ចិន-កូរ៉េខាងជើង

ចិន​ប្រគល់​ឲ្យ​កូរ៉េ​ខាង​ជើង​យានយន្ត​៤​គ្រឿង​សំរាប់​បាញ់​កាំជ្រួច​មីស្ស៊ីល​

ប្រភេទ​យានយន្ត​សំរាប់​បាញ់កាំជ្រួច​មីស្ស៊ីលរបស់ប្រទេសចិន
ប្រភេទ​យានយន្ត​សំរាប់​បាញ់កាំជ្រួច​មីស្ស៊ីលរបស់ប្រទេសចិន DR

ប្រទេស​ចិន​​ បាន​ប្រគល់​​ឲ្យ​​កូរ៉េ​​ខាង​​ជើង​​យានយន្ត​​៤​គ្រឿង​​​សំរាប់​​បាញ់​​កាំជ្រួច​​មីស្ស៊ីល​​​នៅ​​​ឆ្នាំ​​២០១១​​ដែល​ជា​ការ​​រំលោភ​បំពាន​លើ​​​សេចក្តី​សម្រេចចិត្ត​របស់ អង្គការ​សហ​ប្រជាជាតិ​​​ដែល​ហាម​មិន​ឲ្យ​ផ្គត់ផ្គង់​សព្វាវុធឲ្យ​​ដល់​របប​កុម្មុយនិស្ត​ព្យុងយ៉ាង​-នេះ​ជាអំណះអំណាង​​របស់​ទិនានុប្បវត្តិ​ជប៉ុនដីល្បីឈ្មោះ​ Asahi Shimbun ឲ្យដឹង​នៅថ្ងៃពុធ​១៣មិថុនានេះ។

ផ្សាយពាណិជ្ជកម្ម

ក្រុម​​​អ្នក​ជំនាញការ បាន​​ចោទ​​​​ប្រទេស​ចិន​ដែល​ជា​សម្ព័ន្ធមិត្ត​ចាក់ទឹកមិនលិច​​របស់​កូរ៉េ​ខាង​ជើង ថា​​បាន​រំលោភ​​បំពាន​​លើ​បម្រាម​​របស់អសប បន្ទាប់ពី​​មាន ព្យុហយាត្រា​​​មួយ​កាល​ពីថ្ងៃ​១៥​មេសា​នៅទីក្រុង​ព្យុងយ៉ាង។ នៅពេលនោះហើយដែល​ក្រុម​អ្នកជំនាញការ​បាន​ស្គាល់​ថាជា​​យានយន្ត​សំរា​ប់​​បាញ់​​កាំជ្រួមីស្ស៊ីល​​​​​​​ធុន T.E.L(transporteur-érecteur-lanceur)​ធ្វើនៅប្រទេសចិន។

 
យោងតាម​ទិនានុប្បវត្តិ​ Asahi Shimbun ដែលបាន​​យោងទៅលើ​​​ប្រភព​ផ្សេងៗ​នៃ​រដ្ឋាភិបាល​​ជប៉ុន" សហរដ្ឋអាមេរិក ជប៉ុន និង​កូរ៉េ​ខាង​ត្បូង" បាន​ដឹងជិតមួយឆ្នាំមកហើយ​អំពី​​​​វត្តមាន​នៃ​ការ​ដែល​ប្រទេសចិន​ បាន​ប្រគល់​យានយន្តទាំងនេះ​ដោយ​លួច​លាក់​ខុសច្បាប់​ទៅឲ្យ​កូរ៉េ​ខាង​ជើង។​​

ផ្កាយ​រណប​ឈ្លបយកការណ៍​របស់​សម្ព័ន្ធ​មិត្ត​ទាំង​បី​”គឺ​សហរដ្ឋអាមេរិក ​ជប៉ុន​និង​កូរ៉េ​ខាង​ត្បូង” បាន​តាម​ដាន​ថត​ការ​ដឹក​ជញ្ជូន​​យានយន្តទាំង៤គ្រឿងសំរាប់​បាញ់​កាំជ្រួច​មីស្ស៊ីល​នៅ​​​លើ​​​​កប៉ាល់​​ដឹក​ទំនិញ​​មួយ​គ្រឿង​​ដែល​ចុះ​បញ្ជី​នៅ​​ប្រទេស​កម្ពុជា​ក្រោមឈ្មោះថា « Harmony​ Wish » និងបាន​ធ្វើដំណើរចាកចេញពី​កំពង់ផែ​សៀងហៃនៃ​ប្រទេសចិន​នៅថ្ងៃទី១​សីហា​ឆ្នាំ​មុន​និង​បាន​ទៅ​ដល់ Nampho នៅ​ឆ្នេរ​សមុទ្រ​ខាង​លិច​នៃ​ប្រទេស​កូរ៉េ​ខាង​ជើង​នៅថ្ងៃទី៣​សីហាឆ្នាំដដែលនេះ។

 ប្រភេទ​នៃ​យានយន្ត​ដែល​ចិន​ប្រគល់​ទៅ​ឲ្យ​កូរ៉េ​ខាង​ជើង​ ត្រូវ​បាន​បញ្ជាក់អះអាង​ដោយ​ឯកសារ​​​នាំទំនិញចេញមួយ​​​ដែលធ្វើឡើង​ដោយ​អន្តរការី​ម្នាក់​នៅ​សៀងហៃនិងដែល​រឹប​អូស​យក​​​បាន​ដោយ​ឆ្មាំឆ្នេរ​សមុទ្រ​ជប៉ុន​នៅឱកាស​ឆែកឆេរ​​ត្រួត​ពិនិត្យ​​នៅ​លើ​កប៉ាល់​ដឹក​​ទំនិញ​​​​នៅ​កំពង់ផែ​ Osaka ប៉ែក​ខាង​ត្បូង​ប្រទេស​ជប៉ុន​នៅ​ខែ​តុលាឆ្នាំមុន។

ក៏ប៉ុន្តែទីក្រុង​ Washington, Tokyo និង Séoul មិន​បាន​ធ្វើ​ការផ្សព្វផ្សាយឲ្យដឹង​អ្វីទេ ​ជុំវិញ​រឿង​នេះ​ក្នុង​​​ក្តី​សង្ឃឹម​​​ថាប្រទេស​​ចិន​នឹង​​ដាក់​គំនាប​​ទៅលើ​កូរ៉េ​ខាងជើងដើម្បី​បញ្ចុះ​បញ្ចូល​​​​ប្រទេស​នេះ ឲ្យ​​សុខចិត្ត​ ចូល​រួម​តុ​ចរចា​ឡើងវិញ ស្តីពី​កម្មវិធី​នុយក្លេអ៊ែរ​កូរ៉េ​ខាង​ជើង​​​ និងឲ្យ​លះបង់​ការពិសោធន៍​​​សាកល្បង​កាំជ្រួច​នុយក្លេអ៊ែរ​​លើក​ទី​៣របស់ខ្លួន-នេះជា​ការ​បញ្ជាក់​បន្ថែម​​របស់ Asahi Shimbun។​

អសប ​ បាន​អនុម័ត ​ដាក់​ទណ្ឌកម្ម​ពីរ​លើក​ប្រឆាំង​កូរ៉េ​ខាង​ជើង​នៅ​ឆ្នាំ​២០០៦​និង​២០០៩​បន្ទាប់​​ពីរបប​​កូរ៉េ​ខាង​ជើង បានពិសោធសាកល្បងកាំជ្រួចមីស្ស៊ីលមួយលើកៗ។​ សេចក្តី​សម្រេច​​ចិត្ត​​លេខ ១៧១៨និង​១៨៧៤ របស់​អសប ហាម​មិន​ឲ្យ​ផ្ទេរ​​​សព្វាវុធ​​ធុន​ធ្ងន់ទៅឲ្យ​
ទី​​​ក្រុង​ព្យុងយ៉ាង​ រួមទាំង​បច្ចេកវិទ្យា​ណា​ដែល​អាចផ្សំជាធាតុ​​​ផលិត​​​អាវុធ​នុយក្លេអ៊ែរ​​បាន​​ ក៏ព្រមទាំង​សម្ភារៈផ្សេងៗទៀត ដែលជាប់ទាក់ទង​នឹងការ​បង្កើត​អាវុធនុយក្លេអ៊ែរ។

ទណ្ឌកម្ម​ទាំង​នេះ ត្រូវ​បាន​ពង្រឹងបន្ថែម​និង​ត្រូវ​បានទីក្រុងប៉េកាំង​ក្រសោប​ទទួល​ខុស​ត្រូវ​មក​​​លើ​ខ្លួន បន្ទាប់​ពី​បរាជ័យ​របស់​កូរ៉េ​ខាង​ជើង​ក្នុង​ការ​ប៉ុនប៉ង​បាញ់​បង្ហោះ​ផ្កាយ​រណប​មួយ​បញ្ជូន​ទៅ​កាន់​​តារាវិថីព័ទ្ធជុំវិញផែនដី​​កាលពី​ថ្ងៃ​១៣​មេសា​មុន។ ការបាញ់បង្ហោះនេះ ​ត្រូវ​បាន​ទីក្រុង​វ៉ាស៊ីនតោននិង​សម្ព័ន្ធមិត្ត​របស់​ខ្លួន ចាត់​ទុក​​ជា​កាំជ្រួច​មីស្ស៊ីល​​អន្តរទ្វីប​​ដែល​កូរ៉េខាងជើង​ក្លែង​បន្លំថាជាកាំជ្រួចធម្មតា។ ប៉ុន្តែជាអកុសល កាំជ្រួច​​នេះបានផ្ទុះឆេះ​​អន្តរាយធ្លាក់​ទៅ​ក្នុង​​សមុទ្រ​​លឿង​ចម្ងាយ ​១៦៥ គ.មពីឆ្នេរ​សមុទ្រ​កូរ៉េខាងត្បូង៕​

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI