ជប៉ុន

រដ្ឋាភិបាល​ក្រុង​តូក្យូ​ពន្យារ​សេចក្តី​សម្រេច​នុយក្លេអ៊ែរ

នាយករដ្ឋមន្ត្រី​ជប៉ុន លោក Yoshihiko Noda
នាយករដ្ឋមន្ត្រី​ជប៉ុន លោក Yoshihiko Noda REUTERS

គោល​នយោបាយ​កាត់​បន្ថយ​​ការ​ប្រើ​ប្រាស់​​ថាមពល​នុយក្លេអ៊ែរ ឱ្យ​បាន​១៥%​ពី​ពេល​នេះ​ដល់​ឆ្នាំ​ ២០៣០ ដែល​​​​រដ្ឋាភិបាល​របស់​លោក​នាយករដ្ឋមន្ត្រី Yoshihiko Noda ត្រូវ​ប្រកាស​នៅ​ថ្ងៃ​ចន្ទ​នេះ ​ ទំនង​ជា​មិន​អាច​​ប្រព្រឹត្ត​ទៅ​បាន​ឡើយ។ រដ្ឋាភិបាល​ជប៉ុន​ចង់​ពន្យារ​ពេល​បន្តិច​សិន។ នេះ​បើ​យោង​តាម​ប្រភព​ផ្ទៃក្នុង​រដ្ឋាភិបាល​។

ផ្សាយពាណិជ្ជកម្ម

 

គ្រោះ​មហន្តរាយ​នុយក្លេអ៊ែរ នៅ​ហ្វុគូស្ហ៊ីម៉ា ថ្ងៃ​ទី​១១​ មីនា​ ឆ្នាំ​២០១១ បាន​​ជំរុញ​ឱ្យ​រដ្ឋាភិបាល​ជប៉ុន​បច្ចុប្បន្ន​សើ​រើ​ឡើង​វិញ​កម្មវិធីនយោបាយ​ផ្នែក​ថាមពល។ ការ​ចរចា​​ជាប់​គាំង​ រវាង​ក្រុម​សកម្មជន​ប្រឆាំង​នឹង​ថាមពល​នុយក្លេអ៊ែរ និង​ក្រុម​អ្នក​ការពារ​ថាមពល​បរមាណូ​ បាន​ធ្វើ​ឱ្យ​លោក​នាយក​រដ្ឋមន្ត្រី និង​គណបក្ស​ប្រជាធិតេយ្យ​ជួប​ការ​លំបាក កាន់​តែ​​ខ្លាំង ជាពិសេស​នៅ​ពេល​ជិត​បោះឆ្នោត​សភា​។

នាំ​ជប៉ុន​ឱ្យចេញ​​ផុត​ពី​ការ​ពឹង​ផ្អែក​លើ​ថាមពល​នុយក្លេអ៊ែរ​ ត្រូវ​បាន ដាក់​បញ្ជូល​ក្នុង​កម្មវិធី​នយោបាយ​របស់​បក្ស ដោយ​​​លោក Yoshihiko Noda ជា​នាយក​រដ្ឋមន្ត្រី​ជប៉ុន​​ទីបី គិត​ចាប់​តាំង​ពី​​​គណបក្ស​ប្រជាធិបតេយ្យ​បាន​ ជាប់​ឆ្នោត​សភា​ជា​ប្រវត្តិសាស្ត្រ​ ​នៅ​ឆ្នាំ​២០០៩ ប៉ុន្តែ​មិន​បាន​កំណត់​កាល​បរិច្ឆេទ​ច្បាស់​លាស់ទេ។

គណ​បក្ស​ប្រជាធិបតេយ្យ​ជប៉ុន បាន​គ្រោង​ថា​មិន​សាងសង់​មជ្ឈមណ្ឌល​នុយក្លេអ៊ែរ​ថ្មីទៀត​ឡើយ។ មជ្ឈមណ្ឌល​ដែល​មាន​ស្រាប់​ត្រូវ​តែ​គោរព​ច្បាប់​សុវត្ថិភាព​នុយក្លេអ៊ែរ ដោយ​អាច​ដំណើរ​ការ​ឬ មាន​អាយុ​កាល​ធ្វើការ​តែ​៤០​ឆ្នាំ​ប៉ុណ្ណោះ។ ជាមួយ​នឹង​នយោបាយ​បែប​នេះ ជប៉ុន​នឹង​កាត់​បន្ថយ​ការ​ប្រើប្រាស់​ថាមពល​បាន​មក​ពី​នុយក្លេអ៊ែរ ចំនួន​១៥%​នៅ​ឆ្នាំ​២០៣០ និង​លែង​ប្រើ​ថាមពល​នេះ​សោះ​នៅ​ឆ្នាំ​២០៥០។

ប៉ុន្តែ​សម្រាប់​ក្រុម​អ្នក​គាំទ្រ បោះបង់​ចោល​ថាមពល​នុយក្លេអ៊ែរ ទៅ​ស្វែង​រក​ថាមពល​ហ្វូស៊ីល​ឬ ថាមពល​ព្រះ​អាទិត្យ និង​ថាមពល​ដើរ​ដោយ​ខ្យល់​ Energie Eolienne នឹង​ធ្វើ​តម្លែ​អគ្គិសនី​ឡើង​ថ្លៃ​កប់​ពពក។

នៅម្ខាង​ទៀត រដ្ឋាភិបាល​ត្រូវ​ប្រឈម​មុខ​នឹង​កំហឹង​របស់​ក្រុម​អ្នក​ប្រឆាំង​នុយក្លេអ៊ែរ បន្ទាប់​ពី​ការ​ប្រកាស​ដាក់​ឱ្យ​ដំណើរ​ការ​រ៉េអាក់ទ័រ​ពី​រ​កាលពី​ខែ​កក្កដា​កន្លង​ទៅ។

សូម​បញ្ជាក់​ថា នាយករដ្ឋមន្ត្រី​ពីរ​នាក់​មុន​របស់​បក្ស​ប្រជាធិបតេយ្យ​សុទ្ធតែ​មាន​ជំហរ​ប្រឆាំង​នឹង​ថាមពល​នុយក្លេអ៊ែរ​ទាំងអស់​៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI