ចិន-ភូមា

HRW ៖ ចិន​ត្រូវ​ជួយ​ជនភៀស​ខ្លួន​កាឈិន

ជនភៀសខ្លួន​កាឈិន
ជនភៀសខ្លួន​កាឈិន REUTERS/Soe Zeya Tun

ជន​ជាតិ​ភាគ​តិច​កាឈិន ជនជាតិ​ភាគតិច​នៅ​ភូមា ជា​ច្រើន​ពាន់​នាក់​បាន​នាំ​គ្នា​រត់​ភៀស​ខ្លួន​ ទៅ​ជ្រក​កោន​នៅ​ប្រទេស​ចិន ដើម្បី​គេច​ពី​សង្គ្រាម​ ពី​ការ​ប្រយុទ្ធ​គ្នា​រវាង​កងទ័ព​រដ្ឋាភិបាល​ភូមា និង​កង​ប្រដាប់​អាវុធ​ឯករាជ្យ​កាឈិន ប៉ុន្តែ​ពួក​គេ​ត្រូវ​ប្រឈម​មុខ​នឹង​លក្ខខណ្ឌ​ជីវិត​ដ៏​គួរ​ឱ្យ​អស់​សង្ឃឹម​បំផុត ! នេះ​បើ​តាម​ការ​បរិហារ​របស់​អង្គការ​ការពារ​សិទ្ធិមនុស្ស​ Human Rights Watch ដែល​អំពាវនាវ​យ៉ាង​ទទូច​ឱ្យ​ក្រុង​ប៉េកាំង​បើក​ច្រក​ជំនួយ​មនុស្សធម៌។

ផ្សាយពាណិជ្ជកម្ម

ការ​ប្រយុទ្ធគ្នា នៅ​ភាគ​ខាង​ជើង​បំផុត​នៃ​ប្រទេស​ភូមា តាំង​ពី​ខែ​មិថុនា ២០១១​មក បាន​ជំរុញ​ឱ្យ​ជន​ស៊ីវិល​​ជាង​៧​ម៉ឺន​នាក់​រត់​គេច​ចេញ​ពី​ភូមិឋាន។ ក្នុង​ចំណោម​នោះ បើ​យោង​តាម​តួលេខ​របស់​អង្គការ​ការពារសិទ្ធិមនុស្ស HRW មាន​ប្រមាណពី ​៧​ពាន់​ទៅ​មួយ​ម៉ឺន​នាក់ បាន​ភៀស​ខ្លួន​ទៅ​ខេត្ត​យូណាន​របស់​ចិន ដែល​មាន​ព្រំ​ប្រទល់​ជាប់​ភូមា​។ ប៉ុន្តែ​លក្ខខណ្ឌ​ជីវិត​​ជន​ភៀស​ខ្លួន​ទាំង​នោះ​ ខ្វះ​សព្វ​ខ្វះគ្រប់ ជំរំ​រខេករខាក គ្មាន​ដំបូល​ត្រឹម​ត្រូវ គ្មាន​ស្បៀង​អាហារ​បរិភោគ​គ្រប់​គ្រាន់ គ្មាន​ទឹក​ស្អាត គ្មាន​បង្គន់​អនាម័យ​ប្រើប្រាស់ និង​គ្មាន​ការ​ថែទាំ​សុខភាព​​ សូម្បី​តែ​ក្នុង​កំរិត​បឋម​ចាំបាច់​សម្រាប់​ជីវិត។

 
គឺ​ជា​វិបត្តិ​មនុស្ស​ធម៌​ដ៏​ធ្ងន់ធ្ងរ​ និង​ពិតៗ ! ដ្បិត​ចិន​ដែល​ជា​ប្រទេស​ហត្ថលេខីមួយ​​​​លើ​សន្ធិសញ្ញា​អន្តរជាតិ​ស្តី​ពី​ជន​ភៀសខ្លួន មិន​បាន​​ផ្តល់​ជំនួយ​ឧបត្ថម្ភ​ដល់​ជន​ភៀសខ្លួន​កាឈិន ហើយ​​មិន​អនុញ្ញាត​អ្នក​ទទួល​បន្ទុក​​សិទ្ធិមនុស្ស​អង្គការ​សហប្រជាជាតិ​ ក៏​ដូច​ជា​អង្គការ​​មនុស្សធម៌​ផ្សេងទៀត​ចូល​ទៅ​ជួយ​​ប្រជាជន​ទាំង​នោះ​ទេ ! នេះ​បើ​តាម​របាយកាណ៍​​មួយ​របស់​ HRW ក្រោម​ចំណង​ជើង​ថា “ឯកា​នៅ​យូណាន”។

សម្រាប់​អង្គការ ប្រសិន​បើ​ចិន​អនុគ្រោះ​ឱ្យ​ជនជាតិ​កាឈិន​ចូល​​ខេត្ត​យូណាន​ហើយ ចិន​ត្រូវ​មាន​ភារៈ​មើល​ការ​ខុស​ត្រូវ​ និង​គោរព​កាតព្វកិច្ច​ស្រប​តាម​ច្បាប់​អន្តរជាតិ គឺមិន​បញ្ជូន​ទៅ​ស្រុក​ដើម​វិញ​ និង​ត្រូវ​ផ្គត់ផ្គង់​ជីវភាព​រស់​នៅ​ឱ្យ​បាន​សម​ស្រប​តាម​តម្រូវការ។ មិន​ត្រឹម​តែ​មិន​ជួយ​សម្រួល​ការរស់​នៅ​ អាជ្ញាធរ​ចិន​ថែម​ទាំង​បាន​អនុវត្ត​ការ​ធ្វើ​តេស្ត​គ្រឿង​ញៀន​ នៅ​តាម​កំណាត់​ផ្លូវ​ ដើម្បី​ជំរិតយក​លុយ​ ឬ​បញ្ជូនអ្នក​ញៀន​​ភ្លាម​គ្មាន​បង្អង់ទៅ​កាន់​មណ្ឌល​អប់​រំ​ធ្វើ​ការ​ជា​ទម្ងន់។

ជន​ភៀសខ្លួន​កាឈិន​ទាំង​អស់​សុទ្ធ​តែអះអាង​ចង់​វិល​ត្រឡប់​មក​ស្រុក​កំណើត​វិញ នៅ​ពេល​មាន​សន្តិភាព។ ប៉ុន្តែ​រហូត​មកទល់​ពេល​នេះ​ការ​ចរចា​ឈប់​បាញ់​រវាង​រដ្ឋាភិបាល​និង​កងកម្លាំង​ឧទ្ទាម​កាឈិន​ពុំ​ទទួល​បាន​លទ្ធផល​សោះ ទោះ​បី​ជា​​ក្រុម​​បះបោរ​ ​ជនជាតិ​ភាគ​តិច​ផ្សេង​ទៀត​បាន​ចុះ​ហត្ថលេខា​ព្រមព្រៀង​ឈប់​បាញ់​ ជាមួយ​រដ្ឋាភិបាល​ក៏​ដោយ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI