កម្ពុជា-តុលាការខ្មែរក្រហម

សង្គមស៊ីវិល​តឿនកម្ពុជា​និង​ UN​ ឲ្យតែងតាំង​សហ​ចៅក្រម​ស៊ើប​អង្កេត​អន្តរជាតិ​

ពិធី​ចុះ​ហត្ថលេខា​ផ្តល់​ជំនួយ​អាល្លឺម៉ង់ដល់​អង្គភាព​គាំពារ​ជន​រងគ្រោះ នៃ​តុលាការ​ខ្មែរក្រហម
ពិធី​ចុះ​ហត្ថលេខា​ផ្តល់​ជំនួយ​អាល្លឺម៉ង់ដល់​អង្គភាព​គាំពារ​ជន​រងគ្រោះ នៃ​តុលាការ​ខ្មែរក្រហម ECCC

គណៈកម្មាធិការ​ប្រព្រឹត្តិ​កម្ម​នៃ​អង្គការ​សមាគម​ការពា​រ​សិទ្ធិមនុស្ស​កម្ពុជា​បាន​អំពាវនាវ​ឲ្យ​អង្គការ​សហប្រជាជាតិ​និង​រដ្ឋាភិបាល​កម្ពុជា​ប្រញាប់​តែងតាំង​សហ​ចៅក្រម​ស៊ើបអង្កេត​អន្តរជាតិ​នៅ​សាលាក្តី​ខ្មែរក្រហម​ឲ្យ​បាន​ឆាប់​ដើម្បី​បន្ត​ការស៊ើបអង្កេត​សំណុំរឿង ០០៣ និង០០៤ ដ៏​ចម្រូងចម្រាស។ ​ការអំពាវនាវ​នេះ​បាន​ធ្វើឡើង​ខណៈ​ដែល​ការិយាល័យ​សហ​ចៅក្រម​ស៊ើបអង្កេត​កំពុង​គាំងដំណើរ​ដោយហេតុតែ​កៅអី​សហ​ចៅក្រម​ស៊ើបអង្កេត​អន្តរជាតិ​នៅ​ទំនេរ​បន្ទាប់ពី​ការលាលែង​របស់លោក Laurent Kasper-Ansermet។

ផ្សាយពាណិជ្ជកម្ម

នៅក្នុង​សេចក្តី​ថ្លែងការណ៍​ចុះ​ថ្ងៃទី៧​មិថុនា​ គណៈកម្មាធិការ​ប្រព្រឹត្តិ​កម្ម​នៃ​អង្គការ​សមាគម​ការពារ​សិទ្ធិមនុស្ស​នៅ​កម្ពុជា ​ហៅ​កាត់​ថា ​CHRAC ​បាន​ជំរុញ​ឲ្យ​អង្គការ​សហប្រជាជាតិ​ និង​រដ្ឋាភិបាល​ក្រុងភ្នំពេញ​ដែលជា​ភាគី​បង្កើត​សាលាក្តី​ខ្មែរក្រហម​ប្រញាប់​រួសរាន់​ដោះស្រាយ​វិបត្តិ​នៅក្នុង​ការិយាល័យ​សហ​ចៅក្រម​ស៊ើប​អង្កេត។ ​បណ្តុំ​នៃ​អង្គការ​និង​សមាគម​ការពារ​សិទ្ធិមនុស្ស​ខាងលើនេះ​បានស្នើ​ចំណុច​សំខាន់៣​ទៅកាន់​ទីក្រុង​ភ្នំពេញ ​និង​បូរី​ញូវយ៉ក។

 
សំណើ​ទាំងបី​រួមមាន​ទី១៖ សុំ​ឲ្យ​ប្រញាប់​តែងតាំង​សហ​ចៅក្រម​ស៊ើបអង្កេត​អន្តរជាតិ​ដើម្បី​បំពេញ​កន្លែង​ដែល​ទំនេរ, ​ទី២៖ សុំ​ឲ្យ​ទទួលស្គាល់​ការងារ​ស៊ើបអង្កេត​ដែល​ធ្វើឡើង​ដោយ​លោក​ចៅក្រម Laurent Kasper-Ansermet​ និង​ទី៣៖ សុំ​ឲ្យ​គាំទ្រ​ការងារ​របស់​សហ​ចៅក្រម​ស៊ើបអង្កេត​ថ្មី​ដើម្បី​ទទួលបាន​សេចក្តីសម្រេច​ឯករាជ្យ​ទាក់ទង​នឹង​សំណុំរឿង ០០៣ និង ០០៤ ដ៏​ចម្រូងចម្រាស។
សេចក្តីថ្លែងការណ៍​ដដែល​បញ្ជាក់ថា គណៈកម្មាធិការ​ប្រព្រឹត្តិ​កម្ម​ចង់ឃើញ​ភាពជា​អ្នកដឹកនាំ​ខ្លាំងក្លា​របស់​អង្គការ​សហប្រជាជាតិ និង​រដ្ឋាភិបាល​កម្ពុជា តាមរយៈ​ការបញ្ជាក់​ឡើងវិញ​អំពី​ការតាំង​ចិត្ត​របស់ខ្លួន​ចំពោះ​សំណុំរឿង​ចុងក្រោយ​ទាំងពីរ​ខាងលើ​និង​ការបំពេញភារកិច្ច​ដ៏​ជោគជ័យ​របស់ខ្លួន។ ​គណៈកម្មាធិការ​ប្រព្រឹត្តិ​កម្មបាន​រម្លឹកថា សាលាក្តី​ខ្មែរក្រហម​មាន​តួនាទី​យ៉ាង​ធំធេង​ជាង​ដំណើរការ​កាត់ក្តី​នៃ​បទឧក្រិដ្ឋ​កម្ម​ធម្មតា។

គួរកត់​សម្គាល់​ថា ​បច្ចុប្បន្ននេះ ​ការិយាល័យ​សហ​ចៅក្រម​ស៊ើបអង្កេត​កំពុង​ជាប់គាំង​មិនអាច​សម្រេច​កិច្ចការ​អ្វី​បានឡើយ​ដោយសារតែ​អវត្តមាន​ភាគី​អន្តរជាតិ។ ​កៅអី​របស់​សហ​ចៅក្រម​អន្តរជាតិ​( ទាំង​ពេញសិទ្ធិ និង​បម្រុង)​ បាន​នៅ​ទំនេរ​ចាប់តាំងពី​ថ្ងៃទី៤​ខែឧសភា​មក​បន្ទាប់ពី​ការលាឈប់​ពី​តំណែង​របស់លោក​ Laurent Kasper-Ansermet។

លោក នេត្រ ភក្ត្រា ​អ្នកនាំពាក្យ​សាលាក្តី​ខ្មែរក្រហម​បាន​ឲ្យ​ដឹង​នៅថ្ងៃនេះ​ថា ​ការជ្រើសរើស​សហ​ចៅក្រម​ស៊ើបអង្កេត​អន្តរជាតិ​កំពុងស្ថិត​ក្នុង​ដៃ​របស់​អង្គការ​សហប្រជាជាតិ​នៅឡើយ។ ​សាលាក្តី​នៅ​មិនទាន់បាន​ទទួល​ដំណឹង​អ្វី​អំពី​បញ្ហា​នេះ​នៅឡើយ​ទេ។ ​តាម​នីតិវិធី ​បន្ទាប់ពី​ជ្រើសរើស​បាន​ហើយ ​អង្គការ​សហប្រជាជាតិ​នឹង​បញ្ជូន​ឈ្មោះ​មក​រដ្ឋាភិបាល​កម្ពុជា​ដើម្បី​សុំ​ការតែង​តាំង​ពី​ឧត្តម​ក្រុមប្រឹក្សា​នៃ​អង្គចៅក្រម។​ ការិយាល័យ​សហ​ចៅក្រម​ស៊ើប​អង្កេត ​បាន​ជួបនឹង​បញ្ហា​ជា​រៀង​រហូតមក​ដោយសារ​តែ សំណុំរឿង​០០៣ និង០០៤ ដ៏​ស្មុគស្មាញ​ដែល​សហ​ចៅក្រម​ជាតិ​និង​អន្តរជាតិ​មិន​ចុះ​សម្រុង​គ្នា៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI