កម្ពុជា

បាតុកម្ម​​ប្រឆាំង​លោក កឹម សុខា ត្រូវ​បាន​កំណត់​ធ្វើ​នៅ​ថ្ងៃ​៩ មិថុនា

លោក​ជុំ ម៉ី ធ្វើ​សន្និសីទ​កាសែត​បញ្ចប់​ឱសានវាទ​ ប្រឆាំង​នឹង​លោក កឹម សុខា
លោក​ជុំ ម៉ី ធ្វើ​សន្និសីទ​កាសែត​បញ្ចប់​ឱសានវាទ​ ប្រឆាំង​នឹង​លោក កឹម សុខា ©rfi

ដូចដែល​បាន​គ្រោង​មែន​នៅ​ព្រឹក​នេះ លោក ជុំ មី ជន​រងគ្រោះ​រស់រាន​មាន​ជីវិត​ពី​គុក​ទួលស្លែង បាន​ធ្វើ​សន្និសីទ​កាសែត បញ្ចប់​ឱសាននុវាទ​នៃ​ការសុំទោស​របស់​លោក កឹម សុខា ដែល​បាន​និយាយ​ថា​គុក​ទួលស្លែង​ជា​គុក​សិប្បនិម្មិត្ត។ ក្នុង​សន្និសីទ​ ដែល លោក ជុំ ម៉ី ថ្លែង​លាយឡំ​ជាមួយ​ទឹកភ្នែក​ផង​នោះ លោក​បាន​បញ្ជាក់​ថា ថ្ងៃ​អាទិត្យ ទី៩ មិថុនា គឺ​ជា​មហាបាតុកម្ម​ប្រឆាំង​នឹង​លោក កឹម សុខា។

ផ្សាយពាណិជ្ជកម្ម

ប្រធាន​សមាគម​ជន​រងគ្រោះ​របប​ខ្មែរក្រហម នៅ​ព្រឹក​ថ្ងៃ​អង្គារ​នេះ​ បាន​ប្រកាស​ធ្វើ​បាតុកម្ម​មនុស្ស​២​ម៉ឺន​នាក់ ប្រឆាំង​លោក កឹម សុខា ប្រធាន​ស្តីទី​គណបក្ស​សង្គ្រោះជាតិ ដែល​គ្រោង​នឹង​វិល​ត្រឡប់​ពី​សហរដ្ឋ​អាមេរិក​វិញ​នៅ​ថ្ងៃ​៤ មិថុនា​នេះ​ដែរ។

លោក ជុំ ម៉ី បានថ្លែង​ឱ្យ​ដឹងថា ថ្ងៃ​ឱសានវាទ​នៃ​ការសុំទោស​របស់​លោក កឹម សុខា ចំពោះ​វិញ្ញាណក្ខន្ធ​ជន​រងគ្រោះ​នៅ​គុក​ទួលស្លែង​បាន​មក​ដល់​ហើយ។ តែ​លោក​ កឹម សុខា នៅ​រឹង​ទទឹង មិន​ព្រម​ទទួល​កំហុស​ដដែល។ ដូច្នេះ មហាបាតុកម្ម ប្រឆាំង​លោក កឹម សុខា នឹង​ផ្ទុះ​ឡើង​នៅ​ថ្ងៃ​អាទិត្យ​ទី​៩ មិថុនា​ខាង​មុខ​នេះ ដោយ​​មាន​មនុស្ស​២​ម៉ឺន​នាក់ នឹង​ជួប​ជុំគ្នា​នៅ​ទីលាន​ប្រជាធិបតេយ្យ​ក្បែរ​វត្តភ្នំ ក្រុង​ភ្នំពេញ។ ដោយឡែក​មនុស្ស​២​ពាន់​នាក់ នឹង​ដង្ហែ​ក្បូន​ទៅ​កាន់ទី​ស្នាក់ការ​កណ្តាល​គណបក្ស​សង្គ្រោះជាតិ ដែល​ស្ថិត​នៅ ក្នុង​សង្កាត់​ភ្នំពេញថ្មី ក្រុងភ្នំពេញ។

លោក ជុំ ម៉ី ដែល​បាន​ថ្លែង​ទាំង​បង្ហូរ​ទឹកភ្នែក ក្នុង​សន្និសីទ​កាសែត​នៅ​ព្រឹកមិញ​នេះ បាន​អះអាង​ថា ប្រសិន​បើ​សម្លេង​ដែល​ លោក ​កឹម សុខា និយាយ​ថា គុក​ទួលស្លែង​ជា​ឆាក​រៀបចំ​នោះ ត្រូវ​គេ​កែច្នៃ​មែន សុំ​ឱ្យ​លោក កឹម សុខា យក​សម្លេង​ដើម​មក​ផ្ទៀងផ្ទាត់​គ្នា ដើម្បី​ដឹង​ការពិត។

លោក ជុំ ម៉ី បន្ត​ថា​បាតុកម្ម​ដែល​លោក ជា​អ្នកដឹកនាំ​នោះ​ មិនមាន​ការគាំទ្រ​ពី​គណបក្ស​នយោបាយ​ណា​មួយ​ទេ។ ហើយ​ក៏​គ្មាន​គោលដៅ​គាំទ្រ​គណបក្ស​នយោបាយ​ណា​មួយ​ដែរ។ យ៉ាងណាក៏ដោយ បក្សប្រឆាំង​បាន​ចោទ​ថា នេះ​ជា​ការរៀបចំ​ដើម្បី​គោលដៅ​នយោបាយ។ គួរបញ្ជាក់ថា បាតុកម្ម​ ​ដែល​ប្រឆាំង​ប្រធាន​ស្តីទី​គណបក្ស​សង្គ្រោះជាតិ​រូប​នេះ គឺ​ធ្វើ​ឡើង​ខណៈ​ដែល​ការ​បោះឆ្នោត​តំណាងរាស្ត្រ​នឹង​មក​ដល់​នៅ​ខែ​កក្កដា​ខាង​មុខ។​ មួយវិញទៀត សភា​កម្ពុជា​នៅ​ថ្ងៃ​សុក្រ​សប្តាហ៍​នេះ នឹង​អនុម័ត​ច្បាប់​ដាក់​ទោស​ទណ្ឌ​លើ​ជន​ណា​ដែល​និយាយ​ថា​គ្មាន​របប​ខ្មែរក្រហម​នៅ​កម្ពុជា​ទៀត​ផង។

ប៉ុន្តែ បាតុកម្ម​ដែល​គ្រោង​ធ្វើ​នៅ​ថ្ងៃ​៩ មិថុនា​ដែល​មាន​បាតុករ​ភាគច្រើន​ជា​ជន​រងគ្រោះ​ក្នុង​របប​ខ្មែរក្រហម​នោះ គ្មាន​វត្តមាន លោក ប៊ូ ម៉េង ដែល​ជា​ជន​រងគ្រោះ​នៅ​រស់រាន​មាន​ជីវិត​ពី​គុកទួលស្លែង និង​ជា​អនុប្រធាន​សមាគម​ជនរងគ្រោះ​នៃ​របប​ខ្មែរក្រហម​ទេ។ លោក ប៊ូ ម៉េង បាន​អះអាងថា លោក​ចង់​នៅ​អព្យាក្រិត មិន​ចូលរួម​បាតុកម្ម និង​មាន​គោលការណ៍​ផ្សះផ្សា​ជាតិ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI