អានតួអត្ថបទ
កម្ពុជា​

នាយករដ្ឋមន្ត្រី ហ៊ុន សែន បើក​ដៃ​ឲ្យ​សមត្ថកិច្ច​បង្ក្រាប​រាល់​បទ​ល្មើស ដែល​ពាក់ព័ន្ធ​នឹង​សាច់​ញាតិ

លោក ហ៊ុន សែន នាយក​រដ្ឋមន្ត្រី​ខ្មែរ
លោក ហ៊ុន សែន នាយក​រដ្ឋមន្ត្រី​ខ្មែរ ®​សុវណ្ណារ៉ា
ដោយ៖ លី ម៉េងហួរ
១៨ នាទី

នៅ​ថ្ងៃ​ពុធ​នេះ លោក​នាយក​រដ្ឋមន្ត្រី ហ៊ុន សែន បាន​ប្រកាស​បើក​ដៃ​ឲ្យ​សមត្ថកិច្ច​ប៉ូលីស បង្ក្រាប​រាល់​បទ​ល្មើស​ទាំងឡាយ ដែល​ជាប់​ពាក់ព័ន្ធ​នឹង​សាច់​ញាតិ​របស់​លោក។ ជា​សេចក្តី​ប្រកាស​ស្រប​ពេល​ដែល​ក្មួយ​ប្រុស​របស់​លោក​ម្នាក់ បាន​ដើរ​ចោល​ផ្ទះ ហើយ​អាច​នឹង​ពាក់ព័ន្ធ​នឹង​បទ​ល្មើស​គ្រឿង​ញៀន។

ផ្សាយពាណិជ្ជកម្ម

 

សេចក្តី​រាយការណ៍​របស់ លី ម៉េងហួរ ពីទីក្រុង​ភ្នំពេញ

ជា​សេចក្តី​ប្រកាស​ដោយ​ផ្ទាល់មាត់ ដែល​លោក​នាយក​រដ្ឋមន្ត្រី ហ៊ុន សែន បាន​ថ្លែង​ជា​សាធារណៈ នៅ​ព្រឹក​ថ្ងៃ​ពុធ​នេះ ដើម្បី​ឲ្យ​សមត្ថកិច្ច​ប៉ូលីស បង្ក្រាប​រាល់​បទល្មើស​ទាំង​ឡាយ​ណា ដែល​ជាប់​ពាក់ព័ន្ធ​ជាមួយ​សាច់​ញាតិ​របស់​លោក។ ជា​សេចក្តី​អំពាវនាវ ដែល​សំដៅ​លើ​កូន​​ក្មួយ​របស់​លោក ឈ្មោះ ហ៊ុន ជា។ ហ៊ុន ជា ជា​កូន​ប្រុស​របស់​លោក ហ៊ុន សាន បង​ប្រុស​របស់​លោក​នាយក​រដ្ឋមន្ត្រី ហ៊ុន សែន។

តាម​លោក​នាយក​រដ្ឋមន្ត្រី ក្មួយ​ប្រុស​ជើង​ល្អ​របស់​លោក អាច​ជា​មុខ​សញ្ញា ក្រុម​បក្ស​ពួក​អ្វី​មួយ ហើយ​បើ​មិន​បំបែក​សំបុក​បក្ស​ពួក​នោះ​ទេ អាច​មាន​ការ​ពាក់ព័ន្ធ​នឹង​បទ​ល្មើស​ធ្ងន់​ធ្ងរ​អ្វី​មួយ។ នោះ​គឺ​បទ​ល្មើស​គ្រឿង​ញៀន។ សំណុំ​រឿង​គ្រឿង​ញៀន ដែល​លោក​នាយក​រដ្ឋមន្ត្រី បាន​បញ្ជា​ដោយ​ផ្ទាល់​មាត់​ទៅ​កាន់​អគ្គស្នងការ​នគរបាល​ជាតិ លោក នេត សាវឿន និង​ត្រូវ​ជា​បង​ជីដូន​មួយ​របស់​ក្មួយ​ប្រុស​លោក​នាយក​រដ្ឋមន្ត្រី ឲ្យ​ជីក​ពី​ឫស​គល់ ហើយ​វ៉ៃ​ឲ្យ​ខ្លាំង បើ​មាន​នៅ​ក្នុង​កម្លាំង​ប៉ូលីស។

លោក​នាយក​រដ្ឋមន្ត្រី ហ៊ុន សែន បាន​បញ្ជាក់​ថា បើ​មាន​ការ​ទាក់ទង​នឹង​បទល្មើស គឺ​អត់​មាន​ការ​លើកលែង​ណា​មួយ គឺ​ត្រូវ​អនុវត្ត​ច្បាប់ ដោយ​គ្មាន​រឿង​ក្មួយ​នាយក​រដ្ឋមន្ត្រី​ឡើយ។

ជាមួយ​នឹង​ការ​លើក​ឡើង​ដូច្នេះ លោក​នាយក​រដ្ឋមន្ត្រី ហ៊ុន សែន ក៏​បាន​ប្រកាស​ឲ្យ​តុលាការ​កាត់ទោស​បង​ប្អូន​ជីដូន​មួយ​របស់​លោក​ម្នាក់ ឈ្មោះ ឌី ព្រិម ដែល​ពាក់ព័ន្ធ​ក្នុង​កញ្ចប់​សំណុំ​រឿង​ល្មើស​​ព្រហ្មទណ្ឌ។

លោក​នាយក​រដ្ឋមន្ត្រី ហ៊ុន សែន ​ក៏​បាន​ប្រកាស​ប្រជុំ​ត្រកូល ហ៊ុន របស់​លោក​ឡើង​វិញ។ ជា​ការ​ប្រជុំ​ដែល​លោក​នាយក​រដ្ឋមន្ត្រី អប់រំ​កូន​ក្មួយ និង​ក្រុម​គ្រួសារ​របស់​លោក កុំ​ឲ្យ​ប្រព្រឹត្ត​អំពើ​អាក្រក់ និង​បទល្មើស ដោយ​យក​ឈ្មោះ និង​អំណាច​ជា​នាយក​រដ្ឋមន្ត្រី​របស់​លោក​ទៅ​ប្រើ។

ការ​ប្រជុំ​ត្រកូល ហ៊ុន របស់​លោក​នាយក​រដ្ឋមន្ត្រី ហ៊ុន សែន បាន​ធ្វើ​ឡើង​ម្តង​រួច​មក​ហើយ កាល​ពី​ប៉ុន្មាន​ខែ​មុន។

ក្នុង​ជម្លោះ​គ្រោះថ្នាក់​ចរាចរណ៍ កាលពី​ប៉ុន្មាន​ឆ្នាំ​មុន ក្មួយប្រុស​ម្នាក់​ទៀត​របស់​លោក​នាយក​រដ្ឋ​មន្ត្រី ហ៊ុន សែន រួម​ទាំង​បក្ស​ពួក បាន​បាញ់​កាំភ្លើង សម្លាប់​មនុស្ស នៅ​ជិត​ស្តាត​អូឡាំពិក។ ប៉ុន្តែ​ក្មួយ​ប្រុស​របស់​លោក​នាយក​រដ្ឋមន្ត្រី មិន​ត្រូវ​បាន​កាត់ទោស​ឡើយ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ