ស៊ីរី

បណ្តាញ​ទូរទស្សន៍​ផ្លូវការ​មួយ​​​ទទួល​​រង​​ការ​វាយ​ប្រហារ​នៅ​ព្រឹកមិញ​

ទីស្នាក់ការ​​នៃ​បណ្តាញ​ទូរទស្សន៍​និន្នាកា​ររដ្ឋាភិបាល​ស៊ីរី​​ទទួល​រងការ​វាយប្រហារ​នៅ​ព្រឹក​ថ្ងៃ​ពុធ​២៧​មិ​ថុនា​២០១២​
ទីស្នាក់ការ​​នៃ​បណ្តាញ​ទូរទស្សន៍​និន្នាកា​ររដ្ឋាភិបាល​ស៊ីរី​​ទទួល​រងការ​វាយប្រហារ​នៅ​ព្រឹក​ថ្ងៃ​ពុធ​២៧​មិ​ថុនា​២០១២​ REUTERS/Stringer

នៅ​​ព្រឹក​​ថ្ងៃ​​ពុធ​​២៧​​មិថុនា​​នេះ ​ជន​​ប្រដាប់​​អាវុធ​​មួយ​​ក្រុម​ បាន​​ចូល​​វាយ​​​លុក​​​​ទី​​ស្នាក់ការ​​​​នៃ​​​បណ្តាញ​​ទូរទស្សន៍​​ផ្លូវការ​​មួយ​​ឈ្មោះ ​Al Ikhbaria ​និង​​បាន​​សម្លាប់​​បុគ្គលិក​​ធ្វើ​ការ​​៣​​នាក់។​ ពួក​”ភេរវជន​បាន​​ដាក់​​​គ្រាប់​បែក​​នៅ​​ទីស្នាក់ការ​ Al Ikhbaria​ បន្ទាប់ពី​​បាន​​វាយ​​បំផ្លិច​​បំផ្លាញ​​ស្ទុយឌីយោ​​សម្រាប់​​ការ​​ផ្សាយ​ព័ត៌មាន​​​តាម​​សាតែលីត​​និង​​ទី​កន្លែង​​ធ្វើ​ការងារ​​របស់​​អ្នក​​កាសែត​-នេះ​បើ​យោង​តាម​ទូរទស្សន៍​រដ្ឋ​ស៊ីរី។​

ផ្សាយពាណិជ្ជកម្ម

ការវាយប្រហារយ៉ាង​សែនសាហាវ ប្រឆាំងបណ្តាញទូរទស្សន៍ផ្លូវការបែប​នេះ គឺ​ជា​លើក​ទី​​មួយ​​​ហើយ​​នៅ​​ប្រទេស​ស៊ីរី ចាប់តាំងពីមាន​ចលនា​បះបោរ​​​ប្រឆាំងនឹង​លោក Bachar al-Assad នៅ​ខែមីនា២០១១មក។ នៅក្នុងការវាយប្រហារនេះ ទូរទស្សន៍រដ្ឋ​ បាន​ធ្វើការ​ចាក់​ផ្សាយបន្តផ្ទាល់​ រូបភាព​នៃ​ការ​បំផ្លិចបំផ្លាញ​ ​ជាអាទិ៍​កន្លែង​​បន្ទប់​​ធ្វើ​ការ​​​ របស់​​អ្នក​កាសែត​ដែល​​បាន​ប្រែ​ក្លាយ​​ទៅ​ជា​សំណល់​​កម្ទេចកម្ទី​ ហើយ​​​​វត្ថុ​ខ្លះ​​ទៀត​​នៅ​​ឆេះ​​ភ្លើង​​នៅ​​ឡើយ។

ពួកភេរវជន ​បាន​ចូលលុកលុយ​​ក្នុងទីស្នាក់ការ​ Al Ikhbaria ដោយ​បាន​ដាក់និង​​បំផ្ទុះ​គ្រាប់​​បែក​​​នៅ​​​កន្លែង​ស្ទុយឌីយោ​  ហើយបាន​​ប្រមូល​យកគ្រឿង​​​បរិក្ខារផ្សេងៗ​ផង។ មិនតែប៉ុណ្ណោះ ពួកភេរវជន ថែម​ទាំង​​បាន​​​​សម្លាប់​​អ្នក​កាសែត​​​និង​​បុគ្គលិក​​ធ្វើការ​​របស់ ​Al Ikhbaria​ ​៣​នាក់​ -នេះ​​ជាការ​បញ្ជាក់​​​​​របស់​រដ្ឋមន្ត្រីក្រសួង​ព័ត៌មានស៊ីរី។

ខាង​ទូរទស្សន៍រដ្ឋវិញ គេអត្ថាធិប្បាយថា « ទោះបីជាមាន អំពើ​ឧក្រិដ្ឋកម្ម​ដ៏​សែន​​សាហាវ​យង់​ឃ្នង​​​នៃ​​​​ពួកភេរវជនយ៉ាងនេះក្តីដែល​​ប៉ុនប៉ង​​ចង់បំបិទមាត់​ប្រទេស​ស៊ីរី​  ​ Al Ikhbaria នៅ​តែ​បន្ត​ការ​ផ្សាយ​ព័ត៌មាន​របស់​ខ្លួនជានិច្ច​”។ រឿងនេះជាការពិត  ពីព្រោះ​បើ​យោង​​​តាម​ការ​អះ​អាង​​របស់​​អ្នកកាសែត​ម្នាក់នៃ​​ទីភ្នាក់ងារព័ត៌មានបារាំង AFP​” បណ្តាញ Al Ikhbaria​ »​ បានចាប់ធ្វើ​ការងារផ្សាយរបស់ខ្លួន​​ឡើងវិញ ក្រោយរយៈពេល​បន្តិច​នៃ​ការ​វាយប្រហារមក។

រីឯ ក្រុម​ប្រឹក្សា​​ជាតិរបស់ស៊ីរី​ នៅក្នុងការវាយប្រហារនេះ បានសង្កត់ធ្ងន់​ថា« ការ​​ឈ្លានពាន​ប្រឆាំង​​​ទូរទស្សន៍​ Al Ikhbaria​ គឺជាការ​ប៉ះពាល់​​មួយដ៏ធ្ងន់ធ្ងរ​​ដល់​​សិទ្ធិ​សេរី​ភាព​របស់​អ្នក​កាសែត​​ក្នុង​​ការ​​បញ្ចេញ​មតិ។

កាលពីយប់មិញ លោកប្រធានាធិបតី Bachar Al Assad បាន​ប្រកាស​​ថា ប្រទេសស៊ីរី កំពុង​ស្ថិត​នៅក្នុង​ភាពសង្គ្រាមមួយដ៏ពិតៗ​ និងក៏មិន​ធ្វើ​សម្បទាន​ណា​​មួយ​ឡើយ​នៅ​ចំពោះ​មុខ​ពួកប្រឆាំងដោយលោក បាន​​ប្តេជ្ញាចិត្ត​ក្នុងការយក​ជ័យជំនះលើសង្គ្រាម។​

​គូររំលឹកថា​ ចាប់​តាំង​ពីលើក​ដំបូង​នៃ​ការ​បះបោរ​របស់ប្រជាជន​នៅក្នុងប្រទេសមក​​​ បណ្តាញ​​ទូរទស្សន៍​​​​ Al Ikhbaria​ តែងតែបរិហារ​ជាពិសេស​ ​ចោទ​ថា​យុទ្ធនាការ​​ផ្សព្វផ្សាយ​ព័ត៌មាន​​​ដែល​ធ្វើ​​​​​ឡើង​ដោយ​លោក​ខាង​​លិចនឹងបណ្តាញ​ទូរទស្សន៍​អារ៉ាប​​​​តាម​សាតែលី​ត​ស្តីពី​ចលនា​បះ​បោរ​​នៅ​ស៊ីរី​នេះ​ពុំ​មានការ​ពិត​​ទេ​ ។ ​ចលនា​​បះបោរ​នេះ ដែលតែងតែ​ត្រូវ​បាន​ទូរទស្សន៍​ Al Ikhbaria ចាត់ទុកជារឿយៗ​ ថាជាការឃុបឃិតស៊ុមគ្រលុំ​គ្នា​ក្នុងអំពើភេរវនិយមដែល​មានការ​​​​​គាំទ្រពី​សំណាក់​​​​​ពួក​មហា​អំណាច​បរទេស៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI