អានតួអត្ថបទ
អេហ្ស៊ីប

នាយករដ្ឋមន្រ្តី​អេហ្ស៊ីប​ប្រកាស​ដាក់​ទណ្ឌកម្ម​ប៉ូលិស​ដែល​បាន​សម្លា​ប់​ក្រុមបាតុករ

ទីលាន Tahrir ដែលក្រុមបាតុករសំដែងកំហឹងរបស់ខ្លួន
ទីលាន Tahrir ដែលក្រុមបាតុករសំដែងកំហឹងរបស់ខ្លួន REUTERS/Asmaa Waguih
ដោយ៖ អ៊ុង ច័ន្ទ​សោភា
១៥ នាទី

កាលពី​ថ្ងៃសុក្រ ទី០៨​កក្កដា​ កន្លង​ទៅ ប្រជាជន​អេហ្ស៊ីប​ជាច្រើន​នាក់​បាន​ធ្វើការ​តវ៉ា​ ពី​​ការ​​​មិនអើពើ​របស់​រដ្ឋាភិបាលថ្មី ​ដាក់​ទណ្ឌកម្ម​ទៅ​លើ​ប៉ូលិស​ដែលបាន​សម្លាប់​ក្រុម​បាតុករ​ កាលពី​បាតុកម្ម​ប្រឆាំង​នឹង​អតីត​ប្រធានាធិបតី​ចាស់ គឺលោក Hosni Moubarak។ ដើម្បី​ពន្លត់​កំហឹង​នេះ លោក​នាយករដ្ឋមន្រ្តី Essam Charaf បាន​ចេញ​មុខ ប្រកាស​អះអាង​នៅថ្ងៃសៅរ៍​ម្សិលមិញថា ក្រុមប៉ូលិស​ដែល​ពាក់ព័ន្ធ​នឹង​ត្រូវ​ដកចេញ​ពីតំណែង ​និង​ទទួល​ការ​កាត់ទោស​តាម​ផ្លូវច្បាប់។

ផ្សាយពាណិជ្ជកម្ម

 

នាយករដ្ឋមន្រ្តី​អេហ្ស៊ីប​ថ្មី​ ​លោក Essam Charaf បានអះអាងថា លោក​បានបញ្ជា​រួចហើយ​អោយ​ក្រសួងមហាផ្ទៃ​បញ្ឈប់ការងារ​ប៉ូលិស​ទាំងឡាយណា​ ដែលត្រូវបាន​ចោទប្រកាន់ថា​បាន​សម្លាប់​ពួក​បាតុករ នៅក្នុង​ការតវ៉ា​កន្លងមក​ប្រឆាំងនឹង អតីតប្រធានាធិបតី​ចាស់​លោក Moubarak។​ ការតវ៉ា​ដែលបានបណ្តាល​អោយ​មនុស្ស​ប្រមាណ​៨៥០នាក់ ស្លាប់​បាត់បង់​ជីវិត។

នាយករដ្ឋមន្រ្តីរូបនេះ​ក៏បានទាមទារ​អោយតុលាការ​ចាត់វិធានការ​អោយបានលឿន ទៅលើ​ជនជាប់ចោទ​ដែលជាប់​ពាក់ព័ន្ធទៅនឹង​ការបង្រ្កាប​បាតុកម្ម​ និង​អំពើ​ពុករលួយ ពីមុនមក ជាពិសេស​មេដឹកនាំធំៗ​នៃ​របបផ្តាច់ការ​លោក​Moubarak។

ប៉ុន្តែ សុន្ទរកថា​អះអាងនេះមិនបានធ្វើ​អោយ​ក្រុមបាតុករ​ស្ងប់ចិត្ត​នោះទេ។ ​ផ្ទុយទៅវិញ វាបានធ្វើ​អោយកំហឹង​របស់​ពួកគេ​ ឆាបឆេះ កាន់តែ​ខ្លាំងឡើង​ដោយ​ពួកគេ​រិៈគន់​តបត​ទៅវិញថា​ វាគ្រាន់​តែជាវិធានការ​តូចតាច​ដែលល្អ​តែមើល តែមិនមាន​ប្រសិទ្ធិភាព​អ្វីនោះទេ។​ ពួកគេ​បាន​ស្រែកអះអាងថា​ ពួកគេ​មិនព្រម​ចាកចេញពី​ទីលាន Tahrir​ ដែល​ជាទី​បាតុកម្ម​របស់ខ្លួន​បច្ចុប្បន្ន​នោះទេ។​ ការខកចិត្តនេះ ក៏​ដោយសារ​តែ​មកទល់​នឹង​សព្វថ្ងៃ មាន​ប៉ូលិស​តែ​ម្នាក់គត់ ​ដែល​ត្រូវបាន​កាត់ទោស​ដោយ​កំបាំងមុខ។

ភាពយឺតយ៉ាវ​នៃប្រព័ន្ធច្បាប់​នេះហើយ ដែលបាន​ធ្វើអោយ​ពួកគេ​សំរេចចិត្ត​ចុះមក​តវ៉ា​សាជាថ្មី​ម្តង​ទៀត នៅតាម​ដងវិថី​ជាច្រើន ក្នុងទីក្រុង Caire​ បន្ចាប់ពី​ការរក្សាភាព​ស្ងប់ស្ងាត់​អស់រយៈ​ជាច្រើនខែ ក្រោយពី​លោកMoubarak ចុះចេញ​ពីតំណែងមក។

គួរបញ្ជាក់​ដែរ​ថា​អតីត​ប្រធានាធិបតី​ចាស់ កំពុងតែ​ជាប់ឃុំ​នៅក្នុង​មន្ទីរពេទ្យ​មួយ​ក្នុង​ប្រទេស​អេហ្ស៊ីប។​សវនាការ​របស់លោក​គ្រោងនឹង​ធ្វើឡើង​នៅថ្ងៃ​ទី៣​ សីហា​ខាងមុខ​នេះ។ ស្របពេល​ជាមួយគ្នា​ដែរ អតីត​រដ្ឋមន្រ្តី​ជាច្រើន​រូប​របស់គាត់ ក៏កំពុង​ជាប់​ឃុំឃាំង​ផងដែរ។

លោក​Moubarak​ ដែលមានវ័យ​៨២ឆ្នាំ ត្រូវបានចោទ​ប្រកាន់​ថា​បានដឹកនាំ​ប្រទេស​មួយនេះ​ចូលទៅ​ក្នុង​របបផ្តាច់ការ​ជិត​៣០ឆ្នាំ ដែល​ក្នុងនោះ​លោក​បាន​ប្រព្រឹត្ត​អំពើ​ពុករលួយ និងបាន​បំបិទ​សិទ្ធិ​សេរីភាព​ប្រជាជន។ លោកត្រូវ​បានទម្លាក់​ចេញ​ពីតំណែង កាលពី​ខែកុម្ភៈ​កន្លងទៅ ដោយ​ចលនា​បះបោរ​ជាច្រើន​លើកច្រើនសា​របស់​មហាជន​អេហ្ស៊ីប។​ ចលនា​បះបោរ​ដែលមាន​រូបលោក Charaf នាយករដ្ឋមន្រ្តីថ្មី ចូលរួម​យ៉ាង​ស្វិតស្វាញ​ផងដែរ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ