អានតួអត្ថបទ
កម្ពុជា

ប្រមុខ​​ការទូត​​ខ្មែរ​​ស្នើ​​ប្រធាន​​ថ្មី​​របស់​​ADB​​ ជួយ​​អភិវឌ្ឍ​​​ជនបទ​​​កម្ពុជា​​

លោក​ឧប​នាយករដ្ឋមន្ត្រី​ ហោ ណាំហុង ស្នើ​ប្រធាន​ថ្មី​របស់​ADB​ ជួយ​អភិវឌ្ឍ​​ជនបទ​​កម្ពុជា​
លោក​ឧប​នាយករដ្ឋមន្ត្រី​ ហោ ណាំហុង ស្នើ​ប្រធាន​ថ្មី​របស់​ADB​ ជួយ​អភិវឌ្ឍ​​ជនបទ​​កម្ពុជា​
ដោយ៖ លាង ដឺលុច
១៣ នាទី

ប្រធាន​ថ្មី​របស់​ធនាគារ​អភិវឌ្ឍន៍​អាស៊ី​ ADB លោក​ Eric Sidgwick បាន​ជួប​ពិភាក្សា​ការងារ​ជាមួយ​លោក​ឧប​នាយករដ្ឋមន្ត្រី ​ហោ ណាំហុង​ នៅ​ព្រឹក​ថ្ងៃ​ចន្ទ​នេះ​ ក្រោយ​ពី​លោក​បាន​ទទួល​ការ​តែងតាំង​ជា​ប្រធាន​ធនាគារ នៅ​កម្ពុជា។ ប្រមុខ​ការ​ទូត​កម្ពុជា​ បាន​ស្នើ​អោយ​ប្រធាន​ថ្មី​របស់ADB ពិនិត្យ​មើល​ការងារ​អភិវឌ្ឍន៍​នៅ​ជនបទ​របស់​កម្ពុជា។

ផ្សាយពាណិជ្ជកម្ម

ប្រមុខ​ការទូត​កម្ពុជា​លោក​ឧបនាយក​រដ្ឋមន្ត្រី ​ហោ ណាំហុង​ បាន​​ស្នើ​ ប្រធាន​អណត្តិ​ថ្មី​របស់​ធនាគារ​អភិវឌ្ឍន៍​អាស៊ី ​ADB ប្រចាំ​កម្ពុជា​ អោយ​ផ្តោត​លើ​ការ​ជួយ​អភិវឌ្ឍន៍​តំបន់​ជនបទ ​របស់​កម្ពុជា​ដើម្បី​ការ​កាត់​​បន្ថយ​ភាព​ក្រី​ក្រ។ លោក​រដ្ឋមន្ត្រី​ការ​របទេស​កម្ពុជា ​បាន​លើក​ឡើង ​អំពី​ការ​សាងសង់​ហេដ្ឋារចនាសម្ព័ន្ធ​ផ្លូវថ្នល់ និង​ប្រព័ន្ធ​ធារាសាស្ត្រ ​​ប្រាប់​ប្រធាន​ ADB។ ការ​លើក​ឡើង​របស់​លោក​ឧបនាយក​រដ្ឋមន្ត្រី​ហោ ណាំហុង ធ្វើ​ឡើង​នៅ​ក្នុង​ឱកាស​​ជំនួប​ជាមួយ​ប្រធាន​ថ្មី ​របស់​ធនាគារ​អភិវឌ្ឍន៍​អាស៊ី ​ប្រចាំ​ប្រទេស​កម្ពុជា​ គឺ​លោក Eric Sidgwick​ នៅ​ព្រឹក​ថ្ងៃ​ចន្ទ​ទី​២៨ ​មករា​នេះ។

យោង​តាម​ប្រសាសន៍​របស់​លោក ​កុយ គួង អ្នក​នាំ​ពាក្យ​ក្រសួង​ការ​បរទេស​កម្ពុជា នាយក​ធនាគារ​ ADB​ បាន​ប្រាប់​លោក​ឧប​នាយករដ្ឋមន្ត្រី​ថា បេសកកម្ម​របស់​លោក​មក​កម្ពុជា គឺ​ការ​ជួយ​កម្ពុជា​ក្នុង​ការងារ​កាត់​បន្ថយ​ភាព​ក្រីក្រ​នេះ​ហើយ ហើយ​ថា​លោក​នឹង​ពិនិត្យ​មើល​ផែនការ​ការងារ​របស់​កម្ពុជា​ដល់​ឆ្នាំ ​២០៣០​នោះ ដើម្បី​ដឹង​ថា តើ​ធនាគារ​អាច​ជួយ​កម្ពុជា​ក្នុង​វិស័យ​អ្វី​ខ្លះ។

អ្នក​នាំ​ពាក្យ​ក្រសួង​ការ​បរទេស​បាន​ប្រាប់​អោយ​ដឹង​ថា តាំង​ពី​ឆ្នាំ​១៩៩២​ រហូត​ដល់​ឆ្នាំ​២០១២​ ធនាគារ​អភិវឌ្ឍន៍​អាស៊ី ​បាន​ផ្តល់​ជំនួយ​ដល់​កម្ពុជា ​ក្នុង​ទឹក​ប្រាក់​សរុប​ជាង ​១៨០០លាន​ដុល្លារ ដែល​ក្នុង​នោះ​រួម​មាន ជាង​១៣០០​លាន​ដុល្លារ​គឺ​ជា​កំចី ជាង​៣០០លាន​ដុល្លារ​ជា​ជំនួយ​ឥត​សំណង និង​ជាង​១០០លាន​ដុល្លារ​ជា​ជំនួយ​បច្ចេកទេស។ លោកកុយ គួង​បន្ត​ទៀត​ថា សម្រាប់​​ឆ្នាំ​២០១៣​នេះ ជំនួយ​ពី​ធនាគារ​អភិវឌ្ឍន៍​អាស៊ី ADB រួម​មាន​ ១១​លាន​៧​សែន​ដុល្លារ ​ជា​ជំនួយ​ឥត​សំណង និង​២១៨​លាន​ដុល្លារ​ទៀត​ជា​កំចី។

ចំពោះ​លោក​ឧប​នាយករដ្ឋមន្ត្រី​ ហោ ណាំហុង បើ​តាម​ប្រសាសន៍​នាំ​ពាក្យ​របស់​លោក​កុយ គួង ធនាគារ​ADB គឺ​ជា​ដៃ​គូ​អភិវឌ្ឍន៍​យ៉ាង​សំខាន់​របស់​កម្ពុជា​ នៅ​ក្នុង​ក្របខណ្ឌ​នៃ​ការ​ត​ភ្ជាប់​ក្នុង​តំបន់​ទន្លេ​មេគង្គ​ផង និង​នៅ​ក្នុង​ក្របខណ្ឌ​អាស៊ាន​ផង៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ