អានតួអត្ថបទ
កម្ពុជា

មនុស្ស​ជាង​២ម៉ឺន​នាក់​នឹងធ្វើ​​បាតុកម្មដើម្បី​ទាមទារ​​ឱ្យ​កឹម សុខា​សុំទោស

លោក ជុំ ម៉ី រំលឹក​អនុស្សាវរីយ៍​ជូរ​ចត់​នៅ​គុក​ទួល​ស្លែង
លោក ជុំ ម៉ី រំលឹក​អនុស្សាវរីយ៍​ជូរ​ចត់​នៅ​គុក​ទួល​ស្លែង រូបថត ៖ សុវណ្ណារ៉ា/RFI
១៣ នាទី

លោក ជុំ ម៉ី ជនរងគ្រោះ នៅមានជីវិត​ពី​គុក​ទួលស្លែង នឹង​ដឹកនាំ​ជនរងគ្រោះ​ដោយ​របប​ខ្មែរក្រហម ជាង​២ម៉ឺន​នាក់ ធ្វើ​បាតុកម្ម ដើម្បី​ទាមទារ​ឱ្យ​លោក កឹម សុខា ប្រធានស្តីទី​គណបក្ស​សង្គ្រោះជាតិ​សុំទោស​ជនរងគ្រោះ ក្នុង​របប​ខ្មែរក្រហម។ បាតុកម្ម​នេះត្រូវ​បាន​រៀបចំ​ឡើង ខណៈ​ដែល​ឱសានវាទ​នៃ​ការសុំទោស​នឹង​មកដល់ នៅ​ថ្ងៃទី៤ មិថុនា​ខាងមុខ​នេះ។

ផ្សាយពាណិជ្ជកម្ម

មនុស្ស​ជាង​២ម៉ឺន​នាក់ គ្រោង​នឹង​ធ្វើ​បាតុកម្ម​ប្រឆាំង​លោក កឹម សុខា​ ប្រធាន​ស្តីពី​គណបក្ស​សង្គ្រោះជាតិ បន្ទាប់ពី​ឱសានវាទ​នៃ​ការសុំទោស​ដល់​ជនរងគ្រោះ នៅ​គុក​ទួលស្លែង នឹង​មកដល់​ថ្ងៃ​៤ មិថុនា។ នេះបើតាម​លោក ជុំ ម៉ី ជនរងគ្រោះ​នៅមាន​ជីវិត​ពី​គុកទួលស្លែង ដែលបាន​ប្រាប់​វិទ្យុបារាំង​អន្តរជាតិ កាលពី​ថ្ងៃម្សិលមិញ។

លោក ជុំ មី ដែល​ជា​ប្រធាន​សមាគម​ក្សេមក្សាន្ត​ផងនោះ​បាន​ឱ្យដឹង​ទៀតថា លោក នឹង​ដឹកនាំ​បាតុករ​ទាំងនោះ ធ្វើ​បាតុកម្ម​ប្រឆាំង នឹង​លោក​កឹម សុខា​ ក្នុង​ករណី​ដែលលោក នៅតែ​រឹងទទឹង​មិនព្រម​ទទួល​កំហុស​របស់ខ្លួន ដែល​និយាយ​ថា គុក​ទួលស្លែង គឺជា​គុកសិប្បនិមិត្ត ដែល​រៀបចំ​ឡើង ដោយ​ប្រទេស​វៀតណាម។

បើតាម​លោក ជុំ មី បាតុកម្ម​ដែល​ចូលរួម​ដោយ​បាតុករ​ជា​អ្នកឈឺចាប់​ដោយ​របប​ខ្មែរក្រហម​នោះ គឺ​ដើម្បី​ថ្កោលទោស​ប្រធានស្តីទី​គណបក្ស​សង្គ្រោះជាតិ ដែល​លោក​អះអាង​ថា ចង់​បំបាត់​ប្រវត្តិសាស្ត្រ ៣ឆ្នាំ៨ ខែ និង២០ថ្ងៃ ដែល​បាន​កាប់សំលាប់​ប្រជាពលរដ្ឋ​ខ្មែរ​អស់​ប្រមាណ​ជិត​២លាន​នាក់។

តែទោះជា​យ៉ាងណា លោក កឹម សុខា ធ្លាប់​បាន​បដិសេធ​ថា លោក មិនបាន​និយាយ​ថា គុក​ទួលស្លែង​គឺ​ជា​គុកសិប្បនិម្មិត​នោះទេ ដូច្នេះគឺ​គ្មានអ្វី​ត្រូវ​សុំទោស​នោះឡើយ។ លោកកឹម សុខា​បញ្ជាក់​ថា សម្តី​របស់​លោក ដែល​និយាយ​ថា គុកទួល​ស្លែង ថា ជាគុក សិប្បនិម្មិត​នោះ ជា​ការច្នៃ​ប្រឌិត​ទេ។

គួរ​រំលឹក​ថា លោក កឹម សុខា នឹង​ត្រឡប់​មកកាន់​កម្ពុជា​វិញ នៅថ្ងៃ​ទី៤ ឧសភា បន្ទាប់ពី​ចាកចេញ​ពី​កម្ពុជា​ទៅ​សហរដ្ឋអាមេរិក តាំងពី​ថ្ងៃទី២៩ ឧសភាកន្លងមក ក្រោយពី​មាន​ប្រតិកម្ម​យ៉ាងខ្លាំង​ចំពោះ​សម្តី​របស់​លោក ពីអ្នកនយោបាយ និង​ពលរដ្ឋខ្មែរ​មួយ​ចំនួន។ ប៉ុន្តែ ប្រភព​ពី​បក្ស​ប្រឆាំង​បញ្ជាក់​ថា លោក​កឹម សុខា មាន​បេសកកម្ម នៅក្រៅ​ប្រទេស។

ក្រៅពី​គម្រោង​បាតុកម្ម​របស់​ប្រជាជន​ប្រមាណ​ជាង ពី​ម៉ឺននាក់ ប្រឆាំង​គម្រោង​លោក​កឹម សុខា​នោះ រដ្ឋសភា​កម្ពុជា​ឯណោះ​វិញ ក៏​គ្រោង​នឹង​អនុម័ត​ច្បាប់​ស្តីពី ការប្រឆាំង​ការមិន​ទទួលស្គាល់​ឧក្រិដ្ឋកម្ម​ដែលប្រព្រឹត្តិ​ឡើង​ដោយ​របប​ខ្មែរក្រហម នៅថ្ងៃ​សុក្រ​ទី៧ មិថុនានេះ​ផង​ដែរ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ