អេហ្ស៊ីប

ប្រជាមតិ​ស្តីពី​រដ្ឋធម្មនុញ្ញ​នឹង​ប្រព្រឹត្ត​ទៅ​នៅ​ថ្ងៃ​១៩​មីនា

នាយក​រដ្ឋមន្ត្រី​ថ្មី​អេហ្ស៊ីប លោក Essam Sharaf នៅ​ទីលាន Tahrir ថ្ងៃ​ទី​៤​មីនា ២០១១
នាយក​រដ្ឋមន្ត្រី​ថ្មី​អេហ្ស៊ីប លោក Essam Sharaf នៅ​ទីលាន Tahrir ថ្ងៃ​ទី​៤​មីនា ២០១១ AFP

កាលបរិច្ឆេទ​នៃ​ប្រជាមតិ​ស្តី​ពី​រដ្ឋធម្មនុញ្ញ​ត្រូវ​បាន​កំណត់​ធ្វើ​នៅ​ ថ្ងៃ​១៩​មីនា​ខាង​មុខ​នេះ​។​ប្រជាជន​អេហ្ស៊ីប​ត្រូវ​បញ្ចេញ​មតិ​ស្តី​ពី​ វិសោធនកម្ម​ចំពោះ​បច្ចុប្បន្ន​រដ្ឋធម្មនុញ្ញ​ដែល​ត្រូវ​បាន​ព្យួរ​ដោយ​កងទ័ព។​គណៈកម្មការ​អ្នក​យុត្តិសាស្ត្រ​ជញ្ជឹង​គិត​អំពី​កំណែ​ទម្រង់​ដែល​ទាក់​ទង ​ជាសារវន្ត​ទៅ​នឹង​មាត្រា​ចំនួន​៨​ដែល​ចែង​ជា​ឩទាហរណ៍​អំពី​អាណត្តិ​ ប្រធានាធិបតី​ឬ​ក៏​ការចាត់​តាំង​ការបោះ​ឆ្នោត​។

ផ្សាយពាណិជ្ជកម្ម

សេចក្តី​រាយការណ៍​របស់​ Alexandre BUCCIANTI ពីទីក្រុង​គែរ ប្រែ​សម្រួល​ដោយ វីនស្តុន រតនា

កងទ័ព​ចង់​ពន្លឿន​ដំណើរការ​នេះ​ ដើម្បី​វិល​ត្រឡប់​ទៅ​រក​ស្ថានភាព​ប្រក្រតី​វិញ។​ ឃើញ​ថា​ អ្នក​បោះ​ឆ្នោត​មាន​ពេល​២​សប្តាហ៍​ ដើម្បី​គិត​បញ្ចេញ​មតិ​មុន​ពេល​ធ្វើ​ប្រជាមតិ។​ ក្នុង​កាលៈទេសៈដទៃ​ទៀត​ គឺ​ជា​រយៈ​ពេល​ខ្លី​ពេក​ ប៉ុន្តែ​ហួស​ពី​គ្រប់​គ្រាន់​ទៅ​ទៀត​ ក្នុង​កាលៈទេសៈ​បច្ចុប្បន្ន​នេះ។

 
ជន​ជាតិ​អេហ្ស៊ីប​គ្រប់​រូប​យល់​ស្រប​ថា​ រាល់​ការធ្វើ​វិសោធនកម្ម​ចំពោះ​រដ្ឋធម្មនុញ្ញ​អាច​ផ្តល់​តែ​គុណ​ប្រយោជន៍។​ អ្នក​ខ្លះ​គិត​ថា​ យើង​ពុំ​បាន​ទៅ​ឱ្យ​បាន​វែង​ឆ្ងាយ​ល្មម​ទេ​ នៅ​ក្នុង​ការផ្លាស់​ប្តូរ។​ អ្នក​ខ្លះ​ទៀត​យល់​ឃើញ​ថា​ អាណត្តិ​ប្រធានាធិបតី​៤​ឆ្នាំ​ខ្លី​ពេក។​ ប៉ុន្តែ​ បើ​ពិនិត្យ​ឱ្យ​ហ្មត់​ចត់​ទៅ​ ការ​នេះ​ពិត​ជា​ពុំ​សំខាន់​ខ្លាំង​ណាស់​ណា​ទេ​ ដោយ​ហេតុ​ថា​ល្គឹក​ណា​ប្រទេស​ជាតិ​នឹង​មាន​ប្រធានាធិបតី​ និង​រដ្ឋសភា​​ ល្គឹក​នោះ​យើង​នឹង​ខំ​ប្រឹង​តាក់​តែង​រដ្ឋធម្មនុញ្ញ​ថ្មី។ ​ជា​ការដ្ឋាន​មួយ​ដែល​នឹង​មាន​ការប៉ះ​ទង្គិច​គ្នា​រវាង​ចរន្ត​គំនិត​ផ្សេងៗ​ ចាប់​ពី​ចរន្ត​ឆ្វេងនិយម​រហូត​ដល់​ភាតរបុត្រ​អ៊ីស្លាម​ ដោយ​ឆ្លង​កាត់​ពួក​អ្នក​សេរីនិយម។​

អ្វី​ដែល​សំខាន់​គឺ​ការ​ធានា​ឲ្យ​មាន​តម្លាភាព​នៃ​ការ​បោះ​ឆ្នោត​ដែល​ចាប់​តាំង​ពី​​រដ្ឋ​ប្រហារ​​យោធា​ នៅ​ឆ្នាំ​១៩៥២​មក​ រមែង​តែង​តែ​ត្រូវ​បាន​ក្លែង​បន្លំ។ កត្តា​មួយ​ទៀត​ដ៏​សំខាន់​ណាស់​ដែរ​គឺ​ ចំនួន​អ្នក​ចូលរួម​ធ្វើ​ប្រជា​មតិ។ ឧត្តម​ក្រុម​ប្រឹក្សា​នៃ​កង​ទ័ព​បាន​សំរេច​ចិត្ត​ថា ពលរដ្ឋ​រាល់​រូប​ដែល​មាន​អត្តសញ្ញាណប័ណ្ណជាតិ​អាច​ទៅ​បោះ​ឆ្នោត​នៅ​ការិយាល័យ​ជិត​បំផុត។ នៅ​​អតីតកាល​ អ្នក​បោះ​ឆ្នោត​មាន​ចំនួន​តិច​ណាស់​ ទោះបី​ជា​ផ្លូវការ​ ថា​មាន​អ្នក​ទៅ​បោះ​ឆ្នោត​ចំនួន​ច្រើន​បំផុត​ក្តី។​ប្រហែល​ជា​គេ​ឲ្យ​ខ្មោច​ដែល​គេ​រុំ​ទុក​តម្កល់​ទុក​នៅ​​ក្នុង​សារមន្ទីរ​ទៅ​បោះឆ្នោត​ទេ​ដឹង?!  

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI