បង់ក្លាដែស-អាមេរិក

លោកស្រី ហ៊ីលឡារី គ្លីនតុន​អញ្ជើញទៅ​បង់ក្លាដែស​ដែល​កំពុង​ស្គាល់​ភាព​តានតឹង​នយោបាយ

លោកស្រី​ប្រមុខ​ការទូត​អាមេរិក ហ៊ីលឡារី គ្លីនតុន
លោកស្រី​ប្រមុខ​ការទូត​អាមេរិក ហ៊ីលឡារី គ្លីនតុន REUTERS/Damir Sagolj

បន្ទាប់​ពី​បាន​បំពេញ​ទស្សនកិច្ច​ខាង​ផ្លូវទូត​នៅ​ទីក្រុង​​ប៉េកំាង ប្រទេស​ចិន លោកស្រី​ប្រមុខ​ការទូត​អាមេរិក ហ៊ីលឡារី គ្លីនតុន​បាន​បន្ត​ទស្សនកិច្ច​មួយ​ជុំទ្វីប​អាស៊ី​ដោយ​ធ្វើ​ដំណើរ​ទៅ​កាន់​ប្រទេស​បង់ក្លាដែស​ក្នុង​ថ្ងៃ​សៅរ៍ ទី៥ ឧសភា​នេះ។ ការ​អញ្ជើញ​ទៅ​កាន់​ប្រទេស​បង់ក្លាដែស​របស់​លោកស្រី​គ្លីនតុន​បាន​ធ្វើ​ឡើង ចំ​ពេល​ដែល​ស្ថានការណ៍​នយោបាយ​កំពុង​ឡើង​តានតឹង បន្ទាប់​ពី​ការ​បាត់​ខ្លួន​ប្រមុខ​គណបក្ស​ប្រឆំាង​ម្នាក់​កាល​ពី​ដំណាច់​ខែ​មេសា។

ផ្សាយពាណិជ្ជកម្ម

គិត​តំាង​ពី​ឆ្នំា ២០០៤​មក នេះ​ជា​លើក​ទីមួយ​បង្អស់​ដែល​មាន​សមាជិក​រដ្ឋបាល​អាមេរិកំាង​ម្នាក់​ដាក់​ជើង​ជាន់​លើ​ទឹកដី​បង់ក្លាដែស។ តាម​កម្មវិធី​ដែល​បាន​គ្រោង​ទុក លោកស្រី​ប្រមុខ​ការទូត​អាមេរិក​ត្រូវ​ចូល​ជួប​លោក​នាយករដ្ឋមន្រ្តី​បង់ក្លាដែស Sheikh Hasina និង​ប្រធាន​គណបក្ស​ប្រឆំាង លោក Begum Khaleda Zia។ បន្ទាប់​មក លោកស្រី​គ្លីនតុន​ក៏​គ្រោង​នឹង​ជួប​សន្ទនា​ជាមួយ​លោក Muhammad Yunus ជ័យលាភី​រង្វាន់​ណូបែល​សន្តិភាព និង​ជា​បិតា​មីក្រូ​ឥណទាន ដែល​គ្រប់​គ្នា​ហៅ​ក្រៅ​ថា ជា​បិតា​ធនាគារ​សម្រាប់​អ្នក​ក្រីក្រ។ លោក Muhammad Yunus ដែល​បាន​បង្ខំ​ចិត្ត​លា​ឈប់​ពី​ការងារ​នៅ​ធនាគារ Grameen Bank ក្នុង​ឆ្នំា ២០១១។

អ្វី​ជា​ការ​កត់សម្គាល់ ដំណើរ​ទៅ​កាន់​ប្រទេស​បង់ក្លាដែស​របស់​លោកស្រី​គ្លីនតុន​ពេល​នេះ​បាន​ធ្វើ​ឡើង ចំ​ពេល​ដែល​ស្ថានការណ៍​នយោបាយ​កំពុង​ឡើង​តានតឹង​ដល់​កំពូល។ ភាព​តានតឹង​ដែល​បាន​ផ្ទុះ​ឡើង ក្រោយ​ពី​ការ​បាត់​ខ្លួន​លោក Ilyas Ali អតីត​អ្នក​តំណាងរាស្រ្ត​ម្នាក់​នៃ​គណបក្ស​ជាតិនិយម​បង់ក្លាដែស​កាល​ពី​ដំណាច់​ខែ​មេសា​កន្លង​ទៅ។ ការ​បាត់ខ្លួន​លោក Ilyas Ali ដ៏​​អាថ៌កំបំាង​ដែល​បាន​បង្ក​ឲ្យ​មាន​ក្បួនបាតុកម្ម និង​អំពើហិង្សា​បណ្តាល​ឲ្យ​ស្លាប់​មនុស្ស​ចំនួន ៥នាក់។ ទន្ទឹម​គ្នា​នេះ សមាជិក​នៃ​គណបក្ស​ប្រឆំាង​ក៏​បាន​ទាមទារ​ឲ្យ​រដ្ឋាភិបាល​បើក​ការ​ស៊ើបអង្កេត​ស៊ីជម្រៅ​មួយ។

យ៉ាង​ណា​ក៏​ដោយ ប្រភព​រដ្ឋាភិបាល​បង់ក្លាដែស​ឲ្យ​ដឹង​ថា លោកស្រី​គ្លីនតុន​នឹង​ត្រូវ​សម្តែង​សាទរ​ចំពោះ​ភាព​ចម្រើន​ទៅ​មុខ​រវាង​ទីក្រុង​ដាកា និង​វ៉ាស៊ីនតោន​នៅ​ក្នុង​យុទ្ធនាការ​ប្រយុទ្ធ​ប្រឆំាង​នឹង​ភេរវនិយម។ ជាមួយ​គ្នា​នេះ វត្តមាន​របស់​ប្រមុខ​ការទូត​អាមេរិក​នៅ​បង់ក្លាដែស​ក៏​ជា​សញ្ញា​មួយ​បញ្ជាក់​ថា ប្រទេស និង​ប្រជាជន​បង់ក្លាដែស​ទំាង ១៦៦លាន​នាក់ គឺ​ជា​ដៃគូ​ពិតប្រាដ​​របស់​សហរដ្ឋអាមេរិក។ ម្យ៉ាង​ទៀត ទស្សនកិច្ច​របស់​លោកស្រី​គ្លីនតុន​ក៏​ជា​ឱកាស​មួយ​ដែល​ទីក្រុង​វ៉ាស៊ីនតោន​ចង់​បង្ហាញ​ពី​ការ​សន្យា​របស់​ខ្លួន​នៅ​ក្នុង​វិស័យ​សិទ្ធិមនុស្ស បន្ទាប់​ពី​ទស្សនកិច្ច​នៅ​ក្នុង​ប្រទេស​ចិន​ដែល​បាន​បំពុល​ដោយ​សំណុំរឿង​សកម្មជន​សិទ្ធិមនុស្ស​ពិការ​ភ្នែក​ចិន​ម្នាក់​ឈ្មោះ ឆិន ហ្គ័ងឆឹង។

បន្ទាប់​ពី​ប្រទេស​បង់ក្លាដែស លោកស្រី​គ្លីនតុន​នឹង​ត្រូវ​បញ្ចប់​ទស្សនកិច្ច​មួយជុំ​ទ្វីប​អាស៊ី ដោយ​បន្ត​ដំណើរ​ទៅ​កាន់​ប្រទេស​ឥណ្ឌា​នៅ​សប្តាហ៍​ក្រោយ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI