អានតួអត្ថបទ
កម្ពុជា

សង្គម​ស៊ីវិល​និង​រដ្ឋាភិបាល​ពិភាក្សា​ពី​សមាហរណកម្ម​អាស៊ាន​ឆ្នាំ​ ២០១៥

ស្លាក​សញ្ញា​អាស៊ាន
ស្លាក​សញ្ញា​អាស៊ាន © Reuters
១៥ នាទី

ក្រុម​សង្គម​ស៊ីវិលជាតិ​​ អន្តរជាតិ និង​រដ្ឋាភិ​បាល​នៅ​​ព្រឹក​​ថ្ងៃ​​អង្គារ​​នេះ បាន​​ជួប​​ជុំ​​គ្នា នៅ​សណ្ឋាគារ​ឡឺរូយ៉ាល់ ក្នុង​​សិក្ខាសាលា​មួយ ស្តីពី​ធុរកិច្ច​ និង​នីតិរដ្ឋ ក្នុង​ការ​ធ្វើ​សមាហរណកម្ម​សេដ្ឋកិច្ច​អាស៊ាន ឆ្នាំ​២០១៥។ នៅ​ក្នុង​សិក្ខាសាលានោះ គេពិភាក្សា ដោយ​​ផ្តោត​សំខាន់ លើកំណែទម្រង់​ជារួម លើ​បញ្ហាមួយ​ចំនួន ដែល​ធ្វើ​ឲ្យ​រាំងស្ទះ ដល់​ការ​អភិវឌ្ឍន៍​សេដ្ឋកិច្ច​នៅកម្ពុជា។

ផ្សាយពាណិជ្ជកម្ម

អង្គការក្រៅរដ្ឋាភិបាលជាតិ និងអន្តរជាតិ រួមទាំង​​រដ្ឋា​ភិបាល​ផង នៅព្រឹក​​ថ្ងៃ​អង្គារនេះ បាន​ពិភាក្សាគ្នានៅក្នុងសិក្ខាសាលា​មួយ ស្តីពីនីតិ​រដ្ឋ ក្នុង​អាស៊ាន ដែល​ផ្តោតសំខាន់​លើ​លទ្ធភាព​ និង​បញ្ហាប្រឈម ក្នុង​ការធ្វើ​សមាហរណកម្មសេដ្ឋកិច្ច​អាស៊ានឆ្នាំ ២០១៥ ។

​សិក្ខាសាលា​នេះរៀបចំដោយ​អង្គការ​ USAID និងមជ្ឃមណ្ឌល​ធនធាន​សិទ្ធ​មនុស្ស​ Human Right Resource Center ។  តំណាង​ក្រុម​សង្គម​ស៊ីវិល និង​តំណាង​គណបក្ស​នយោបាយ និងមន្ត្រីរដ្ឋាភិបាលមួយចំនួន ក៏មានវត្តមាននៅទីនោះដែរ។

នៅ​ក្នុង​វីដេអូរយៈពេល ៣០នាទី​ ដែល​គេ​បាន​ចាក់បញ្ចាំង​ក្នុង​សិក្ខាសាលានោះ លោក ផៃ ស៊ីផាន អ្នក​នាំពាក្យ​រាជរដ្ឋាភិបាល បាន​និយាយ​ថា រដ្ឋាភិបាល​​កំពុង​តែ​គិតគូរ​ពី​គ្រប់​​វិស័យ​ ដើម្បី​ញុំាងឲ្យ​​វិនិយោគិន ចូល​មក​វិនិយោគ​ក្នុង​ប្រទេសកម្ពុជា​កាន់តែច្រើន។ លោក​ ផៃ ស៊ីផាន បន្ថែម​ថា​ ការ​ពង្រឹង​ច្បាប់​ប្រឆាំងអំពើ​ពុករលួយ តុលាការ​យុត្តិធម៌ គឺជា​បញ្ហា​ចម្បង​ សម្រាប់​ពង្រឹង​សេដ្ឋកិច្ច​កម្ពុជា​។

ចំនែក​លោក សុន ឆ័យ តំណាង​រាស្ត្រ​គណបក្សស​ង្គ្រោះជាតិ ដែល​មាន​វត្ត​មាន​នៅ​សិក្ខាសាលានោះ បាន​និយាយ​ថា កន្លង​មករដ្ឋាភិបាល​ហាក់​ដូចជា​យល់​ច្រឡំថា ឲ្យ​តែធ្វើ​សមាហរណកម្ម​​ឲ្យ​លឿន គឺ​កម្ពុជា​នឹង​មាន​ទីផ្សារ​លក់​ផលិតផល ដល់​ប្រជាជន​ចំនួន ៦០០លាននាក់​ក្នុងអាស៊ាន ប៉ុន្តែ​ បើ​កម្ពុជាគ្មាន​ទំនិញ​ទៅលក់​គ្រប់​គ្រាន់ នោះ​ការនាំ​ចូល​ពីបរទេស​នឹង​ធ្វើ​ឲ្យ​ជញ្ជីង​ពាណិជ្ជកម្ម​នៅ​ក្នុង​ប្រទេស ប្រឈម​មុខ​នឹង​បញ្ហាធ្ងន់ធ្ងន់។

លោក សុន ឆ័យ បន្តថា ដើម្បី​ពង្រឹង​ច្បាប់​នៅ​កម្ពុជាឲ្យ​កាន់តែ​រឹង​មាំ រដ្ឋាភិបាល​គួរ​តែ​ឆាប់ដោះស្រាយ​បញ្ហានយោបាយ​បច្ចុប្បន្ន​ ដើម្បីមាន​លទ្ធភាព​រៀបចំស្ថាប័នជាតិ រួម​មាន​ស្ថាប័ន​តុលាការឯករាជ្យ​ និង​យន្ត​ការ​ក្នុង​ការគ្រប់​គ្រង​ប្រទេស ដើម្បី​ឲ្យ​វិនិយោគិន​មិន​ខ្លាចរអារ នឹង​ចូលមក​វិនិយោគនៅ​កម្ពុជា។​

​លោក Param Cumaraswamy អ្នក​តស៊ូមតិ និង​ជា​អតីត​អ្នក​រាយការណ៏ពិសេស ស្តីពី​ឯករាជភាព​របស់​ចៅក្រម និង​មេធាវី បាន​និយាយ​ថា អាស៊ាន គឺ​ជា​តំបន់​មួយ​ដែល​មាន​ផល​ទុន ក្នុង​ស្រុកសរុប GDP ២៣០០ ពាន់លានដុល្លារ​ និង​មាន​ប្រជាជន​ច្រើនជាង ៦០០​លាន​នាក់។​ ហើយ​អាស៊ាន ក៏​នឹង​ក្លាយ​ជា​មហាអំណាច​សេដ្ឋកិច្ចចទី៣ ក្នុង​ទ្វីបអាស៊ី បន្ទាប់ពីចិន និង​ឥណ្ឌា។ ​ការ​ព្យាករណ៍ផ្នែក​ហិរញ្ញវត្ថុ បច្ចុប្បន្ន បាន​ចាត់​ទុក​ថា កំណើន​ផល​ទុន​ក្នុង​ស្រុកសរុប​រហូតដល់​ ១ពាន់ពាន់លានដុល្លារ​ មុនឆ្នាំ ២០៣០៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ