កម្ពុជា

លោក ហោ ណាំហុង ចេញ​ទៅអាមេរិក​ល្ងាច​នេះ បន្ទាប់​ពី​ខក​ជើង​យន្តហោះ

លោក ហោ ណាំហុង រដ្ឋមន្ត្រី​ក្រសួង​ការបរទេស​កម្ពុជា
លោក ហោ ណាំហុង រដ្ឋមន្ត្រី​ក្រសួង​ការបរទេស​កម្ពុជា © AFP

លោក​ឧបនាយក​រដ្ឋមន្ត្រី ហោ ណាំហុង រដ្ឋមន្ត្រី​ការបរទេស​កម្ពុជា និង​គណៈប្រតិភូ បាន​ចាក​ចេញពី​ភ្នំពេញ​នៅ​ល្ងាច​ថ្ងៃអាទិត្យ​នេះ​ ដើម្បី​បំពេញ​ទស្សនកិច្ច​ផ្លូវការ​នៅ​សហរដ្ឋអាមេរិក​ នា​ថ្ងៃ​ទី​១២ ខែ​មិថុនា។ ប្រមុខ​ការទូត​កម្ពុជា​គ្រោង​ចេញ​ដំណើរ​កាលពី​ល្ងាច​ថ្ងៃ​សៅរ៍​ម្សិលមិញ​ ប៉ុន្តែ​បាន​ខក​ដំណើរ​ទៅវិញ​ ដោយសារតែ​ការពន្យារ​ពេល​នៃ​ជើងយន្តហោះ។ យ៉ាងណាក៏ដោយ​ការខកខាន​នេះ​មិន​បាន​ធ្វើ​ឲ្យ​ប៉ះពាល់​ដល់​ដំណើរ​ទស្សនកិច្ច​ដែល​បានគ្រោង​ទុក​នោះទេ។

ផ្សាយពាណិជ្ជកម្ម

 

ប្រតិភូ​កម្ពុជា​ដឹកនាំ​ដោយ​លោក ហោ ណាំហុង រដ្ឋមន្ត្រី​ការបរទេស​បាន​ចាក​ចេញពី​ភ្នំពេញ នៅ​ល្ងាច​ថ្ងៃ​អាទិត្យ​នេះ​ ដើម្បី​បំពេញ​ទស្សនកិច្ច​នៅ​សហរដ្ឋ​អាមេរិក​ស្រប​តាម​ការអញ្ជើញ របស់លោកស្រី ហ៊ីលឡារី គ្លីនតុន រដ្ឋមន្ត្រី​ការបរទេស​សហរដ្ឋ​អាមេរិក។ តាម​ការគ្រោងទុក ប្រមុខ​ការទូត​កម្ពុជា​គ្រោង​ចេញដំណើរ​កាលពី​ល្ងាច​ថ្ងៃ​សៅរ៍​ម្សិលមិញ ប៉ុន្តែ ការពន្យារ​ពេល​ជាបន្តបន្ទាប់​នៃ​ជើង​យន្តហោះ​ក្រុមហ៊ុន Silk Air របស់​សាំងហ្គាពួរ​បានធ្វើ​ឲ្យ​ប្រតិភូ​កម្ពុជា​ខក​ដំណើរ​ទៅវិញ។
 

យ៉ាងណាក៏ដោយ ការខកខាន​នេះ​មិន​បាន​ធ្វើ​ឲ្យ​ប៉ះពាល់​ដល់​ដំណើរ​ទស្សនកិច្ច​ដែល​បាន​គ្រោង​ទុក​នេះ​ទេ។ លោក កុយ គួង អ្នក​នាំពាក្យ​ក្រសួង​ការបរទេស​កម្ពុជា​បាន​ប្រាប់​ឲ្យ​ដឹង​ថា គម្រោង​នៃ​កិច្ចពិភាក្សា និង​របៀបវារៈ​ដែល​បាន​គ្រោងទុក​គ្មាន​អ្វី​ប្រែប្រួល​ទេ។ តាម​គម្រោង លោក​ហោ ណាំហុង នឹង​ជួបពិភាក្សា​ការងារ​ជាមួយ​លោកស្រី ហ៊ីលឡារី គ្លីនតុន ស្តីពី​ការពង្រឹង​ចំណង​ទាក់ទង​រវាង​រដ្ឋាភិបាល​ក្រុង​ភ្នំពេញ និង​ក្រុង​វ៉ាស៊ីនតោន ក៏ដូចជា​បញ្ហា​ក្នុង​តំបន់ និង​ទំនាក់ទំនង​រវាង​អាមេរិក​និង​អាស៊ាន​ផង​ដែរ។

ក្រៅពីនោះ លោក ហោ ណាំហុង ក៏​នឹង​ជួបពិភាក្សា​ការងារ​ដាច់​ដោយ​ឡែក​ជាមួយ​លោក ជីម វេប (Jim Webb) សមាជិក​ព្រឹទ្ធសភា និង​ជា​ប្រធាន​អនុគណៈកម្មការ​កិច្ចការ​អាស៊ី​ប៉ាស៊ីហ្វិក និង​អាស៊ី​បូព៌ា និង​លោក ដានីញែល រូស្ស៊ែល (Daniel Russel) ជំនួយការ​ពិសេស​របស់​លោក​ប្រធានាធិបតី បារ៉ាក់ អូបាម៉ា ទទួល​បន្ទុក​កិច្ចការ​អាស៊ី​បូព៌ា។ ប្រមុខ​ការទូត​កម្ពុជា​ក៏​គ្រោង​នឹង​ថ្លែង​សុន្ទរកថា​ស្តីពី “ការអភិវឌ្ឍន៍​នៅ​កម្ពុជា និង​ទំនាក់ទំនង​កម្ពុជា- អាមេរិក”​នៅ​ឯ​មជ្ឈមណ្ឌល​ស្រាវជ្រាវ​យុទ្ធសាស្ត្រ​អន្តរជាតិ​ផង​ដែរ។

ដំណើរ​ទស្សនកិច្ច​របស់​លោក ហោ ណាំហុង ទៅកាន់​សហរដ្ឋ​អាមេរិក​នៅ​ពេលនេះ​បាន​ធ្វើ​ឡើង​តាម​ការអញ្ជើញ​របស់​លោក​ស្រី ហ៊ីលឡារី គ្លីនតុន រដ្ឋមន្ត្រី​ការបរទេស​អាមេរិក។ ក្នុង​លិខិត​ចុះ​ថ្ងៃ​ទី​១៧ ខែ​ឧសភា ឆ្នាំ​២០១២ លោកស្រី​ប្រមុខ​ការទូត​អាមេរិក​បាន​អញ្ជើញ​លោក​ហោ ណាំហុង ទៅ​បំពេញ​ទស្សនកិច្ច នៅ​ទីក្រុង​វ៉ាស៊ីនតោន នៅ​ថ្ងៃទី១២ ខែ​មិថុនា។ លោកស្រី គ្លីនតុន បាន​បញ្ជាក់​ក្នុង​លិខិត​ថា ទស្សនកិច្ច​នេះ​គឺជា​ឱកាស​ដ៏​សំខាន់​មួយ​ ដើម្បី​រិះរក​ផ្លូវ​សម្រាប់​ឲ្យ​អាមេរិក និង​កម្ពុជា​ធ្វើការ​រួមគ្នា សំដៅ​ពង្រីក​ទំនាក់ទំនង​ទ្វេ​ភាគី និង​ជំរុញ​គោលដៅ​រួម​ក្នុង​តំបន់​ក្នុង​អំឡុង​ពេល​ដែល​កម្ពុជា​កំពុង​ធ្វើ​ប្រធាន​អាស៊ាន៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI