រុស្ស៊ី

អគ្គិភ័យ​​ឆេះ​ នាវា​មុជទឹក​បរមាណូ​នៅ​ការដ្ឋាន​ជួសជុល​

អគ្កិភ័យ​ឆេះ​នាវា​មុជទឹក​បរមាណូ​នៅ​ការដ្ឋាន​ជួសជុល​ជិតទៅក្រុងផែMourmansk
អគ្កិភ័យ​ឆេះ​នាវា​មុជទឹក​បរមាណូ​នៅ​ការដ្ឋាន​ជួសជុល​ជិតទៅក្រុងផែMourmansk RFI/Keo Chhaya

ការដ្ឋាន​​​​​ជួស​ជុល​​នេះ​ គឺ​​ស្ថិត​​នៅ​​ជិត​​ក្រុងផែ​ Mourmansk​ មាត់​​សមុទ្ទ​ Barents​ ចម្ងាយ​​ប្រមាណ ១.៥០០​គ.ម.​ ខាង​​ជើង​​ពី ​​រដ្ឋធានី​​ម៉ូស្គូ។ ​នាវា​​មុជ​​ទឹក​​បរមាណូ​​នោះ​​ឈ្មោះ ​Ekaterinbourg។ ​វា​ធ្លាក់​​ខ្លួន​​ឆេះ ​គឺ​​តាំង​​ពី​​រសៀល​​ម្សិលមិញ​​មក​ហើយ​​ឥឡូវ​​ត្រូវ​​សន្មតថា​​រលត់​​ទៅ​​ហើយ។​ ក្រសួង​​ការពារ​​ជាតិ​​រុស្ស៊ី​ បាន​​ប្រកាស​​ថា​ អត្រា​​វិទ្យុ​សកម្ម​​នៅ​​ទី​ការដ្ឋាន​​ជុំវិញ​​កន្លែង​​ឆេះ​​នោះ​ ស្ថិត​​ក្នុង​​ភាព​​ប្រក្រតី​​ធម្មតា​​មិន​​ឡើង​​ហួស​​ពី​​កម្រិត​​ដែល​​ត្រូវ​​មាន​​ឡើយ។​

ផ្សាយពាណិជ្ជកម្ម

គួរ​និយាយ​ថា តាំងពី​មុន​ចូល​ខ្លួន​ទៅ​ទទួល​ការ​ជួសជុល នៅ​ការដ្ឋាន​ដែល ស្ថិត​នៅ​ចម្ងាយ​៧​គ.ម.ពី​ក្រុង​ផែ Mourmansk ទាំង​ម៉ាស៊ីន​ប្រតិករ​នុយក្លេអ៊ែរ​២​គ្រឿង របស់​នាវា​បាន​ត្រូវ​ពន្លត់​ឲ្យ​ឈប់​ដើរ ទាំង​សព្វាវុធ​នុយក្លេអ៊ែរ​សោត របស់​នាវា បាន​ត្រូវ​ដោះ​ចេញ​ទៅ​ដែរ។

មូលហេតុ​នៃ​ការ​ឆេះ​នោះ គឺ​បណ្តាល​មក​ពី ផ្កាភ្លើង​នៃ​ប្រដាប់​ផ្សារ ពេល​បំពេញ​ប្រតិបត្តិការ ជួស​ជុល បាន​ខ្ទាត​សព្វ​ទិស​ទៅ​ប៉ះ គ្រោង​ធ្វើ​ពី​ឈើ ព័ទ្ធ​ជុំវិញ​តួ​ខ្លួន​នាវា សម្រាប់​កម្មករ​ឡើង បំពេញ​ការងារ​ជួស​ជុល​ផ្ទាល់។

អគ្គិភ័យ​បាន​ឆាប​ឆេះ​គឺ​នៅ​ម៉ោង​៤​រសៀល​ម្សិលមិញ វា​ឆេះ ទ្រលោម លុះ​ទាល់​តែ​អណ្តាត​ភ្លើង​វា វាត់​ដល់​កំពស់ ១០​ម៉ែត្រ​ឯណោះ។ អណ្តាត​ភ្លើង​នេះ បាន បណ្តាល​ឲ្យ​ឆេះ ទាំង​ស្រទាប់​កៅស៊ូ​ដែល​ព័ទ្ធ​ជុំវិញ​តួ​ខ្លួន​នាវា​តែ​ម្តង កៅស៊ូ​នេះ គឺ​សម្រាប់​រំខាន ដល់ Radar កុំ​ឲ្យ​ស្កាត់​ចាប់​បាន អំពី​ដំណើរ​ចល័ត​នៃ​នាវា​ផ្ទាល់។

ដើម្បី​បន្សោយ​ការ​ឆេះ​និង​សម្រួល​ដល់​ការ​លត់​ភ្លើង គេ​បាន​សម្រេច​ថា​ពន្លិច​តួ​ខ្លួន​នាវា​ឲ្យ​លិច​ទៅ​ក្នុង​ទឹក​អស់​ពាក់​កណ្តាល​តួ​ខ្លួន​ទៅ។ ពេញ​មួយ​យប់​កន្លង​ទៅ ប្រតិបត្តិការ​លត់​ភ្លើង​នោះ បាន​ប្រព្រឹត្ត​ទៅ​គ្មាន​ឈប់​ទេ លុះ​ទាល់​តែ​លែង​មាន​អណ្តាត​ភ្លើង​ឆេះ​ទៀត​ឡើយ។ ហើយ​តាំង​ពី​ព្រឹកមិញ​មក ការ​លត់​នេះ​បន្ត​ប្រព្រឹត្ត​ទៅ​ក្នុង​បន្ទប់​ច្រើន​រាប់​មិន​អស់​ខាង​ក្នុង​នាវា កុំ​ឲ្យ​មាន នៅ​សល់​ភ្នក់​ភ្លើង​ណា​ឡើយ។ មក​ទល់​ម៉ោង​នេះ អគ្គិភ័យ​ត្រូវ​សន្មតថា​ បង្ក្រាប​បាន​ទាំង​ស្រុង​តែ​ម្តង។ ក្នុង​ប្រតិបត្តិការ​បង្ក្រាប​នេះ មាន​អ្នក​លត់​ភ្លើង​២​នាក់​និង​យោធា​៧​នាក់​ធ្លាក់​ខ្លួន​រងគ្រោះ។

ក្នុង​របាយការណ៍​ជូន​លោក​ប្រធានាធិបតី មេដវេដេវ និង​ជូន​លោក​នាយក​រដ្ឋមន្ត្រី​ពូទីន មាន​លើក​ឡើង​ថា ការ​វាស់​ស្ទង់​កម្រិត​វិទ្យុសកម្ម នៅ​តំបន់​កើត​ហេតុ ធ្វើ​ជាប់​ជានិច្ច​ដោយ​ស្ថានីយ​ខាង​ត្រួត​ពិនិត្យ​ចំនួន ៨៤​កន្លែង​ក្នុង​នោះ មាន​២៥ គឺ​ចល័ត​ពី​កន្លែង​មួយ​ទៅ​មួយ។

នាវា​មុជ​ទឹក​បរមាណូ ឈ្មោះ Ekaterinbourg បាន​ត្រូវ​ដាក់​ឲ្យ​ដំណើរការ គឺ​ក្នុង​ឆ្នាំ​១៩៨៤។ វា​បំពាក់​ទៅ​ដោយ កាំជ្រួច​មីស្ស៊ីល​បរមាណូ​អន្តរទ្វីប ចំនួន​១៦​ដើម។ វា​ដើរ​ដោយ​ម៉ាស៊ីន​ប្រតិករ​នុយក្លេអ៊ែរ ២ គ្រឿង​មាន​កម្លាំង​ភ្លើង​សរុប ១៨០ Megawatt។

ក្នុង​កង​ម៉ារីន​រុស្ស៊ី តាម​ប្រសាសន៍​លោក​ឧត្តមនាវី Oleg Bourtsev ជា​មេ​បញ្ជាការ​រង​ទី​១ នៃ​កង​ម៉ារីន​នេះ បច្ចុប្បន្ន មាន​នាវា​មុជ​ទឹក​ប្រភេទ​ប្លែក​ៗ​ចំនួន​៦០​គ្រឿង៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI