បារាំង

បក្ស​ស្តាំ​ជ្រុលនិយម​ឡើងកូត​ខ្លាំង​ក្នុង​ការ​បោះឆ្នោត​ក្រុម​ប្រឹក្សា​ខេត្ត

ការ​បោះឆ្នោត​ជ្រើស​រើស​ក្រុម​ប្រឹក្សា​ខេត្ត​ ជុំ​ទីមូយ​ថ្ងៃ​ទី ២០ មីនា ២០១១
ការ​បោះឆ្នោត​ជ្រើស​រើស​ក្រុម​ប្រឹក្សា​ខេត្ត​ ជុំ​ទីមូយ​ថ្ងៃ​ទី ២០ មីនា ២០១១ Reuters

ការ​បោះឆ្នោត​ជ្រើស​រើស​ក្រុម​ប្រឹក្សា​ខេត្ត​ (Election cantonale) ថ្ងៃ​អាទិត្យ​ទី ២០ មីនា ២០១១ ម្សិលមិញ ដែល​ជា​​ការបោះឆ្នោត​​ដោយ​ផ្ទាល់​ចុង​ក្រោយ​ មុន​នឹង​ឈាន​ដល់​ការ​បោះឆ្នោត​ជ្រើស​រើស​ប្រធានាធិបតី នៅ​ឆ្នាំ​២០១២ អាច​ចាត់ទុក​ថា​តេស្ត​សំខាន់​មួយ​សំរាប់​គ្រប់​គណបក្ស​ទាំង​អស់។ ជា​លទ្ធផល​នៅ​ក្នុង​ជុំ​ទីមួយ​នេះ គណបក្ស​​សង្គម​និយម ដែល​ជា​គណបក្ស​ប្រឆាំង បាន​នាំ​មុខ​ដាច់​គណបក្ស​កាន់​អំណាច​ UMP របស់​លោក​ប្រធានាធិបតី នីកូឡា សាកូហ្ស៊ី។ អ្វី​ជា​ការ​កត់​សម្គាល់​ខ្លាំង​មួយ​ទៀត គឺ​គណបក្ស​ស្តាំ​និយមជ្រុល​ (Front National) ទទួល​សំឡេង​គាំទ្រ​ស្ទុះ​ឡើង​ខ្លាំង។ ចំនួន​ ​អ្នក​មិន​ចូលរួម​បោះឆ្នោត បាន​កើន​ឡើង​ដល់​កំរិត​កំពូល​មិន​ធ្លាប់​មាន គឺ​ប្រមាណជិត ៥៦% ។

ផ្សាយពាណិជ្ជកម្ម

សេចក្តី​រាយការណ៍​របស់ អៀង សុខម៉ិញ

មិន​ធ្លាប់​មាន​ឡើយ​ក្នុង​ប្រវត្តិ​នៃ​ការ​បោះឆ្នោត​ជ្រើស​រើស​ទីប្រឹក្សា​ខេត្ត​ នៅ​ប្រទេស​បារាំង​ ដែល​ចំនួន​អ្នក​មិន​ចូល​រួមបោះឆ្នោត​​បាន​ឡើង​ដល់ ជិត ៥៦%។

ចំណែកឯលទ្ធផលវិញ​ក៏​គួរ​​ឲ្យ​ភ្ញាក់ផ្អើល​ នៅ​ជុំទីមួយ​នេះ គណបក្ស​រណសិរ្ស​ជាតិ ដែល​ជា​គណបក្ស​ស្តាំ​និយម​ជ្រុល​ដឹក​នាំ​ដោយ​លោកស្រី ម៉ារីន ឡឺប៉ែន Marine Le Pen បាន​ស្ទុះ​ឡើង​ខ្លាំង ដោយ​បាន​ទទួល​សំឡេង​គាំទ្រប្រមាណ​១៥% គឺ​ដេញ​យ៉ាង​ប្រកៀក​ប្រកិត​បំផុត​ ​គណបក្ស​កាន់​អំណាច​ UMP របស់​លោក​ប្រធានាធិបតី​ នីកូឡា សាកូហ្ស៊ី ដែល​ទទួល​បានការ​គាំទ្រ​​តែ​១៧%។ ជា​មួយ​នឹង​ការ​ប្រមូល​សំឡេង​គាំទ្រ​បាន​២៥% ​គណបក្សសង្គម​និយម PS បាន​ឈ្នះ​នាំ​មុខ​គេ។ នៅ​ក្នុង​ខេត្ត​ខ្លះ ទីប្រឹក្សា​គណបក្ស​សង្គម​និយម បាន​ជាប់ឆ្នោត​ ​នៅ​ជុំ​ទីមួយ​នេះ​តែ​ម្តង។

ក្នុង​ការ​បោះឆ្នោត​ជុំ​ទី​ពីរ សប្តាហ៍​ក្រោយ​ គណបក្ស​សង្គម​និយម​ ត្រូវ​ប្រឈម​​តទល់​ ក្នុង​ខេត្តខណ្ឌ​​ភាគ​ច្រើន​ នឹង​គណបក្ស​ស្តាំ​និយម​ជ្រុល​ FN តែ​ម្តង ព្រោះ​ទីប្រឹក្សា​គណបក្ស​ UMP ​មួយ​ភាគ​ធំ​ត្រូវ​គណបក្ស​សង្គមនិយម​ជម្រុះ​ចោលតាំង​ពី​ជុំ​ទីមួយ​ បាត់​ទៅ​ហើយ។

ដើម្បី​ប្រឈម​មុខ​នឹង​ការ​ស្ទុះ​ឡើង​នៃ​គណបក្ស​ស្តាំ​និយមជ្រុល​​ រណសិរ្ស​ជាតិ ដែល​ល្បី​ខាង​ស្អប់​ខ្ពើម​ជន​អន្តោប្រវេសន៍ ​ប្រមុខ​ដឹក​នាំបក្ស​សង្គមនិយម បាន​អំពាវ​នាវ​ ឲ្យ​ប្រមូល​កម្លាំង​អ្នក​ឆ្វេង​និយម និង​ណែ​នាំ​ឲ្យ​បណ្តា​ជន​ទៅ​ចូល​រួម​បោះឆ្នោត​នៅជុំ​ទីពីរ​ឲ្យ​បាន​ច្រើន ព្រម​ទាំង​ជំរុញ​ឲ្យ​​​បោះ​ឆ្នោត​ជូន​បក្ស​ណា​ដែល​មិន​មែន​បក្ស​ស្តាំ​និយមជ្រុល​ FN ឬ​បោះឆ្នោត​ជូន​បក្ស​កាន់​អំណាចតែ​ម្តង ​ប្រសិន​បើ​បក្ស​សង្គមនិយម​ គ្មាន​វត្តមាននៅ​ជុំ​ទីពីរ។

ប៉ុន្តែនៅ​ចំពោះ​មុខ​បរាជ័យ​ជា​លើក​ទីពីរ​របស់​ខ្លួន​នេះ ​ ប្រមុខ​ដឹកនាំ​គណបក្ស​UMP ច្រាន​ចោល​លទ្ធភាព​បង្រួបបង្រួម​​ជាមួយ​បក្ស​ស្តាំ​និយម​ផ្សេង​ទៀត រាប់​ទាំង​គណបក្ស​រណសិរ្ស​ជាតិ​ផង នៅ​ក្នុង​ការ​បោះឆ្នោត​ជុំ​ទីពីរ និង​មិន​បាន​ចេញ​សេចក្តី​ណែ​នាំ​អ្វី​ទេ។​ សូម​បញ្ជាក់​ថា​កាល​ពី​ឆ្នាំ​ ២០១០​កន្លង​ទៅ គណបក្ស​កាន់​អំណាច​ UMPនេះ ក៏​ធ្លាប់​ទទួល​បរាជ័យ​យ៉ាង​ជូរចត់​ដែរ​ក្នុង​ការ​បោះឆ្នោត​តំបន់៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI