អានតួអត្ថបទ
កូរ៉េខាងត្បូង-អាមេរិក

អាមេរិក និង​កូរ៉េខាងត្បូង​សម្រេច​ចុះ​កិច្ច​ព្រមព្រៀង​ការផ្តោះប្តូរ​សេរី​រវាង​ប្រទេស​ទាំង​ពីរ

រដ្ឋមន្រ្តី​ក្រសួង​ពាណិជ្ជកម្ម​របស់​កូរ៉េខាងត្បូង​ដែល​ទើប​មក​ពី​ចុះ​ហត្ថលេខា​លើ​កិច្ច​ព្រមព្រៀង​នៅ​អាមេរិក
រដ្ឋមន្រ្តី​ក្រសួង​ពាណិជ្ជកម្ម​របស់​កូរ៉េខាងត្បូង​ដែល​ទើប​មក​ពី​ចុះ​ហត្ថលេខា​លើ​កិច្ច​ព្រមព្រៀង​នៅ​អាមេរិក ©Reuters
ដោយ៖ ឈាង បុប្ផា
២០ នាទី

ទើបតែ​បញ្ចប់​សមយុទ្ធ​រួមគ្នា​បាន​តែ​ប៉ុន្មានថ្ងៃ អាមេរិក និង​កូរ៉េខាងត្បូង​បាន​បង្ហាញ​នូវការសហការ​គ្នា​កាន់តែ​ជិតស្និទ្ធ​ថែមទៀត តាមរយៈ​ការចុះ​ហត្ថលេខា​លើ​កិច្ចព្រមព្រៀង ផ្តោះប្តូរ​ពាណិជ្ជកម្ម​ដោយ​សេរី​រវាង​ប្រទេស​ទាំងពីរ ដែល​បាន​ធ្វើ​ឡើង កាលពី​ថ្ងៃ​សុក្រ​ម្សិលមិញ។ អាមេរិក​សង្ឃឹម​នឹង​ទទួល​បាន​ប្រយោជន៍​ពី​កិច្ចព្រមព្រៀង​នេះ នៅ​ពេល​ដែល​កូរ៉េខាងត្បូង​សម្រេច​បន្ថយ​ពន្ធ​លើ​ទំនិញ​ ដែល​នាំចូល​មក​ពី​អាមេរិក។

ផ្សាយពាណិជ្ជកម្ម

 

សេចក្តី​រាយការណ៍​របស់​ឈាង បុប្ផា

នៅក្រោយ​ការចុះ​ហត្ថលេខា​ភ្លាមៗ ប្រមុខដឹកនាំ​រដ្ឋ​អាមេរិក និង​កូរ៉េខាងត្បូង​បាន​ធ្វើ​សេចក្តី​ថ្លែងការ​ស្វាគម​ដល់​ដំណើរ​វិវឌ្ឍន៍​នៃ​ទំនាក់​ទំនង​សេដ្ឋកិច្ច​រវាង​ប្រទេស​ទាំងពីរ។ ការពិត​ជាក់ស្តែង អាមេរិក​អាច​ទទួល​ប្រយោជន៍​ច្រើន​ពី​កិច្ច​ព្រមព្រៀង​លើ​ការផ្តោះប្តូរ​ពាណិជ្ជកម្ម​ដោយ​សេរី​នេះ បើប្រៀបធៀប​នឹង​កូរ៉េខាងត្បូង។ នោះ​មានន័យ​ថា នៅពេល​កូរ៉េខាងត្បូង​សម្រេច​កាត់​បន្ថយ​ពន្ធ​លើ​ទំនិញ​នាំចូល​មក​ពី​អាមេរិក អាមេរិក​នឹង​មាន​លទ្ធភាព​បញ្ចេញ​លក់​រថយន្ត​ជាច្រើន​របស់​ខ្លួន មក​ក្នុង​ទីផ្សារ​កូរ៉េខាងត្បូង។ ការបញ្ចេញ​លក់​រថយន្ត​មក​ទីផ្សារ​ក្រៅ ប្រទេស នឹង​អាច​ធ្វើ​ឲ្យ​អាមេរិក​បង្កើត​ការងារ​ប្រមាណ ៧ ម៉ឺន ហើយ​នេះ​ជា​រឿង​ល្អ​មួយ​សម្រាប់​រដ្ឋបាល​របស់​លោក​អូបាម៉ា ដែល​កំពុង​ត្រូវ​គេ​រិះគន់ ដោយសារ​តែ​ការកើនឡើង ជា​លំដាប់ នូវ​ចំនួន​អ្នកអត់​ការងារធ្វើ ក្នុង​ទឹកដី​អាមេរិក។

បើ​ងាក​មកមើល​កូរ៉េខាងត្បូង​វិញ ក្នុង​វិស័យ​សេដ្ឋកិច្ច កូរ៉េខាងត្បូង​មិនបាន​កេងចំណេញ​អ្វី​ពី​កិច្ច​ព្រមព្រៀង​នេះ ព្រោះ​កូរ៉េ​ខាងត្បូង​ធ្លាប់​តែ​បង់ពន្ធ​តិច​លើ​ទំនិញ​របស់​ខ្លួន​ដែល​នាំចូល​ទៅក្នុង​ទីផ្សារ​អាមេរិក​រួចទៅហើយ។ គួរដឹង​ថា ​ពន្ធ​លើ​ទំនិញ​នាំចូល ក្នុង​ប្រទេស​កូរ៉េខាងត្បូង មាន​តម្លៃ​ខ្ពស់ (ពីរ ឬ​បីដង) ជាង​តម្លៃពន្ធ​ដែល​កំណត់​ក្នុង​ទឹកដី​អាមេរិក។

តាមរយៈ​ការចុះ​កិច្ចព្រមព្រៀង​លើក​នេះ កូរ៉េខាងត្បូង​មិន​បាន​ប្រយោជន៍​ផ្នែក​សេដ្ឋកិច្ច​មែន ប៉ុន្តែ ខាងផ្នែក​ការទូត និង​ការសហការ​ផ្នែក​យោធា​វិញ កូរ៉េខាងត្បូង​បាន​ចំណេញច្រើន។ ក្នុង​កាលៈទេសៈ ដែល​ខ្លួន​កំពុង​រងការគំរាម​កំហែង​​ពី​​កូរ៉េខាងជើង សេអ៊ូល​ត្រូវការ​សហការ​ជាមួយ​ សម្ព័ន្ធមិត្ត ដូចជា​អាមេរិក​ដែលជា​ប្រទេស​មហាអំណាច​ពិភពលោក។ ជាក់ស្តែង សមយុទ្ធ​រួម​គ្នា​ជាមួយ​អាមេរិក នៅ​ដើមសប្តាហ៍​នេះ និង​គម្រោង​សមយុទ្ធ​រួម​ជាថ្មី ក្នុង​ពេល​ខាងមុខនេះ អាច​ធ្វើ​ឲ្យ​កូរ៉េខាងត្បូង​បង្ហាញ​ទៅ​គូសត្រូវ​របស់​ខ្លួន គឺ​កូរ៉េខាងជើង​ថា ខ្លួន​មាន​ខ្នងបង្អែក​ធំរឹងមាំ​មួយ។

សូមបញ្ជាក់​ផង​ដែរ​ថា កិច្ចព្រមព្រៀង​ផ្តោះប្តូរពាណិជ្ជកម្ម​ដោយ​​សេរី​កូរ៉េខាងត្បូង-អាមេរិកបាន​ធ្វើ​ឡើង​តាំងពី​ឆ្នាំ ២០០៧​មក​ម្ល៉េះ ប៉ុន្តែ ដំណើរការ​កែសម្រួល​ចំណុច​ខ្លះ​ត្រូវ​បាន​ផ្អាក បន្ទាប់​ពី​កូរ៉េខាងត្បូង​មិន​ព្រម​បើកទូលាយ​ទីផ្សារ​របស់ខ្លួន​សម្រាប់​ទំនិញ​សាច់គោ​ដែល​នាំចូល​មក​ពី​អាមេរិក។ រហូតមកដល់​ពេលនេះ កូរ៉េខាងត្បូង​នៅ​តែ​បន្តឹង​ផ្នែក​ការនាំចូល​សាច់គោ​ដដែល តែ​បាន​បន្ថយពន្ធ​លើ​រថយន្ត​ដែល​នាំចូល​មក​ពី​អាមេរិក។ រហូតមកដល់​ពេល​នេះ តម្លៃ​នៃ​ការផ្តោះប្តូរ​ពាណិជ្ជកម្មដោយ​​សេរី​រវាង​ប្រទេស​ទាំងពីរ​មាន​តម្លៃ​ជាង ៦ម៉ឺន ៦​ពាន់​លាន​ដុល្លារ ក្នុង​ឆ្នាំ ២០០៩៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ