អានតួអត្ថបទ
កម្ពុជា

សាររម្លែក​ទុក្ខជាតិ និង​អន្តរជាតិ​ចំពោះ​ការ​សោយទិវង្គត​របស់​សម្តេចឪ

សម្តេចម៉ែមូនីនាថ
សម្តេចម៉ែមូនីនាថ © reuters
ដោយ៖ លាង ដឺលុច
១៨ នាទី

សាររម្លែកទុក្ខ​ពី​ប្រទេស​ជា​មិត្តរបស់​កម្ពុជាចំពោះ​ការ​សោយទិវអង្គត​របស់​អង្គ​អតីត​ព្រះមហាវីរៈក្សត្រ​ត្រូវ​បាន​ផ្ញើ​មក​ដល់​រដ្ឋាភិបាល​កម្ពុជា​ជា​បន្ត​បន្ទាប់។ រដ្ឋាភិបាល​បាន​ប្រកាស​ដាក់​​ប្រទេស​កម្ពុជា​ស្ថិត​នៅ​ក្នុង​ការ​កាន់ទុក្ខ​ចំនួន​៧​ថ្ងៃ ដោយ​រាប់​ចាប់​ពី​ថ្ងៃ​ទី​១៧​​ដល់​ថ្ងៃ​ទី​២៣​តុលា។ ក្នុង​រយៈ​ពេល​នេះ ស្ថានីយទូរទស្សន៍ និង​វិទ្យុ​ទាំងអស់​ត្រូវបាន​ស្នើ​អោយរៀបចំ​កម្មវិធី​យ៉ាងសមញ្ញ មិន​អោយមាន​កម្មវិធីសប្បាយ ហើយថា ពិធីករ ពិធីការិនី​នៅ​តាម​ស្ថានីយ​ទូរទស្សន៍​ក៏​ត្រូវ​ស្លៀកសំលៀកបំពាក់​កាន់ទុក្ខ​ផងដែរ។

ផ្សាយពាណិជ្ជកម្ម

លោកប្រធានាធិបតី​បារាំង Francois Hollande បាន​សម្តែង​សមានទុក្ខ​ក្រៀមក្រំបំផុត​ចំពោះ​ការ​សោយទិវង្គត​របស់​សម្តេចឪ​នរោត្តម សីហនុ។ នៅ​ក្នុងសាររម្លែកទុក្ខ​ដែលលោក​បាន​ផ្ញើ​មក​រដ្ឋាភិបាល​កម្ពុជា​ លោក​ប្រធាធិបតី​បារាំង​បាន​រម្លឹក​អំពី​ការ​លះបង់ និង​ស្នាដៃ​ធំៗ​របស់​អង្គសម្តេច​តា​ ពិសេស​ការការពារ​វប្បធម៌ ហ្វ្រង់កូហ្វូនី ដែលរួមមាន​ភាសា និងសិល្បៈនៃ​ប្រទេស​និយាយ​ភាសា​បារាំង។

លោក​ Francois Hollande បាន​សរសេរយ៉ាង​ដូច្នេះ​ថា​៖ «ខ្ញុំដឹងអំពីទំនាក់ទំនងដ៏ខ្លាំងក្លានិង​ជាប្រវត្តិសាស្ត្រ​រវាង​ព្រះមហាវីរៈក្សត្រ និង​ប្រទេស​បារាំង ហើយ​ដែល​តាម​រយៈ​ព្រះអង្គ ទំនាក់ ទំនង​ទាំងនេះ បាន​រួម​ចំណែក​ធ្វើ​អោយ​ប្រទេស​ជាតិ និង​ប្រជាជនយើង​ទាំងពីរ​កាន់​តែ​ខិត​ចូលគ្នា។ ជាស្ថាបនិកនៃឯករាជ្យជាតិ​កម្ពុជា ជា​អ្នក​ការពារ​​ប្រទេស​របស់​ទ្រង់​ដោយ​មិន​ចេះ​នឿយ​ហត់លើ​ឆាក​អន្តរជាតិ។ សម្រាប់​មនុស្ស​ភាគច្រើន ព្រះអង្គគឺជា​និមិត្តរូប​នៃ​នយោបាយ​អាស៊ី​មួយ​ដែល​លើក​តម្កើង​នូវ​សមភាព និង​ការ​ការពារ​អធិបតេយ្យភាព​នៃ​ប្រជាជាតិ​នានា"។

ពី​ប្រទេស​កូរ៉េ​ខាងជើង​ដែល​ជា​មិត្តភក្រ​របស់​សម្តេច​ឪ​ដែរ​នោះ មេដឹកនាំ​របប​ព្យុងយ៉ាង លោក គីម ជុងអ៊ុន​ក៏​បាន​ថ្លែងក្តី​រម្លែកទុក្ខ​ដ៏ស្មោះស្ម័គ្រជាមួយរាជ្សានុវង្ស​កម្ពុជា​ចំពោះ​ការ​បាត់បង់​ព្រះជន្ម​របស់​សម្តេ​ចឪ​នរោត្តម​សីហនុ​ផងដែរ។

ងាកទៅ​សហរដ្ឋអាមេរិក​វិញដែល​ធ្លាប់​គាំទ្រ​របប​លន់ នល់​ទម្លាក់​សម្តេច​សីហនុ​ពី​អំណាច​នោះ​ក្នុង​ឆ្នាំ​១៩៧០នោះ តាម​រយៈអ្នកនាំពាក្យ​នៃក្រសួង​ការបរទេស​អាមេរិក រដ្ឋាភិបាល​អាមេរិក​បាន​សម្តែង​ការ​រម្លែក​ទុក្ខ​ជាមួយ​ព្រះមហាក្សត្រនរោត្តម សីហមុនី សម្តេច​ម៉ែ​មុនីនាថ សីហនុ និង​ប្រជាជនកម្ពុជាទាំងអស់​។

ពី​ប្រទេស​សឹង្ហបុរី​វិញ សាររម្លែកទុក្ខ​មាន​មក​ពី​លោក​ប្រធានាធិបតី នាយករដ្ឋមន្ត្រី និង​រដ្ឋមន្ត្រី​ការ​បរទេស​ផង។ ក្រៅ​ពី​ការ​សម្តែង​ការរម្លែកទុក្ខ លោក​នាយករដ្ឋមន្ត្រី​សឹង្ហបុរី​ លី ស៊ានឡុង​បាន​រម្លឹក​អំពីស្នាព្រះហស្ថ​របស់​សម្តេច​ឪ​ដែល​ធ្វើ​អោយ​កម្ពុជា​និងសឹង្ហ​បុរី​ក្លាយជាមិត្តជិតស្និទ្ធ​គ្នា ហើយ​ថា​កម្ពុជា​គឺជា​ប្រទេស​មួយ​ដែល​បាន​ទទួលស្គាល់​ឯករាជ្យ​របស់​សឹង្ហបុរី​នៅ​ក្នុង​ឆ្នាំ​១៩៦៥។

នៅ​ក្នុង​ប្រទេស​កម្ពុជា លោក​នាយករដ្ឋមន្ត្រី​ហ៊ុន សែន បាន​ធ្វើ​សារសម្តែងទុក្ខក្រៀមក្រំ ដោយចាត់ទុក​ការបាត់បង់​ព្រះរាជ​វត្តមាន​ដ៏​ឧត្តុង្គឧត្តម​នៃ​អង្គ​សម្តេចព្រះ​មហាវីរក្សត្រនា​ឱកាស​​នេះ គឺជា​ការបាត់បង់​តួអង្គ​អតីតព្រះមហាក្សត្រ​ខ្មែរ ដ៏​មហា​ឆ្នើមគ្មាន​គូ​ប្រដូច​មួយ​ព្រះអង្គ។

រដ្ឋាភិបាល​បាន​ប្រកាស​ដាក់​​ប្រទេស​កម្ពុជា​ស្ថិត​នៅ​ក្នុង​ការ​កាន់ទុក្ខ​ចំនួន​៧​ថ្ងៃ ដោយ​រាប់​ចាប់​ពី​ថ្ងៃ​ទី​១៧​​ដល់​ថ្ងៃ​ទី​២៣​តុលា។ ក្នុង​រយៈ​ពេល​នេះ ស្ថានីយទូរទស្សន៍ និង​វិទ្យុ​ទាំងអស់​ត្រូវបាន​ស្នើ​អោយរៀបចំ​កម្មវិធី​យ៉ាងសមញ្ញ មិន​អោយមាន​កម្មវិធីសប្បាយ ហើយថា ពិធីករ ពិធីការិនី​នៅ​តាម​ស្ថានីយ​ទូរទស្សន៍​ក៏​ត្រូវ​ស្លៀកសំលៀកបំពាក់​កាន់ទុក្ខ​ផងដែរ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ