កម្ពុជា-តុលាការខ្មែរក្រហម

សហព្រះរាជអាជ្ញា​​និយាយ​​ពីសំណុំរឿង​​ ០០៣​​

រូបសញ្ញា​តុលាការ​ខ្មែរក្រហម
រូបសញ្ញា​តុលាការ​ខ្មែរក្រហម ©រក្សាសិទ្ធិ

សហ​ព្រះរាជអាជ្ញា​របស់​តុលាការ​ខ្មែរក្រហម​ បាន​ប្រកាស​ពី​ដំណើរការ​នីតិវិធី ក្នុង​សំណុំរឿង​លេខ​០០៣ ដែល​កំពុង​ស្ថិត​នៅក្នុង​ការស៊ើប​អង្កេត​នៅឡើយ​។ ​ក្នុង​សេចក្តី​ថ្លែងការណ៍ សហ​ព្រះរាជអាជ្ញា​ ក៏​បាន​ច្រានចោល​នូវ​ដំណឹង​ដែល​បាន​ផ្សព្វផ្សាយ​ថា ​មាន​អង្គហេតុ​ថ្មីៗ ដូចជា​ ការ​ចូលលុក​លុយ​របស់​ខ្មែរក្រហម ចូល​ក្នុង​ប្រទេស​វៀតណាម និង​ទីតាំង​ឧក្រិដ្ឋកម្ម ​ដែល​គេ​អះអាងថា មានការ​ទាក់ទង​ទៅនឹង​ការ​ស៊ើបសួរ​នៅ​ក្នុង​សំណុំរឿង​លេខ​០០៣​។ ​តាម​សេចក្តី​ប្រកាស ការលើក​ឡើង​ទាំងនោះ គឺជា​ព័ត៌មាន​មិន​ត្រឹមត្រូវ និង​ដែល​នាំឲ្យ​មាន​ការយល់​ច្រឡំ​កាន់តែ​ខ្លាំងឡើង​។ 

ផ្សាយពាណិជ្ជកម្ម

សេចក្តី​ប្រកាស​ព័ត៌មាន​របស់​សហ​ព្រះរាជអាជ្ញា​ នៅ​តុលាការ​ខ្មែរក្រហម បាន​លើកឡើង​ថា ​ពេលនេះ​ សំណុំរឿង​០០៣ កំពុង​តែ​ស្ថិតក្នុង​កិច្ច​ស៊ើបសួរ​នៅឡើយ​។​ ប៉ុន្តែ​សហ​ព្រះរាជអាជ្ញា​ បានទទួល​ និង​ពិនិត្យ​ពិចារណា​លើ​ព័ត៌មាន​នៃ​ការចោទប្រកាន់​ថា មាន​អង្គហេតុ​ថ្មីៗ ដែល​គេ​អះអាងថា មានការ​ទាក់ទង​ទៅនឹង​ការ​ស៊ើបសួរ នៅ​ក្នុង​សំណុំរឿង​លេខ​០០៣​។

 
សេចក្តីប្រកាស កាលពី​ថ្ងៃ​អង្គារ បង្ហាញថា សហ​ព្រះរាជអាជ្ញា កត់សម្គាល់ថា អង្គហេតុ​នានា ដែល​ទាក់ទង​ទៅ​នឹង​ការ​លុកលុយ​របស់​កង​យោធា​កម្ពុជា​ប្រជាធិបតេយ្យ ​ទៅក្នុង​ប្រទេស​វៀតណាម ត្រូវបាន​ស៊ើបសួរ​រួចហើយ និង​ជា​ផ្នែក​មួយ​នៃ​សំណុំរឿង​០០២​។ ​លើសពីនេះ​ទៀត អង្គហេតុ​ថ្មីៗ ដែល​បាន​ចោទប្រកាន់​មិន​មាន​ការទាក់ទង​ទៅនឹង​ទីតាំង​ឧក្រិដ្ឋកម្ម​នានា នៅ​ក្នុង​សំណុំរឿង​០០៣​ទេ ដែល​កន្លងមក សហ​ព្រះរាជអាជ្ញា​ធ្លាប់បាន​ប្រកាស​ដល់​សាធារណជន​រួចហើយ និង​បើតាម​មតិ​របស់​ខ្លួន វា​អាច​ពង្រីក​វិសាលភាព​នៃ​កិច្ច​ស៊ើបសួរ​បន្ថែម​ទៀត​ហួស​ពី​អង្គហេតុ​ចាំបាច់ សម្រាប់​ធ្វើ​ការវាយតម្លៃ​លើ​បញ្ហា​នៃ​ការទទួលខុសត្រូវ ចំពោះ​ឧក្រិដ្ឋកម្ម​ទាំងឡាយ ដែល​បាន​ចោទប្រកាន់​នៅក្នុង​សំណុំរឿង​០០៣ នៃ​ដីកា​សន្និដ្ឋាន​បញ្ជូន​រឿង​ឲ្យ​ស៊ើបសួរ​។

សេចក្តីប្រកាស​ដដែល ក៏បាន​លើកឡើង​ថា សេចក្តីរាយការណ៍​ព័ត៌មាន​ជាច្រើន ទាក់ទង​នឹង​អត្តសញ្ញាណ​របស់​បុគ្គល​នានា ថា​ជា​មុខសញ្ញា​នៃ​កិច្ច​ស៊ើបសួរ គឺជា​ការខុសឆ្គង និង​ធ្វើឲ្យ​មាន​ការយល់ច្រឡំ​។ ផ្ទុយ​ទៅ​នឹង​ការចុះផ្សាយ​ទាំងនោះ អតីត​សហ​ចៅក្រម​ស៊ើបអង្កេត​អន្តរជាតិ មិន​មាន​មតិ ឬក៏​សេចក្តីសន្និដ្ឋាន​ណាមួយ ដែលថា បុគ្គល​ទាំងនោះ ស្ថិតនៅក្នុង​យុត្តាធិការ​របស់​តុលាការ​កាត់ទោស​មេ​ខ្មែរក្រហម​ទេ​។

សហ​ព្រះរាជអាជ្ញា ក៏​បាន​ប្រកាស​បដិសេធ មិន​ប្តឹងទៅ​សហ​ចៅក្រម​ស៊ើបអង្កេត​អំពី​អង្គហេតុ​ថ្មី ដែល​បាន​ចោទប្រកាន់​ទាំង​អស់​នោះ​ទេ​។ ការសម្រេច​នេះ គឺ​សហ​ព្រះរាជអាជ្ញា បាន​ពិចារណា​អំពី​ទម្ងន់​នៃ​ឧក្រិដ្ឋកម្ម ដែល​បាន​ចោទប្រកាន់ នៅក្នុង​ដីកា​សន្និដ្ឋាន​បញ្ជូន​រឿង​ឲ្យ​ស៊ើបសួរ វិសាលភាព​នៃ​ការ​ស៊ើបសួរ​បច្ចុប្បន្ន​ដែល​បាន​បង្កើតឡើង​យ៉ាង​ច្បាស់លាស់ អំពី​សារៈសំខាន់ នៃ​ការដាក់​អាទិភាព​លើ​ការបញ្ចប់​ការ​ស៊ើបសួរ​ដែល​កំពុង​ប្រព្រឹត្តទៅ​ដ៏​មាន​ប្រសិទ្ធភាព និង​កិច្ចដំណើរការ​នីតិវិធី​សវនាការ​នៅ​ចំពោះមុខ​តុលាការ​ខ្មែរក្រហម ព្រមទាំង​អំពី​គោលជំហរ​របស់​សហ​ព្រះរាជអាជ្ញា​អន្តរជាតិ ដែលថា មិន​ផ្តួចផ្តើម​ឲ្យមាន​សំណុំរឿង​បន្ថែមទៀតឡើ​យ បន្ទាប់​ពី​សំណុំរឿង​លេខ​០០៣ និង​០០៤​។

សំណុំរឿង​ដ៏រ​ស៊ើប​ទាំងពីរ​នោះ កំពុង​ជាប់​គាំង ខណៈ​ដែល​សហ​ចៅក្រម​ស៊ើបអង្កេត​អន្តរជាតិ បាន​លាលែង​កាលពី​ខែ​តុលា និង​សហ​ចៅក្រម​ស៊ើបអង្កេត​បម្រុង​របស់​អង្គការសហប្រជាជាតិ ក៏​បាន​លាលែង​ កាលពី​ខែ​ឧសភា៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI