កម្ពុជា​

សហភាព​អឺរ៉ុប​ប្រកាស​ការពារ​អ្នក​កាសែត​ដែល​រាយ​ការណ៍​ព័ត៌មាន​ស្តី​ពី​សិទ្ធិមនុស្ស

កិច្ចពិភាក្សាតុមូលអំពីប្រព័ន្ធផ្សព្វផ្សាយព័ត៌មាន និងតួនាទី​នៅក្នុង​ការលើក​កម្ពស់សិទ្ធិមនុស្ស
កិច្ចពិភាក្សាតុមូលអំពីប្រព័ន្ធផ្សព្វផ្សាយព័ត៌មាន និងតួនាទី​នៅក្នុង​ការលើក​កម្ពស់សិទ្ធិមនុស្ស © ដឺលុច

តំណាង​សហភាព​អឺរ៉ុប​ប្រចាំ​កម្ពុជា​បាន​ប្រកាស​ថា សហភាព​អឺរ៉ុប​នឹង​ការពារ​អ្នកកាសែត ក្នុង​ករណី​ដែល​អ្នកកាសែត​រូប​ណា​ត្រូវ​បាន​ឃាត់ខ្លួន ដោយ​ទាក់ទង​នឹង​សេចក្តីរាយការណ៍​របស់​ពួកគេ​ក្នុង​ប្រធានបទ​សិទ្ធិមនុស្ស។ សេចក្តី​ប្រកាស​នេះ​ត្រូវ​បាន​ធ្វើឡើង​នៅក្នុង​កិច្ចពិភាក្សា​តុមូល​មួយ​ដែល ​និយាយ​អំពី​ប្រព័ន្ធ​ផ្សព្វផ្សាយ​ព័ត៌មាន និង​តួនាទី​នៅក្នុង​ការ​លើក​កម្ពស់​សិទ្ធិមនុស្ស កាល​ពី​ព្រឹក​ថ្ងៃ​ទី១០​មីនា​នេះ។

ផ្សាយពាណិជ្ជកម្ម

សេចក្តី​រាយការណ៍​របស់ លាង ដឺលុច ពីទីក្រុង​ភ្នំពេញ

ក្នុង​ករណី​ដែល​អ្នកកាសែត​ណាម្នាក់​ត្រូវ​បាន​អាជ្ញាធរ​ចាប់​ឃាត់​ខ្លួន​ ព្រោះ​តែ​សេចក្តី​រាយការណ៍​របស់​ខ្លួន ក្នុង​គោលដៅ​ការពារ​វិស័យ​សិទ្ធិមនុស្ស​ សហភាព​អឺរ៉ុប​នឹង​ចេញ​មុខ​ជួយ​ការពារ​អ្នកកាសែត​រូប​នោះ។ នេះ​ជា​ជំហរ​របស់​សហភាព​អឺរ៉ុប​ដែល​ត្រូវ​បាន​ប្រកាស​ដោយ​ភារៈធារី​នៃ​ប្រតិភូ​សហភាព​អឺរ៉ុប​ប្រចាំ​កម្ពុជា លោក ​រ៉ាហ្វាអែល ដូចោ ម៉ូរ៉េណូ។ ភារៈធារី​សហភាព​អឺរ៉ុប​បាន​ថ្លែង​ផ្តល់​ការ​ធានា​យ៉ាង​នេះ នៅ​ពី​មុខ​អ្នក​សារព័ត៌មាន​ប្រមាណ​៥០​រូប ដែល​ត្រៀម​ចូលរួម​ក្នុង​វគ្គ​បណ្តុះបណ្តាល​មួយ​ ស្តី​ពី​តួនាទី​អ្នក​សារព័ត៌មាន​ក្នុង​ការ​លើក​កម្ពស់​ការ​គោរព​សិទ្ធិ​មនុស្ស។

            សំរាប់​តំណាង​សហភាព​អឺរ៉ុប អ្នក​កាសែត​ គឺ​ជា​ក្រុម​អ្នក​ការពារ​សិទ្ធិមនុស្ស​ដែល​សហភាព​អឺរ៉ុប​ត្រូវ​យក​ចិត្ត​ទុកដាក់ និង​បាន​កំណត់​គោលដៅ​ដែល​សហភាព​អឺរ៉ុប​ត្រូវ​ការពារ។ ​ហេតុដូច្នេះ​ហើយ​បាន​ជា​សហភាព​អឺរ៉ុប​ផ្តល់​ការ​គាំទ្រ​ផ្នែក​ហិរញ្ញវត្ថុ ដល់​វគ្គ​បណ្តុះបណ្តាល​អ្នក​កាសែត​ក្នុង​វិស័យ​សិទ្ធិមនុស្ស​នេះ។

            អ្នក​កាសែត​ចំនួន​៥០​នាក់​ត្រូវ​បាន​ជ្រើសរើស​អោយ​ចូលរួម​ក្នុង​វគ្គ​បណ្តុះបណ្តាល​មួយ​ស្តីពី​តួនាទី​អ្នក​សារព័ត៌មាន​ក្នុង​ការ​លើក​កម្ពស់​សិទ្ធិមនុស្ស​នៅ​កម្ពុជា។ វគ្គ​បណ្តុះបណ្តាល​ត្រូវ​បាន​រៀបចំ​ដោយ​ក្លឹប​អ្នក​កាសែត​កម្ពុជា ក្រោម​ការ​ឧបត្ថម្ភ​របស់​សហភាព​អឺរ៉ុប។ វគ្គ​បណ្តុះបណ្តាល​នេះ​មាន​ចំនួន​២​វគ្គ ដែល​ក្នុង​មួយ​វគ្គ​សិក្សា​មាន​រយៈពេល​៥​ថ្ងៃ។ អ្នក​កាសែត​មាន​បទពិសោធន៍ អ្នក​ជំនាញ​សិទ្ធិមនុស្ស និង​អ្នកច្បាប់​ត្រូវ​បាន​អញ្ជើញ​អោយ​ធ្វើ​បទអន្តរាគមន៍​នៅក្នុង​វគ្គ​បណ្តុះបណ្តាល​ដ៏​កម្រ​នេះ។

            ការលើក​កម្ពស់​សិទ្ធិមនុស្ស គឺ​ជា​តួនាទី​របស់​អ្នកកាសែត​នៅក្នុង​សង្គម​ប្រជាធិបតេយ្យ នេះគឺ​ជាការ​លើក​ឡើង​របស់​លោក​ប៉ែន សមិទ្ធិ ប្រធាន​ក្លឹប​អ្នកកាសែត​កម្ពុជា។ លោក​ ប៉ែន សមិទ្ធិ​បាន​លើក​ទឹកចិត្ត​អោយ​អ្នកកាសែត បង្កើន​ភាពក្លាហាន​នៅក្នុង​ការ​ធ្វើ​សេចក្តី​រាយការណ៍​របស់​ខ្លួន​អំពី​បញ្ហា​នានា​ដែល​មាន​ឥទ្ធិពល​ជា​វិជ្ជមាន និង​អវិជ្ជមាន​មក​លើ​ជីវភាព​ប្រចាំ​ថ្ងៃ​របស់​ប្រជាជន។

            ប្រធាន​សមាគម​ការពារ​សិទ្ធិមនុស្ស​អាដហុក លោក​ ធន សារាយ នៅក្នុង​កិច្ចពិភាក្សា​ជាមួយ​អ្នកកាសែត​បាន​អំពាវនាវ​អោយ​អ្នក​កាសែត​ចាប់​អារម្មណ៍​ផ្តល់​ព័ត៌មាន​អំពី​ករណី​ខ្វះខាត​ស្បៀង ការ​បោះបង់​ចោល​ការ​សិក្សា ដែល​ទាំង​នេះ​គឺ​ជា​សិទ្ធិ​មូលដ្ឋាន​របស់​មនុស្ស។ លោក ធន សារាយ​ ក៏​បាន​ស្នើ​អោយ​សារព័ត៌មាន​គោរព​អត្តសញ្ញាណ​ជន​រងគ្រោះ​នៅក្នុង​បទល្មើស​អ្វី​មួយ ដោយ​មិនត្រូវ​បញ្ចេញ​អត្តសញ្ញាណ​នោះ​ជា​សាធារណៈ ក្នុង​ករណី​ដែល​អត្តសញ្ញាណ​នោះ​បង្ក​ការ​ប៉ះពាល់​ដល់​កិត្តិយស​របស់​ជន​រងគ្រោះ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI