កម្ពុជា

តុលាការ​​ឡាអេ​នឹង​បើក​សវនាការ​លើ​បណ្តឹង​របស់​កម្ពុជា​ប្រឆាំង​វត្តមាន​ទ័ព​ថៃ

តុលាការ​យុត្តិធម៌​អន្តរជាតិ​ទីក្រុង​ឡាអេ
តុលាការ​យុត្តិធម៌​អន្តរជាតិ​ទីក្រុង​ឡាអេ ©

តុលាការ​យុត្តិធម៌​អន្តរជាតិ​ក្រុងឡាអេ​នឹង​បើក​សវនាការ​លើ​បណ្តឹង​របស់​ កម្ពុជា​ដែល​ទាមទារ​អោយ​មាន​វិធានការ​ជា​បន្ទាន់​លើ​ការ​ថែរក្សា​ប្រាសាទ​ ព្រះវិហារ ដែល​សវនាការ​នេះត្រូវ​បាន​កំណត់​ធ្វើ​នៅ​ថ្ងៃ​ទី​៣០ និង​៣១​ខែ​ឧសភា​ខាងមុខនេះ។ កម្ពុជា​ស្វាគម​​ចំណាត់ការ​របស់​តុលាការ​ឡាអេ​នេះ ហើយ​ថា ​កម្ពុជា​ក៏​ត្រៀម​ប្រតិភូ​របស់​ខ្លួន​ដើម្បី​ឡើង​ទៅ​បកស្រាយ​នៅ​ចំពោះ មុខ​​តុលាការ​អន្តរជាតិ​ផង​ដែរ។

ផ្សាយពាណិជ្ជកម្ម

យោង​តាម​បណ្តឹង​របស់​កម្ពុជា ដែល​ដាក់​ដោយ​លោក​ឧបនាយករដ្ឋមន្ត្រី​ហោ ណាំហុង ​រដ្ឋមន្ត្រី​ការបរទេស​កម្ពុជា តុលាការ​យុត្តិធម៌​អន្តរជាតិ​ឡាអេ ​បាន​សម្រេច​បើក​សវនាការ​ ២​ថ្ងៃ គឺ​នៅ​ថ្ងៃ​ទី​៣០ និង​៣១​ឧសភា​ខាងមុខ​នេះ។ នេះ​បើ​តាម​សេចក្តីប្រកាស​ព័ត៌មាន​របស់​តុលាការ​ឡាអេ​កាល​ពី​ថ្ងៃ​ទី​១៩​ឧសភា។

តាម​ពិត តុលាការ​ក្រុង​ឡាអេ​បាន​សម្រេចចិត្ត​បើក​សវនាការ​ជា​សាធារណៈ ដើម្បី​ជំនុំជម្រះ​លើ​បណ្តឹង​មួយ​របស់​កម្ពុជា ដែល​ស្នើ​អោយ​មាន​វិធានការ​ ជា​បន្ទាន់ ​ដើម្បី​ការ​អភិរក្ស​ប្រាសាទ​ព្រះវិហារ ដោយ​ចៀស​អោយ​បាន​ការ​ប៉ះទង្គិច​ដោយ​អាវុធ​សា​​ជា​ថ្មី។

កាល​ពី​ថ្ងៃ​ទី​២៨​មេសា រដ្ឋមន្ត្រី​ការបរទេស​កម្ពុជា លោក​ហោ ណាំហុង​បាន​ដាក់បណ្តឹង​ចំនួន​២​ទៅ​តុលាការ​យុត្តិធម៌​អន្តរជាតិ​ក្រុង​ឡាអេ ដែល​បណ្តឹង​ទី​មួយ គឺ​ការ​ស្នើ​អោយ​បកស្រាយ​សាលក្រម​ឡាអេ​ឆ្នាំ​១៩៦២ លើ​សំណុំ​រឿង​ប្រាសាទ​ព្រះវិហារ  និង ​បណ្តឹង​ទី​២ គឺ​ការ​ស្នើចាត់​វិធានការ​ ជា​បន្ទាន់ ​ដើម្បី​ការ​អភិរក្ស​ប្រាសាទ​ព្រះវិហារ ពោល​គឺ ស្នើ​អោយ​មាន​ការ​បញ្ជា​អោយ​ថៃ​ដក​ទ័ព​ចេញ​ពី​តំបន់​រមណីយដ្ឋាន​បេតិកភណ្ឌ​ពិភពលោក​នេះ។ គឺ​បណ្តឹង​ទី​២​នេះ​ហើយ ដែល​តុលាការ​អន្តរជាតិ​ឡាអេ​ចាប់ផ្តើម​ចាត់ការ​នោះ។

អ្នក​នាំពាក្យ​ក្រសួង​ការបរទេស​កម្ពុជា លោក កុយ គួង​បាន​ថ្លែងសាទរ​ចំពោះ​ការ​ចាត់ការ​របស់​តុលាការ​ឡាអេ​លើ​បណ្តឹង​របស់​កម្ពុជា។

យោង​តាម​នីតិវិធី ភាគី​ទាំងពីរ​ កម្ពុជា និង​ថៃ​នឹង​ត្រូវ​បង្ហាញខ្លួន​នៅ​ចំពោះមុខ​ចៅក្រម​ដើម្បី​បង្ហាញ​ទឡ្ហីករណ៍​ផ្ទាល់មាត់។ លោក​កុយ គួង​បាន​បញ្ជាក់​ប្រាប់វិទ្យុបារាំង​អន្តរជាតិ​ថា លោក​ឧបនាយករដ្ឋមន្ត្រី​ហោ ណាំហុង​នឹង​ដឹកនាំ​គណៈប្រតិភូ​ ក្រុម​អ្នកច្បាប់​កម្ពុជា​ទៅ​ទីក្រុង​ឡាអេ​សម្រាប់​សវនាការ​នេះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI