អានតួអត្ថបទ
អាមេរិក

ភេរវកម្ម​បូស្តុន៖​ Djokhar​ Tsarnaev​ អាច​នឹង​ទទួល​ទោស​ប្រហារ​ជីវិត​

Djokhar បាន​ប្រាប់​ថា Tamerlan ជា​អ្នក​​​​ដឹកនាំ​​អោយ​មាន​ការបំផ្ទុះ​គ្រាប់​បែក​ទាំងពីរ​គ្រាប់​។
Djokhar បាន​ប្រាប់​ថា Tamerlan ជា​អ្នក​​​​ដឹកនាំ​​អោយ​មាន​ការបំផ្ទុះ​គ្រាប់​បែក​ទាំងពីរ​គ្រាប់​។ ©FBI
ដោយ៖ ព្រំ សឿន សូលីណា
១៦ នាទី

កាល​ពី​ថ្ងៃ​ចន្ទ​ម្សិលមិញ តុលាការ​អាមេរិក​បាន​ដាក់​ទោស​ Djokhar Tsarnaev ពីបទ​​បាន​​បង្ក​អំពើ​ភេរវកម្ម​ចំនួន​ពីរ​ក្នុង​ឧកាស​នៃ​ការ​រត់​ម៉ារ៉ាតុង​ នៅ​បូស្តុន​ ក្នុង​រដ្ឋ​ម៉ាសាឈូសេត កាល​ពី​ថ្ងៃ​ចន្ទ​សប្តាហ៍​មុន ដែលបានសម្លាប់​មនុស្ស​បីនាក់ និងធ្វើ​អោយ​​របួស​​២០០នាក់។ ​Djokhar Tsarnaev អាច​នឹង​ត្រូវ​ទទួល​ទោស​ប្រហារជីវិត។ តុលាការ​សហព័ន្ធ​នឹង​បើកសវនាការ​កាត់​ទោសជា​លើកទីមួយ​ លើ​ជន​សង្ស័យ​រូបនេះ​នៅ​ថ្ងៃ​​៣០​ឧសភា​ ខាង​មុខ​នេះ។

ផ្សាយពាណិជ្ជកម្ម

Djokhar Tsarnaev អាយុ ១៩​ឆ្នាំ កំពុង​ស្ថិត​នៅ​ក្នុង​មន្ទីរពេទ្យ​ក្រុងបូស្តុន​ ​​ព្យាបាល​របួស​នៅ​ឡើយ។ ទោះ​យ៉ាងនេះ​ក្តី​ នៅ​ថ្ងៃ​ចន្ទ​នេះ តុលាការ​អាមេរិកាំង​បាន​ដាក់​ពិរុទ្ធ​ជន​សង្ស័យ​រូប​នេះ ពី​បទ​បាន​បង្ក​អំពើ​ភេរវកម្ម​​​ត្រួត​គ្នា​ពីរ​​ កាល​ពី​សប្តាហ៍​មុន នៅ​ក្នុង​​​ឧកាស​នៃ​​ការ​រត់​ម៉ារ៉ាតុង​នៅ​បូស្តុន ​រដ្ឋ​ម៉ាសាឈូសេត។ ភេរវកម្ម​ទាំងពីរ​បាន​​បណ្តាល​អោយ​​មនុស្សស្លាប់​​៣នាក់​ និង​​២០០នាក់​ទៀត​​រងរបួស។

តុលាការ​អាច​នឹង​ដាក់​ទោស​ប្រហារជីវិត​ដល់ Djokhar Tsarnaev។ Djokhar Tsarnaev ជាប់​ទោស​ពី​បទ​ប្រើអាវុធ​ប្រល័យលោក។

​​ទូរទស្សន៍​អាមេរិកាំង​ CNN បាន​​លើកប្រភព​ព័ត៌មាន​ពី​រដ្ឋាភិបាល​អាមេរិក ដែល​បាន​ប្រាប់​ថា យោង​តាម​​ចំលើយ​របស់​ជន​សង្ស័យ​Tsarnaev​ គេ​​អាច​ប្រៀបប្រដូច​បងប្អូន​ប្រុស​​ត្រកូល​​Tsarnaev ទាំងពីររូប ​ដែល​បាន​​ធ្វើ​ការ​បំផ្ទុះ​គ្រាប់​បែក​ កាល​ពី​ថ្ងៃ​ចន្ទ​សប្តាហ៍​មុន​នោះ ទៅ​នឹង​សកម្មជន​ជីហាដ​ដែល​បង្ក​អំពើ​ភេរវកម្ម​​​ក្នុង​​គោល​បំណង​ផ្ទាល់​ខ្លួន និយាយ​អោយ​ចំ​គឺ​ថា អំពើ​ភេរវកម្ម​​​​ ពុំ​មែន​ជា​ផែនការ​របស់​ក្រុម​ភេរវករ​ណាមួយ​នោះទេ។

ជន​សង្ស័យ​ Djokhar Tsarnaev ​​មាន​របួស​នៅ​កញ្ចឹងក​ នាំ​អោយ​គេ​គិត​​ថា Djokhar ប្រហែល​ជា​​បាន​ព្យាយាម​​សម្លាប់​ខ្លួន​​ដោយ​​​ដាក់​កាំភ្លើងបាញ់​​ចូលក្នុង​មាត់​ មុន​នឹង​ក្រុម​ប៉ូលិស​ចាប់​ខ្លួន​បាន។​ ​​ដោយ​សារស្ថានភាព​​របួស​នៅ​ធ្ងន់ធ្ងរ​នៅ​ឡើយ Djokhar បាន​​សរសេរ​ជា​លាយលក្ខណ៍​​អក្សរ​ ដើម្បី​ឆ្លើយ​​សំនួ​ររបស់​ប៉ូលិស។​​​​ Djokhar បាន​ទំលាក់​កំហុស​ទាំងអស់​ទៅ​លើ​​បងប្រុស​ខ្លួន​​ Tamerlan ​អាយុ​ ២៦​ឆ្នាំ​ ដែល​បាន​ស្លាប់​កាល​ពី​ថ្ងៃ​សុក្រ​​កន្លង​ទៅ។ Djokhar បាន​ប្រាប់​ថា Tamerlan ជា​អ្នក​ដែល​​ដឹកនាំ​ការបំផ្ទុះ​គ្រាប់​បែក។ Tamerlan ចង់​ការពារ​មិន​អោយ​មាន​ការ​វាយប្រហារ​ទៅ​លើ​​សាសនា​អ៊ីស្លាម​នោះ​ទេ។

មូលហេតុ​នៃ​អំពើ​ភេរវកម្ម​របស់​​បងប្អូន Tsarnaev ទាំង​ពីរ​នាក់​នេះ​​ ​នៅ​មិនទាន់​​​មាន​ភាព​ច្បាស់​លាស់​នៅ​ឡើយទេ។ តើ​វាអាច​បណ្តាល​មក​ពី​​បងប្រុស​​​ត្រកូល​​​ Tsarnaev ​​​​​ងុបងល់​ចាក់​ឫសខ្លាំង​​ទៅ​ក្នុង​​​បញ្ហា​អ៊ីស្លាម​​ហើយបាន​​ជះ​ឥទ្ធិពល​នេះ​លើ​​ប្អូន​ប្រុស​ខ្លួន​ រឺ​ក៏​មក​ពី​ប្អូនប្រុស​​​រូបនេះ​​មាន​ការ​ធុញថប់​​​​នឹង​សង្គម​អាមេរិកាំង?

នៅ​ពេល​នេះ ក្រុមប៉ូលិស​កំពុង​តែ​បន្ត​ការ​ស៊ើបអង្កេត​តទៅទៀត។ ប៉ូលិស​កំពុង​តែ​​ចាប់​អារម្មណ៍​​ទៅ​លើ​តំរុយ​មួយ​នៅ​រុស្ស៊ី និង​​ការ​ដែល​ភេរវជន​ Tamerlan ​ធ្លាប់​បាន​ទៅ​សាធារណរដ្ឋ​Daguestan របស់​រុស្ស៊ី ហើយ​បាន​ស្ថិត​នៅ​ទី​នោះ អស់​រយៈ​ពេល​ជាង​៥ខែ កាល​ពី​ឆ្នាំ​ ២០១២​ កន្លង​ទៅ​៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ