អានតួអត្ថបទ
កម្ពុជា

នឹង​មាន​រូប​សំណាក​របស់​សម្តេចឪ​នៅ​ខាង​កើត​វិមាន​ឯករាជ្យ​

រូប​សំណាក​របស់​សម្តេច​ឪ​នឹង​ត្រូវ​ដាក់​នៅ​ខាង​កើត​វិមាន​ឯករាជ្យ​
រូប​សំណាក​របស់​សម្តេច​ឪ​នឹង​ត្រូវ​ដាក់​នៅ​ខាង​កើត​វិមាន​ឯករាជ្យ​ RFI / Anne-Laure Porée
ដោយ៖ លាង ដឺលុច
១៨ នាទី

ក្រោយ​ពី​ព្រះ​រាជពិធី​បុណ្យ​ព្រះ​បរមសព​ព្រះបរម​រតនកោដ្ឋ​បញ្ចប់​ទៅ រាជ​រដ្ឋាភិបាល​នឹង​គិតគូរ​ អំពី​ការ​សាងសង់​រូប​សំណាក​របស់​សម្តេច​ឪ ​នរោត្តម សីហនុ​ ហើយ​ដាក់​តាំង​នៅ​​សួន​ឧទ្យាន​ខាង​កើត​វិមាន​ឯករាជ្យ។ នេះ​បើ​តាម​ការ​អះអាង​របស់​អ្នក​នាំ​ពាក្យ​រាជ​រដ្ឋាភិបាល​លោក ​ខៀវ កាញារីទ្ធ។ ព្រះអង្គម្ចាស់​ស៊ីសុវត្ថិ ធម្មិកោ ​ដែល​ជា​អតីត​ព្រះរាជលេខា​ផ្ទាល់​របស់​សម្តេច​តា​ មាន​បន្ទូល​ថា រូប​សំណាក​អតីត​ព្រះករុណា​សម្តេច​ឪ ​នឹង​ធ្វើ​អោយ​ប្រជារាស្ត្រ​ នៅ​តែ​ចងចាំ​អំពី​ព្រះអង្គ​ជា​រៀង​រហូត។

ផ្សាយពាណិជ្ជកម្ម

ព្រះ​នាម​របស់​សម្តេច​ឪ ​នរោត្តម សីហនុ ​នឹង​នៅ​ក្នុង​ការ​ចងចាំ​របស់​ប្រជារាស្ត្រ​ខ្មែរ​ជា​រៀង​រហូត តាម​រយៈ​ការ​ឧទ្ទិស​ផ្សេងៗ។ លោក​នាយក​រដ្ឋមន្ត្រី​ ហ៊ុន សែន ​បាន​ប្រកាស​សម្រេច​ដាក់​ថ្ងៃ​ទី​១៥ ​តុលា ​ជា​ថ្ងៃ​បុណ្យ​ជាតិ រម្លឹក​ថ្ងៃ​សោយ​ទិវង្គត​ របស់​ព្រះ​មហាវីរក្សត្រ​នរោត្តម សីហនុ។

លើស​ពី​នេះ បើ​តាម​ការ​អះអាង​របស់​លោក ​ខៀវ កាញារីទ្ធ ដែល​ជា​អ្នក​នាំ​ពាក្យ​រាជ​រដ្ឋាភិបាល រាជរដ្ឋាភិបាល​នឹង​កសាង​រូប​សំណាក​របស់​សម្តេចឪ នរោត្តម សីហនុ​ ហើយ​ដាក់​តាំង​រូប​សំណាក​របស់​ព្រះអង្គ​នៅ​ខាង​កើត​វិមាន​ឯករាជ្យ។

បញ្ជាក់​ប្រាប់​វិទ្យុ​បារាំង​អន្តរជាតិ​តាម​រយៈ​សារអេឡិចត្រូនិក​នៅ​ថ្ងៃ​ពុធ​នេះ​ លោក​រដ្ឋមន្ត្រី​ក្រសួង​ព័ត៌មាន ​បាន​សរសេរ​ថា រូប​សំណាក​របស់​សម្តេច​ឪ​នឹង​ត្រូវ​ដាក់​នៅ​ខាង​កើត​វិមាន​ឯករាជ្យ​នេះ ​ដើម្បី​ងាយ​ស្រួល​​សម្រាប់​ប្រតិភូ ដែល​ត្រូវដាក់​កម្រង​ផ្កា​នៅ​វិមាន​ឯករាជ្យ​ហើយ ​អាច​ដើរ​មក​គោរព​រូបសំណាក​ព្រះអង្គ​បាន​ដោយ​ស្រួល។

នៅ​សល់​តែ​រូបរាង​នៃ​រូប​សំណាក​នេះ​ប៉ុណ្ណោះ ​ដែល​សាធារណៈជន​ចង់​ដឹង។ បើ​យោង​តាម​លោក​រដ្ឋមន្ត្រី​ ខៀវ កាញារីទ្ធ គំនូរ​ព្រាង​ជា​ច្រើន​​នៃ​រូប​សំណាក​សម្តេច​ឪ​ នរោត្តម សីហនុ ​គួរ​តែ​ត្រូវ​បាន​គូរ​រួច​ហើយ។ ប៉ុន្តែ​ថា​នៅ​ពេល​នេះ បើ​តាម​ការ​បញ្ជាក់​របស់​លោក ​ខៀវ កាញារីទ្ធ គេ​នៅ​រង់​ចាំ​ការ​សម្រេច​ព្រះ​ទ័យ​របស់​ព្រះមហាក្សត្រ និង​របស់​សម្តេច​ម៉ែ​ថា តើ​ព្រះអង្គ​រើស​យក​ទម្រង់​រូប​សំណាក​មួយ​ណា។

ព្រះអង្គម្ចាស់ ​ស៊ីសុវត្ថិ ធម្មិកោ ​អតីត​ព្រះរាជលេខា​ផ្ទាល់​របស់​សម្តេច​ឪ​ បាន​មាន​បន្ទូល​ប្រាប់​វិទ្យុ​បារាំង​អន្តរជាតិ​ នៅ​ថ្ងៃ​នេះ ថ្លែង​អរគុណ​រដ្ឋាភិបាល​ដែល​បាន​គិតគូរ ​អំពី​ការ​កសាង​រូប​សំណាក​ព្រះមហាវីរក្សត្រ ​​ទុក​ជា​ការ​រម្លឹក​ដល់​ស្នា​ព្រះហស្ត និង​វីរភាព​​របស់​ព្រះអង្គ​ក្នុង​ការ​បម្រើ​ជាតិ​នោះ។ ព្រះអង្គម្ចាស់ ​ធម្មិកោ ​ក៏​មាន​បន្ទូល​អោយ​ដឹង​ផង​ដែរ​ថា តាម​ប្រពៃណី​នៅ​ក្នុង​ព្រះបរម​រាជវាំង ព្រះបរមរាជវាំង​ក៏​ត្រូវ​សាងសង់​រូប​សំណាក​ព្រះ​មហាវីរក្សត្រ​សម្តេច​ឪ ​នរោត្តម សីហនុ​ ទុក​រក្សា​នៅ​ក្នុង​ព្រះ​ទីនាំង​ទេវា​វិនិច្ឆ័យ ​ជាមួយ​រូប​សំណាក​អង្គ​ក្សត្រ​មុនៗ​ដែរ។

នៅ​ថ្ងៃ​នេះ​ដែល​ជា​ថ្ងៃ​ទី​៦​នៃ​ព្រះ​រាជពិធី​ដង្ហែរ និង​ថ្វាយ​ព្រះ​ភ្លើង ថ្វាយ​ព្រះ​បរមសព​រតនកោដ្ឋ​នោះ ​មាន​តែ​ព្រះ​រាជពិធី​សូត្រ​មន្ត​តែ​ប៉ុណ្ណោះ។ នៅ​ថ្ងៃ​ស្អែក ព្រះ​អដ្ឋិធាតុ​របស់​សម្តេច​ឪ​ នឹង​ត្រូវ​ដង្ហែរ​ចូល​ក្នុង​ព្រះបរម​រាជវាំង។ ព្រះអង្គ​ម្ចាស់ ​ធម្មិកោ​ បាន​មាន​បន្ទូល​ប្រាប់​វិទ្យុ​បារាំង ​កាល​ពី​ថ្ងៃ​អង្គារ ​ម្សិលមិញ ​ថា ព្រះអដ្ឋិធាតុ​របស់​សម្តេច​ឪ​ នឹង​ត្រូវ​រក្សា​នៅ​ក្នុង​ព្រះទីនាំង​ទេវា​វិនិច្ឆ័យ។ សម្តេច​ឪ កាល​ពី​ពេល​ដែល​ព្រះអង្គ​នៅ​មាន​ព្រះជន្ម ព្រះអង្គ​ធ្លាប់​ធ្វើ​ព្រះរាជ​សំណេរ ​ផ្តាំ​អោយ​គេ​រក្សា​ព្រះអដ្ឋិធាតុ​របស់​ព្រះអង្គ ​នៅ​ក្នុង​ចេតិយ​គន្ធបុប្ជា​របស់​បុត្រី​ព្រះអង្គ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ