉ា​តាម​គំរូ​បដិវត្តន៍​ផ្កាម្លិះ ដែល​អំពាវនាវ​តាម​អ៊ិនធ័រណេត
ប៉ូលិស​ចិន​យាម​ចាំ​ នៅ​ទីក្រុង​ប៉េកាំង ការពារ​កុំ​ឲ្យ​មាន​ប្រជាជន​តវ៉ា​តាម​គំរូ​បដិវត្តន៍​ផ្កាម្លិះ ដែល​អំពាវនាវ​តាម​អ៊ិនធ័រណេត ©REUTERS/David Gray
ដោយ៖ ឈាង បុប្ផា
២៤ នាទី

នៅថ្ងៃ​បើក​អង្គប្រជុំ​សភាប្រជាជន ប្រចាំឆ្នាំ កាលពី​ថ្ងៃ​ម្សិលមិញ រដ្ឋាភិបាល​ចិន​បាន​បង្ហាញ​ឲ្យ​ដឹង​ពីការ​ដំឡើង បន្ថែម​ថវិកា​សម្រាប់​ផ្នែក​ការពារ​សាធារណៈ។ ថវិកា​សម្រាប់​ប៉ូលិស​រក្សាសណ្តាប់ធ្នាប់​ក្នុង​ឆ្នាំ ២០១១​នេះ បាន​កើន​ឡើង​ដល់​៩៥ ពាន់​លាន​ដុល្លារ គឺ​ច្រើន​ជាង​ថវិកា​ថ្មី ដែល​រដ្ឋាភិបាល​បាន​សម្រេច​ដំឡើង​សម្រាប់​វិស័យ​កងទ័ព កាលពីថ្ងៃ​សុក្រ ទី ៤ មីនា។

ផ្សាយពាណិជ្ជកម្ម

បទអន្តរាគមន៍​របស់ ឈាង បុប្ផា

នៅក្នុង​ឱកាស​បើក​ប្រជុំសភា​ប្រជាជន​ប្រចាំ​ឆ្នាំ កាល​ពី​ថ្ងៃសៅរ៍ ​នាយករដ្ឋមន្រ្តី​ចិន លោក​វេន ជាប៉ាវ ថ្លែងថា  បំណង​ធំបំផុត​របស់​រដ្ឋាភិបាល​ចិនបច្ចុប្បន្ន​នេះ គឺ​ចង់​បាន​ស្ថិរភាព​សង្គម។ ក្នុង​កាលៈទេសៈ​បច្ចុប្បន្ន​នេះ ដែល​ប្រជាជន​កំពុង​ត្រូវ​គេ​ប្រកូកប្រកាស​ឲ្យ​ធ្វើការ​តវ៉ា​ប្រឆាំង​នឹង​ រដ្ឋអំណាច រដ្ឋាភិបាល​ចិន​បាន​ប្រកាស​ដំឡើង​ថវិកា​សម្រាប់​ប៉ូលិស​ដែល​ការពារ​រក្សា​ សណ្តាប់ធ្នាប់​ក្នុង​ប្រទេស។

 
តាំងពីដើមមក រដ្ឋអំណាច​ចិន​បាន​ចំណាយ​លុយច្រើន​សម្រាប់​ផ្នែក មហាផ្ទៃ ដែល​មាន​តាំងពី​ប៉ូលិស កងសេនាជន​តាមភូមិឃុំ តុលាការ និង​ពន្ធនាគារ។ ប៉ុន្តែ នេះ​ជា​លើក​ទីមួយ ក្នុង​ប្រវត្តិសាស្រ្ត​ថវិកាជាតិ ដែល​ប៉ូលិស បាន​ទទួល​លុយ​ច្រើន​ជាង កងទ័ព​ទៅទៀត។ ជាមួយ​នឹង​ការដំឡើង​បន្ថែម ជាង ១២ភាគរយ ថវិកាសម្រាប់​វិស័យ​កងទ័ព​មាន​តែ ៩១​ពាន់លាន​ដុល្លារ ចំណែក​ថវិកាសម្រាប់​ផ្នែកច្បាប់ និង​រក្សាសណ្តាប់ធ្នាប់​ក្នុង​សុ្រក​មាន​ដល់​ទៅ ជាង ៩៥​ពាន់​លាន​ដុល្លារ។ នេះ​មាន​ន័យថា ស្ថិរភាព​ក្នុង​ស្រុក វា សំខាន់ និង​ជា​បញ្ហា​ដែល​ចិន​កំពុង​យកចិត្ត​ទុកដាក់​តាមដានជាប់។ ចិន មិន​បារម្ភ​ពី​ការវាយ​ប្រហារយោធា​ពី​ខាងក្រៅទេ ប៉ុន្តែ ​ចិន នៅពេល​នេះ កំពុង​រិះរក​មធ្យោបាយ​ដើម្បី​ដោះស្រាយ​បញ្ហាចំពោះមុខ ​ដូចជា​វិបត្តិ​សង្គម​ដែល​នឹង​អាច​រីកធំ ឡើងៗ និង​អាច​វិវឌ្ឍ​ទៅ​ជា​បដិវត្តន៍​ប្រឆាំង​មេដឹកនាំ​ដូចនៅ​អេហ្ស៊ីប និង​ដូចនៅលីប៊ីបច្ចុប្បន្ន។

ចាប់តាំងពី​មាន​ការអំពាវនាវ​ឲ្យ​ធ្វើ​ការតវ៉ា​ដោយ​សន្តិភាព​ទៅតាម​ ការអំពាវនាវ​ក្នុង​អិនធ័រណេត រដ្ឋអំណាច​បានប្រើ​ប៉ូលិស រាប់សែន​នាក់ ដោយ​រួម​បញ្ចូល​ទាំង​ពួកសេនាជន​តាមភូមិឃុំ​ផង​នោះ ដើម្បី​ចាប់វាយ​ស្ទាក់ និង​ចាប់ឃាត់​ខ្លួន​អ្នកតវ៉ា​ប្រឆាំង។ ហើយ​គឺ​ពួកសេនាជន ដែល​ជា​សមាជិក​បក្ស​ថ្នាក់មូលដ្ឋាន នេះ​ឯង ដែល​ជា​មនុស្ស​មាន​អំណាច និង​រាយការណ៍​ចាប់ចង​អ្នកដែល​គេ​គិត​ថា គ្រោះថ្នាក់​សម្រាប់​បក្ស។

សកម្មជន​ សិទ្ធិ​មនុស្ស ជា​ច្រើន​រយនាក់ ដែល​បាន​ចេញមុខ​តវ៉ា​បាន​បាត់ខ្លួន​ជា​បន្តបន្ទាប់ ឬត្រូវ​គេ​ឃុំ​ក្នុង​ផ្ទះ មិន​ឲ្យ​ចេញមក​ទាក់ទង​នឹង​អ្នកខាងក្រៅ។ ជាក់ស្តែង គឺ​ករណី​លោក​លីវ ស៊ាវប៉ូ សកម្មជន​សិទ្ធិមនុស្ស និង​ជ័យលាភី​រង្វាន់​ណូបែល​សន្តិភាព ដែល​រហូត​មកដល់​ពេល​នេះ ត្រូវ​អាជ្ញាធរ​ចិន​ចាប់ដាក់គុក ចំណែក​ប្រពន្ធ​របស់​គាត់​ត្រូវ​ឃុំ​ខ្លួន​ក្នុង​គេហដ្ឋាន។ ដោយសារ​តែ​ខ្លាច​ការបង្រ្កាប​ចាស់ដៃ​ពី​អាជ្ញាធរ ទើបនៅថ្ងៃ​អាទិត្យ​នេះ គេ​មិន​ឃើញ​មាន​ប្រជាជន​ចុះដើរតាម​ផ្លូវ ទៅតាមការអំពាវនាវ​តាម​អ៊ិនធ័រណេត ដើម្បី តវ៉ា នៅក្នុង​ទីក្រុង​ចំនួន ៤១៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ