អានតួអត្ថបទ
ចិន-ជប៉ុន

ប៉េកាំង​អំពាវនាវ​ឲ្យ​តូក្យូ​ជួយ​រក្សា​ទំនាក់ទំនង​ទ្វេ​ភាគី

នាយក​រដ្ឋមន្ត្រី​ជប៉ុន ណាអូតូ កាន់ ទាមទារ​ឲ្យ​ចិន​ធ្វើ​ខ្លួន​ជា​រដ្ឋត្រឹម​ត្រូវ​មាន​ការ​ទទួល​ខុសត្រូវ -ថ្ងៃ​ទី​១ តុលា ២០១០
នាយក​រដ្ឋមន្ត្រី​ជប៉ុន ណាអូតូ កាន់ ទាមទារ​ឲ្យ​ចិន​ធ្វើ​ខ្លួន​ជា​រដ្ឋត្រឹម​ត្រូវ​មាន​ការ​ទទួល​ខុសត្រូវ -ថ្ងៃ​ទី​១ តុលា ២០១០ REUTERS/Issei Kato
ដោយ៖ អៀង សុខម៉ិញ
១៦ នាទី

ការ​ឆ្លើយ​ឆ្លង​​ពាក្យ​សំដី ត-ទៅ​ត-មក​រវាង​ចិន និង​ជប៉ុន ដែល​កំពុង​ប្រឈម​នឹង​វិបត្តិការទូត ដ៏ធ្ងន់ធ្ងរ​បំផុត​ មិន​ធ្លាប់​មាន​តាំង​ពី​ឆ្នាំ​២០០៦​មក នៅតែមាន​ជា​បន្ត​បន្ទាប់​ឥត​ឈប់​ឈរ។ ឆ្លើយ​តប​នឹង​ប្រសាសន៍​របស់​លោក​នាយក​រដ្ឋមន្ត្រី​ជប៉ុន ដែល​ទាមទារ​ឲ្យ​ចិន​ ធ្វើ​ខ្លួន​ជា​រដ្ឋ​”មាន​ការ​ទទួល​ខុស​ត្រូវ” ថ្ងៃ​សុក្រ​ម្សិលមិញ​នេះ​ភាគី​ចិន បាន​អំពាវនាវ​ឲ្យ​ជប៉ុន​ចេះ​រក្សា​អ្វី​ដែល​ហៅ​ថា“ទំនាក់​ទំនង​​ទ្វេ​ភាគី”​ ជាទូទៅ​ឲ្យ​នៅ​គង់វង្ស។

ផ្សាយពាណិជ្ជកម្ម

 

សេចក្តីរាយការណ៍​របស់​ អៀង សុខម៉ិញ

“ចិន​ផ្តល់​តម្លៃ​ និង​គិត​គូរ​ជានិច្ច​ដល់​ទំនាក់ទំនង​ជាមួយ​ជប៉ុន ដូច្នេះ​ជប៉ុន​ក៏​គួរ​តែ​ធ្វើ​យ៉ាង​ណា​រក្សា​ទំនាក់ទំនង​ទ្វេ​ភាគីនេះ​ជាមួយ​ចិន​វិញ​ដែរ​” ! នេះ​បើ​តាមប្រសាសន៍​​​​អ្នក​នាំ​ពាក្យ​ក្រសួង​ការបរទេស​ចិន នៅ​ល្ងាច​ថ្ងៃ​សុក្រ​ម្សិលមិញ ដែល​បាន​គូសបញ្ជាក់​បន្ថែម​ទៀត​ថា កោះ​ ទាវអ៊ុយ (Diaoyu) ជា​ភាសា​ចិន ឬ សេនកាគុ (Senkaku) ជាភាសាជប៉ុន ក្នុង​សមុទ្ទ​ចិន​ខាង​កើត ទី​ដែល​មាន​កើត​ឧប្បត្តិហេតុ​បុក​កប៉ាល់ ជា​ផ្នែក​មួយ​របស់​ទឹកដី​​ចិន​ តាំង​ពី​ដើម​រៀង​មក ដូច្នេះ​វិធានការ​របស់​ក្រុង​តូក្យូ ជា​រឿង​មិន​ទំនង និង​មិន​ត្រឹមត្រូវទេ។

សេចក្តី​ថ្លែង​ការណ៍​​​របស់​អាជ្ញាធរ​ចិននេះ​ ជា​ចម្លើយ​តប​នឹង​ប្រសាសន៍​របស់​នាយក​រដ្ឋមន្ត្រីជប៉ុន លោក ណាអូតូកាន់ ដែល​កាលពី​ព្រឹក​ថ្ងៃ​សុក្រ​បាន​ទាមទារ​ឲ្យ​ប្រទេស​ចិន​ ធ្វើ​ខ្លួន​ជា​រដ្ឋ​មាន​ការ​ទទួល​ខុស​ត្រូវ នៅ​លើ​ឆាក​អន្តរជាតិ និង​បាន​ប្រកាស​ថា​ កោះ​សេនកាគុ​ជា​របស់​ជប៉ុន ទាំង​ក្នុង​ប្រវត្តិសាស្ត្រ​ ក៏​ដូច​ជា​នៅ​ចំពោះ​មុខ​ច្បាប់​អន្តរជាតិ។

សូម​ជម្រាប​ថា​វិបត្តិ​ការទូត​ចិន​ជប៉ុន​បាន​ផ្ទុះ​ឡើង​ ដោយ​ហេតុជប៉ុន​បាន​ឃុំ​ខ្លួន​អ្នក​បើក​បរ​កប៉ាល់​នេសាទ​ចិន​ ពី​បទ​បាន​ទៅ​បុក​នាវាល្បាត​ជប៉ុន​ កាលពី​ថ្ងៃទី ៧ កញ្ញា។ ឧប្បត្តិហេតុ​នេះ​ បាន​បង្ក​ភាព​អួ​អាប់​យ៉ាង​ខ្លាំង​ក្នុង​វិស័យ​សេដ្ឋកិច្ច​​រវាង​ប្រទេស​ទាំងពីរ និង​ជា​ពិសេស​​បាន​រាល​ដាល​ជា​ជម្លោះ​ដែន​ដី។

ជប៉ុន​​ដែល​បាន​សម្តែង​ការ​ព្រួយ​បារម្ភ​យ៉ាង​ខ្លាំង​ចំពោះ​ការ​ពង្រឹង​ពង្រីក​កម្លាំង​និង​សកម្មភាព​យោធា​ដែន​ទឹក​​របស់​ចិន​ នៅ​ក្នុង​សមុទ្ទ​ចិន និង​មហាសមុទ្ទ​ឥណ្ឌា បាន​ខិត​ខំ​សាក​ល្បង​បន្ធូរ​បន្ថយ​សម្ពាធ​តាន​តឹង​នេះ ដោយឆ្លៀត​​​ស្នើ​រៀប​ចំ​ឲ្យ​មាន​ជំនួប​ថ្នាក់​នាយក​រដ្ឋមន្ត្រីរវាង លោក ណាអូតូ​កាន់ និង​សមភាគី លោក​វេនជាបាវ ក្នុង​ឱកាស​ជំនួប​កំពូល​អាស៊ី-អឺរ៉ុប នៅ​ទីក្រុង​ប្រ៊ុចសែល ប្រទេស​បែលហ្សិក។ ប៉ុន្តែ​រហូត​មក​ទល់​នឹង​ពេល​នេះ​ ពុំ​ទាន់​មាន​អ្វី​សម្រេច​ច្បាស់​លាស់​នៅ​ឡើយ​ទេ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ